MARK 12 - SAOPOBÜ LAI (BSI)

Semlühlaaka Khüpbü shuong Ngühphatbü

¹ Haoei haoen to ngühphatbüa laukei; “Müt cheei semlühlaak che lekei, kho kaijembo ba lekei, nitshang shanga püngkhün thukei hoba shondip che dangkei. Haoei kho moubü shuong la apyokuan hao usa to satkei.

² Jih sühbüa, haoen ka semlühlaak ka mai hapla shanga haoei khübü shuong jungto sambü che koutikei.

³ Haoenei hao lapjung louan ngümei ai akünko ungtikei.

⁴ Nyiboukei haoei haoen jungto sambü che koutikei. Haoenei khola khua aktikei hoba himou bauko jungeikei.

⁵ Haoei lubü che koutikei hoba haoenei hao haitikei. Hobaje lubükei juongnyu; haoenei at to ngümbei hoba joubü shuong haitian apbei.

⁶ Haoei tokei che jouan kiteikei, kho haoei sanoubü jayangshou. Haoei thonla hao haoen jungto hai lauko hautikei, ‘Haoenei küshou to soumo hatlabü.’

⁷ Lausikei khübü sekmoubü shuongei haoen haoen joyoko laukei, ‘Ho phetphanbou yingkei. Kaiya, senei hao haitiakho, hoba phet- phan kho seneibü yinglabü!’

⁸ Haoenei hao lapbei hoba haitikei, hoba hao semlühlaak ka senan apbei.

⁹ “Semlühlaak bunyuei ai kümla? Hao loulabü hoba sekmoubü shuong kho shemtilabü, hoba semlühlaak kho lubü la kuan aplabü.

¹⁰ Kanei ho Laishiba: ‘Chemdangbü shuongei laobou laang ale kho chemnyek laang la yeikei;

¹¹ ho Bunyubouei kümbei, hoba ho kün thea maangpanglabü ki’, dogo laubü kho ladangkei wean achühkei lo?”

¹² Haoenei hao lapla chüheikei, lausikei haoenei noknyüh to hatkei, aishanga haoei haoen khulimbo ngühphatbü laukei dogo haoenei ngekei. Haoenei hao apyokei hoba satkei.

Khüm Atlabü shangabü Phebü

¹³ Haoenei hao ngühanga nalaptila shanga Farisi si Herod eik at hao jungto hautikei.

¹⁴ Haoen loukei hoba hao to laukei, “Lenbou, no ngühmaanglanbü hoba nyi aoto ühütda dogo künei ngekei, aishanga nyi müt the achühda, lausikei ngühmaia Mühghaü lamnyu lenda. Kaisar la khüm okjan si aying? Künei kula si akula?”

¹⁵ Lausikei Jisuei haoen hibüyoubü ngekei hoba haoen to laukei, “Kanei ngo aila huonda? Küla chühla shanga sempak che sungba.”

¹⁶ Haoenei sungbakei hoba haoei haoen to laukei, “Ho aoeibü noksa hoba nyendo?” Haoenei hao to laukei, “Kaisar.”

¹⁷ Jisuei haoen to laukei, “Kaisareibü ai yingkei kho Kaisar la kuashi hoba Mühg- haüeibü Mühghaü la kuashi.” Hobaje haoen hao to aicheküman maangpangkei.

Haibü ka Langngaibü shangabü Pheyobü

¹⁸ Sadukibü, aoyouei haibü ka alangngaida dogo lauda, haoen Jisu jungto loukei hoba hao to hai lauko phekei,

¹⁹ “Lenbou, Mosaei kün shanga, ‘Müt cheeibü jaiei youyik akiko yak ong apyoan haia longaje, haonaei latnyu kho ngalabü hoba haojai shanga youyik longtijan,’ dogo dokukei.

²⁰ Jaisina nyet kiteikei. Shaangbouei yak che ngakei hoba shousi akiko haikei.

²¹ Nyiboubüei sao lekei hoba shousi aphokuko haikei hoba semboubukei khei.

²² Nyet pendouei sao lekei hoba shousi akiko haikei. Thonla yaksanyu khokei haikei.

²³ Langngaijinei sao aoeibü yak yingla? Aishanga nyet khümboei sao yakla lekei.”

