LEVI 9 - SAOPOBÜ LAI (BSI)

Aronei Silipjabü Lembü Kubü

¹ Tou chalou setbounyet Mosaei Aron si haoeibü shousi shuong hoba Israelbü jaishou shuong ngakei;

² hoba haoei Aron to laukei, “Nyi shabü lembü shanga masu paangshou che sungashi, hoba juokbü lembü shanga sanlon paang mo alebü hoba khübü kho Bunyubou thedanga lemashi.

³ Hobaje Israel shousi shuong to nyi lenashi, kanei shabü lembü shanga lonpaang che hoba juokbü lembü shanga mo alebü masu paangshou che hoba sanlon shoushou che, ham kho po cheeibü shou sungshi,

⁴ hoba Bunyubou thedanga sangmai lembü lemla shanga masu pongsu che hoba sanlon paang che hoba onang to kheiyoan shausiyung lembü che, aieilausi tat Bunyubou kan jungto longlabü.”

⁵ Hibü Mosaei haoen la sakkubü tegü haoenei Bunyubou jungto kamshang neichem to jungan loukei; hoba shuong pendou thedanga lokei.

⁶ Kheijinei Mosaei laukei, “Ho kanei kümlabü Bunyubouei sakkubü ki; hoba Bunyubou soneikangbü kan jungto longlabü.”

⁷ Hobaje Mosaei Aron to laukei, “Bunyubouei sakkubü tegü lemshang nyangko kaiya, hoba kaibü shabü lembü kuashi, hoba kaibü juokbü lembü kuashi, hoba jembü shanga hoba noknyüh shanga saumeisaübü kümashi hoba noknyüheibü lembü kuashi, hoba haoen shanga angthetbü kümashi.”

⁸ Hibü Aron lemshang nyangko loukei, hoba hao shanga shabü lembü shanga masu paangshou kho haitikei.

⁹ Hobaje Aroneibü shousi shuongei hao jungto sii kho sungbakei, hoba siia haoeibü ikjishou shembei hoba lemshanga kibü laang shuonga naangkukei hoba lemshang junga sii kho yeian jinkukei.

¹⁰ Lausikei Bunyubouei Mosa la sakkubü tegü shabü shanga lembü haabü, kelang hoba senjan yukbü haoei lemshanga juokkei.

¹¹ Phe si khon haoei kamshang khonga juokkei.

¹² Kheijinei haoei juokbü lembü kho haitikei; hoba Aroneibü shousi shuongei hao la sii kukei, hoba haoei kho lemshang kaijembo lakkukei.

¹³ Hobaje haoenei hao la juokbü lembü phejem lulu, hoba khu khümbo kukei, hoba haoei khübü kho lemshang thük shona juokkei.

¹⁴ Hobaje haoei senmaang hoba you sakkei, hoba lemshanga juokbü lemshang thüka juokkei.

¹⁵ Kho phaia haoei noknyüheibü lembü kukei, hoba noknyüh shanga lemla kulabü lon shabü shanga lemla sungbaan kho haitikei, hoba nyishou tegü shabü lembü kukei.

¹⁶ Hobaje haoei juokbü lembü sungbakei, hoba ngühkhüm tegü lembü kukei.

¹⁷ Hobaje ngeyang juokbü lembü to liman shausiyung lembü ikmaang shenko jungan lemshang thüka juoktiko haoei kho kukei.

¹⁸ Haoei toukei noknyüh shanga sangmai lembü kula masu pongsu hoba sanlon paang kho haoei haitikei; hoba Aroneibü shousi shuongei hao la sii khümbo kukei, hoba haoei kho lemshang kaijembo lakkukei.

¹⁹ Hobaje masu pongsueibü haabü, sanlon paangeibü meia haabü hoba senmaanga haabü, hoba kelang hoba senjan yukbü;

²⁰ hoba haoenei senlang yoa phokukei, hoba haoei haabü kho lemshanga juokkei.

²¹ Hobaje Mosaei sakkubü tegü Bunyubou thedanga soueibü lembü shanga senlang hoba mae youshi Aronei soueitikei.

²² Aronei noknyüh thüka haoeibü ik shingan haoen haükukei; hoba juokbü lembü hoba sangmai lembü kuan louyenkei.

²³ Mosa si Aron kamshang neichem khüto atkei hoba longan noknyüh haükukei; hoba Bunyuboueibü soneikangbü müt pendou thükto longkei.

²⁴ Hobaje Bunyubou yobü ka wan longkei, hoba shaishang thüka juokbü lembü hoba haabü suian apbei; hoba ladang noknyühei hapbei, haoenei ngekkei hoba the khüman tuongkei.