MARK 1 - SAOPOBÜ LAI (BSI)

Johan Baptikubou Songlen

¹ Mühghaü Shou Jisu Khrista Ngühlang Maibü khangshang.

² Isaia thuseibüa Laishibaei lenda, “Chühashi, ngei ngeibü ngühlang künbou ka thedangto hautida; haoei kala kaibü lam lamlekulabü;

³ atei yama ngekbü hai kia, ‘Bunyubou lam lamleashi, haoeibü youlam tangsheitham kümashi.’ ”

⁴ Hibü Johan longkei. Haoei yama baptikuko kikei hoba müt shuong maangpon sepeijan hoba baptijan, hoba haoen shabü ka ap hapashi dogo ngekko kikei.

⁵ Judea kaonyek pendou hoba Jerusalem kabü mütshuong pendou hao jung to haukei hoba haoeneibü shabü theletko Jordan shumanga haoei baptikukei.

⁶ Johanei ut winei lekei, hoba loma phekhon shembe che kaikei, hoba haoei koksüng si ushi naodei shaukei.

⁷ Haoei ngekkei, “Küto yaangbou che kho kü phainei louada; ngo khüpetan haoeibü nguoklüh sengkula ongkei amukei.

⁸ Ngei kan deia baptikukei, lausikei haoei kan Soushou Saopobüa baptikulabü.”

Jisu Baptibü hoba Takteibü

⁹ Kho jihsiphaia Jisu Galil kabü Nazaret ka loukei hoba Johanei Jordana baptikukei.

¹⁰ Hao dei ka longbü si haoei khuthük wayetko hapbei hoba dukutuk che tegü Soushou hao to lotkei.

¹¹ Hobaje khuthük ka ngüh cheei laukei, “No ngei sanoubü hoba Jayangshou ki. Kato ngei maang haida.”

¹² Kheijinei Soushouei Jisu yam to shian attikei;

¹³ hoba yamlamanga Satanei hao saonyinyet huonkei; hoba yambabü meisiau yoa kikei, hoba khuthük hangangbü shuongei hao to thuikei.

Jisuei Ngau Lapbü Lei Ngabü

¹⁴ Johan lapan phaia Jisu Galil to Mühghaü ka Ngühlang Maibü phinthonko, hai

¹⁵ lauko loukei, “Pienbü jihsiphai kho süha; Mühghaü Sangle nyangko lousüha. Maangpon sepeiashi, hoba Ngühlang Maibü kho mailemashi.”

¹⁶ Hao Galil yungkoa paijinei haoei Simon hoba haona Andria, haosieibü tak dei to tekko hapbei, aieilausi haoen ngaulapbü kikei.

¹⁷ Jisuei haosi to laukei, “Kaiya, kü phai semashi, hoba kan müt lapbü dan yeitilabü.”

¹⁸ Kheijinei haosiei haosieibü tak apyokei hoba hao phai sembei.

¹⁹ Ladang hao saashangko haukei, haoei Zebedi shou Jakob si haona Johan, long chenei haosieibü tak lamleko hapbei,

²⁰ hoba haoei haosi ngakei. Haosiei haosieibü bou Zebedi sambü shuong yoa longa apyoan satkkei hoba hao phai sembei.

Amaibü Soushou kibü Müt Che

²¹ Haoen Kapernaum to loukei, hoba Nounyet hao sinagog to atkei hoba lenkei.

²² Mütshuongei haoei lenbüa maangpangkei, aishanga haoei Ngühkhüm lenbou che tegü ayingko hau kibü che tegü haoen to lenkei.

²³ Khünei haoeneibü sinagoga shabü souei lapbü che kikei.

²⁴ Haoei ngekkei, “Nazaretbü Jisu, nyi aila kün la kipjim kuda? No aoje ngeakei: No Mühghaüeibü Saopobou kho ki.”

²⁵ Jisuei hao to kaangko laukei, “Telemen! Hao ka longan apashi!”

²⁶ Asaopobü soushouei hao toptikei hoba kaang phangkei. Kho phaia kho hao ka longan apbei.

²⁷ Haoen pendou aeibou maangpangan cheei che to phekei, “Ho ai? Hau kibü lenbü haanbü che! Haoei asaopobü soushou la mangkei ngühkhüm kuda, hoba haoenei hao ngüha leda!”

²⁸ Longche danga haoeibü ngühlang Galil kaonyek kaijembo pendou ae aakei.

Jisuei Juongnyu Maitikubü

²⁹ Kheijinei haoenei sinagog apyokei hoba Jakob si Johan yoa Simon si Andria chem to loukei.

³⁰ Simoneibü yakeibü nyu mangbokei shatko yepan kikei, hoba haoenei Jisu la sao shangabü lenkei.

³¹ Hao sao jungto haukei, saoeibü ika hatkei hoba sao lotikei. Mangbokei sao apyokei hoba saoei haoen la nongnaekukei.

³² Ladang chasem sühkei, hoba chanyu nepbei, haoenei hao jungto shatbü hoba shabü souei lapbü pendou leibakei,

³³ hoba sangnyu khümbo koukhüna shaikei.

³⁴ Shat phang phangei shatko kibü juongnyu haoei maitikukei hoba shabü soushou juongnyu shian sattikukei; haoei shabü soushou shuong la ngüh üangti, aishanga haoenei hao ngean kikei.

Jisuei Galila Songlenbü

³⁵ Ngeyang ete, lange asaoko hao pikei hoba satkei; hoba hao sangliphang che to haukei hoba khünei welaukei.

³⁶ Simon si hao meitangbü shuongei hao lamjung haukei,

³⁷ hoba ladang haoenei hao hapbei, haoenei hao to laukei, “Pendouei no chüheida.”

³⁸ Haoei haoen to laukei, “Ngei khünkei songlenenlabü lele senje lepsang at to hauakho; khoei ngo longan apbei.”

³⁹ Hao Galil pendou jembo haoeneibü sinagoga songlenko hoba shabü soushou shian sattiko haukei.

Jisuei Imbü Che Saüenkubü

⁴⁰ Imbü che Jisu jungto loukei hoba hao to sukeijakei. Hao khüpetkei hoba hao to laukei, “Nyi maangangsije ngo saüenkula thükkei.”

⁴¹ Jisuei sanouko dambei hoba haoeibü ik shingkei, hoba hao to meitiko laukei, “Ngei maangangda, no saüenashi.”

⁴² Kheijinei tham imei hao apyokei hoba saüenan yeikei.

⁴³ Jisuei hao to kaangko laukei hoba kheijinei tham hao sattiko

⁴⁴ laukei, “Nyi ho aotokei telen. Lausikei hauashi hoba nyi lolo ungshedbou la lenashi hoba no saüenbü aukabü lela shanga Mosaei ngühkhüma sakkubü kho lemashi.”

⁴⁵ Müt kho ngaikei hoba ngühli kho lendang lekei; haoei ngühli kho yongko phaktibü danko Jisuei lubü sangnyu che to ongkei pühthea ohauen, lausikei ushi sangliphang kaoena ong thüngkei; hoba kaoen pendou aeka hao jungto loukei.