MARK 11 - SAOPOBÜ LAI (BSI)

Jerusalem to Thük Hapbo Atbü

¹ Ladang haoenei Oliv Shongha Bethfage si Bethani sühan Jerusalem nyangko loukei, haoei haoeibü eik nyi

² hai lauko hautikei: “Kasi thedang kabü sang khüto atashi, hoba kasi atjinei kasiei gadu shoushou che laonei mütei che ongkei setan achühkei, phenan haplabü. Kho sengashi hoba koba;

³ hoba atei kasi to, ‘Kasiei aila ho kümda?’ dogo laua longa, kasiei hai lenashi, ‘Bunyubouei kho khamda; haoei tongde ngaitikulabü.’ ”

⁴ Haosi haukei hoba lamkhonga kouyem chenei gadu shoushou che phenan hapbei, hoba haosiei kho sengkei.

⁵ Khünei loan kibü atei haosi to laukei, “Kasiei gadu shoushou kho sengletko ai kümda?”

⁶ Haosiei Jisuei laubü tegü jongaikei hoba mütshuongei ngüha leko kümtikei.

⁷ Haosiei gadu shoushou kho Jisu jungto kobakei hoba haoenei haoeneibü neisimei hao thükto shangkukei, hoba hao khonei setkei.

⁸ Müt juongei haoeneibü neisimei lama imbukei, hoba lubü shuongei ushi ka buham jatan imbukei.

⁹ Thedang to haubü shuong si phainei sembü shuongei ngekkei, “Hosana! Bunyubou nyena ao louda, hao nyen sangashi.

¹⁰ Seneibü bou Dawid sanglea lombou sangashi. Thükkabou khuthüka Hosana!”

¹¹ Jisu Jerusalem to louan lembüchem to atkei. Ajanjan pendou to sepeisai chühan phaia Anthüknyi yoa Bethani to atkei aieilausi phaian kiteikei.

Jisuei Bhuklong to Khükbüokbü

¹² Nyibounyet ladang haoen Bethani ka longeikei, hao mühei haikei.

¹³ Heebü ka haoei bhuklong che yik kian hapbei hoba haoei khünei denche kiasaoje dogo haukei. Hao chunga sühko loukei hoba khonei yik to liman ai akitei, aishanga kho bhuk hekchalou aying.

¹⁴ Kheijinei haoei bhuklong to laukei, “Tou ka jaüanje aoeikei kaka ladangkei mai teshau!” Hobaje hao eikshuongei kho ditkei.

Jisu Lembüchem to Haubü

¹⁵ Haoen Jerusalem to loukei. Hao lembüchem to atkei, hoba khünei yakyo jekyobü shuong shishi sattikei; haoei namjeibü shuongeibü khümsok si dukutuk yakbü shuongeibü setshang khokan apbukei,

¹⁶ hoba aolakei lembüchem danko peisilei thonla asakku.

¹⁷ Haoei haoen to lenko laukei, “ ‘Phang pendou shanga kü chem kho welaubü chem dogo nyenlabü’ dogo Laishibaei alauda lo? Lausikei kanei ho kokbü shuongeibü laangpob la yeitia.”

¹⁸ Hobaje thükkabü ungshedbou shuong si Ngühkhüm lenbou shuongei ditkei hoba hao haitila hangsilam lamenla haujembei. Haoen hao to hatkei aieilausi noknyühei haoei lenbüa maang- pangkei.

¹⁹ Ladang chasem sühkei Jisu hoba hao eikshuong sangnyu ka satkei.

Bhuklong ka Ditletlabü

²⁰ Hobaje haoen ngeyang enyu danjinei haoenei bhuklong kho li ka yuian hapbei.

²¹ Peterei damenkei hoba hao to laukei, “Lenbou, chüha, nyi khükbüuokbü bhuklong ho yuia.”

²² Jisuei haoen to jongaikei, “Mühghaü to mailem kishi.”

²³ Ngühmaia ngei kan to lenda, “Aoei ong ho shongh to, ‘No haka tonlangan simaangto thapjung atshi,’ dogo lenlaje, hoba hao maangpona ashuda, lausikei haoei ai lauda kho haüthüklabü dogo mailemlaje, kho hao shanga loushedkulabü.

²⁴ Hibü ngei kan to lenda, kanei ai shanga ong welaulaje hoba hilaje, kho pendou hapa dogo mailemashi, hoba kanei khübü haplabü.

²⁵ Kanei ladang loan welau khangda, atei kakhu limbo mashikan kialonga, khuthüka kibü ka Boueikei kaibü shedbü apbulabü lele nyikei hao la apbuashi.

²⁶ (Lausikei kanei üpbulonga, khuthüka kibü ka Boueikei kaneibü shedbü üpbulabü.)”

Jisueibü Hau shangabü Pheyobü

²⁷ Haoen nyibou Jerusalem to loukei; hoba hao lembü chema paiko kijinei, thükkabü ungshedbou shuong, Ngühkhüm lenbou shuong, hoba jaishou shuong dogo, hao jungto loukei,

²⁸ hoba hao to laukei, “Ai hauei nyi habü kümda? Khübü kümla ka la aoei hau kukei?”

²⁹ Jisuei haoen to laukei, “Ngei kan ka che phekho. Küto jongaiashi, hoba ngei ai hauei habü kümsilei kümdaje ngei kan to lenkho.

³⁰ Johaneibü baptibü kho khuthük ka si müt ka? Küto jongaikai.”

³¹ Haoenei haoen yoa wetyopekyoko laukei: “Senei ‘Khuthük ka’ dogo laualonga, haoei ‘Khülonga kanei hao to aila maialem?’ dogo laulabü.

³² Lausikei senei, ‘Müt ka’, dogo laualonga...” (Haoen noknyüh to hatkei, aishanga pendouei Johan kho tükdebü thuseibü che dogo weeikei.)

³³ Hibü haoenei Jisu to jongaikei, “Künei angekei.” Jisuei haoen to laukei, “Ngeikei ai hauei ngei habü kümdaje kan to alenda.”