²⁴ Jisuei haoen to laukei, “Laishiba ayingsi Mühg- haü sei angebü ka ong kanei mashikda aying lo?

²⁵ Aishanga ladang mütshuong haibü ka langngailaje haoenei chem akanlabü ayingsi laolamlakei ohautida, lausikei haoen khuthüka kibü hangangbü shuong tegü kilabü.

²⁶ “Lausikei haibü langngaibü shangabü, buham shangabü dobüa, Mosa lea Mühghaüei hao to, ‘Ngo Abraham Mühghaü, Isak Mühghaü, hoba Jakob Mühghaü’, dogo laubü kho kanei wean achühkei lo?

²⁷ Hao haibü shuong Mühghaü aying lausikei langkeibü Mühghaü ki. Kanei yongkotham mashikakei!”

Ngühkhüm Yaangbü

²⁸ Ngühkhüm lenbou yoa che loukei hoba haoen wetyolauyoko ditkei. Jisuei haoen to maisho jongaia dogo ngekei, hoba hao to phekei, “Ngühkhüm pendou to shaangbou kho laobou?”

²⁹ Jisuei jongaikei, “Shaangbou ngühkhüm kho, ‘Ditashi, O Israel! Seneibü Bunyubou Mühghaü kho Bunyubou che ong,

³⁰ hoba nyi ka maangpon pendouei, hoba ka soushou pendouei, hoba kasen kamaang pendouei, nyi Bunyubou ka Mühghaü sanouashi.’

³¹ Nyiboubü kho ho, ‘Nyi ka lepbou to jembü tegü sanouashi.’ Khüto yaangbou ngühkhüm lubü aki.”

³² Ngühkhüm lenbouei hao to laukei, “Tükde ong laua, Lenbou! Hao kho che ong hoba hao to liman lubü aki dogo nyi tükde lena.

³³ Hobaje maangpon khümboei, hoba songsido khümboei, hoba hau khümboei hao to sanoulabü, hoba cheei lepbou to jembü tegü sanoulabü, kho pemtolo juokbü hoba lembüsabü pendou to khaibou.”

³⁴ Jisuei songsido kiko jongaia dogo ngekei hoba hao to laukei, “No Mühghaü Sangle ka ehekei.” Kho ka jaüan aoeikei hao to pheyo wetyola maang ayaangen.

Messia shangabü Phebü

³⁵ Jisuei lembüchema lenjinei laukei, “Messia kho Dawid shou dogo Ngühkhüm lenbou shuongei lai lauda?

³⁶ Dawidei mangkei Soushou Saopobüa hai laukei, ‘Bunyubouei ngeibü Bunyubou to laukei, ngei dangbou shuong ka you phanga aphoku shongko, no kü mae ik aenei setashi.’

³⁷ Dawidei mangkei hao to ‘Bunyubou’ dogo ngada longaje, hao lai küman haoshou yingla?” Noknyühei hao to maangnyembo ditkei.

Jisuei Ngühkhüm Lenbou shuong Khulimbo Maangsangla lenbü

³⁸ Haoei lenjinei laukei, “Ngühkhüm lenbou shuong shanga maangsangshi, aoyouei nei loubang lean paimang sühda, hoba namseishanga salem mangsühda,

³⁹ hoba sinagoga thükkabü setshang hoba lemnyu lemyaanga nyenhang setshang mangsühda.

⁴⁰ Aoyouei latnyu shuongeibü nyaksinam khintida hoba chühjanla shanga ong loubang welauda, khübüei shedbü aei yaangbou haplabü.”

Latnyuei Lembü

⁴¹ Hao namjinshang tangkünga setkei hoba noknyühei namphot to nam jinbü hapbei. Keibü juongnyuei nam juongbang jinkei.

⁴² Shalebü latnyu che loukei hoba saoei poisa che mubü pai nyi jinkukei.

⁴³ Haoei haoeibü eikshuong ngakei hoba haoen to lenkei, “Ngühmaia ngei kan to lenda, nam jinshang to jinbü shuong pendou to ho shalebü latnyuei juongbou jinkukei.

⁴⁴ Aishanga haoen pendouei apsileko kibü ka jinkukei, lausikei ho yaksaei sao shalejongle ka, saoei kibü khümbo, saoei shaulakei ajoutiko jinkukei.”