LEVI 8 - SAOPOBÜ LAI (BSI)

Aron hoba Haoshousi Shuong Naangenko Pienbü

¹ Bunyubouei Mosa to laukei,

² “Aron hoba haoeibü shousi shuong hao yoa leiashi, hoba neisimei, naanglabü onang, shabü lembü shanga masu pongsu hoba sanlon paangshou penyi hoba tokai ajinbü wentek kam jungashi;

³ hoba nyi shuong pendou kamshang neichem koukhün junga yoshaitiashi.”

⁴ Bunyubouei kümla sakkubü tegü Mosaei kümbei, hoba kamshang neichem koukhün junga shuong yoshaikei.

⁵ Hobaje Mosaei shuong to laukei, “Bunyubouei kümla sakkubü kümsilei ho ki.”

⁶ Kheijinei Mosaei Aron hoba haoeibü shousi shuong leijung louan deiei haoen sakkukei.

⁷ Hobaje haoei Aron la mangyuk yukkukei, hoba shembeiei hao kaikei, hao la hele lekukei hoba hao la ungshedbou saopobü hele lekukei. Hobaje maangsangko kümbü ungshedbü saopobü neisimei shembeei haoei hao kailepbo khühlepbei.

⁸ Hobaje haoei hao la khükhom yukkukei, hoba khükhoma haoei Urim si Thummim jinkukei.

⁹ Hobaje Bunyubouei Mosa la sakkubü tegütham haoei khuphai hoba khuphai thedang aenei haoei honthip saopobü khun antian phokukei.

¹⁰ Kheijinei Mosaei naanglabü onang sungkei hoba lemshang neichem hoba khünei kibü pendou la naangkukei hoba khübü kho saüenkukei.

¹¹ Hobaje khübü kho saüenla shanga khoei lemshang to nyetnei sühko lakkukei hoba lemshang hoba khoeibü thungsiphau shuong hoba sakshang phauyaang hoba khünei kibü pendou la naangkukei.

¹² Hobaje Aron saüenla shanga haoei haoeibü khua naanglabü onang yeian jinkukei, hoba hao la naangkukei.

¹³ Mosaei Aroneibü shousi shuong leian loukei, hoba Mosaei Bunyubouei sakkubü tegü haoen la mangyuk yukkukei, hoba shembe nei shenlepbukei hoba haoeneibü khun khühkukei.

¹⁴ Kheijinei haoei shabü lembü masu pongsu sungbakei, hoba Aron si haoeibü shousi shuongei shabü lembü masu pongsueibü khua haoeneibü ikei shangetkei.

¹⁵ Hobaje Mosaei kho wapettikei; hoba Mosaei sii kho sungkei hoba lemshang ko kaijembo laangshonga haoeibü ikjishouei naangkukei hoba lemshang saüenkukei, hoba lemshang koukhün junga sii naangkukei hoba kho sakenkula shanga kho saüenkei.

¹⁶ Hobaje senmaanga kibü haabü pendou hoba sen yukbü hoba kelang penyi hoba khübü haabü haoei sungkei, hoba kho Mosaei lemshang thüka juokkei.

¹⁷ Lausikei Bunyubouei Mosa la sakkubü tegü masu pongsu hoba khoeibü khon, phe, hoba shiang sakbü haoei shaishang khongaenei wana jikan apbei.

¹⁸ Hobaje juokbü lembü sanlon paang haoei sungbakei, hoba Aron si haoeibü shousi shuongei sanlon paangeibü khua haoeneibü ikei shangetkei.

¹⁹ Hobaje haoei kho wapettikei, hoba Mosaei lemshang kaijembo sii lakkei.

²⁰ Hobaje sanlon paang kho haoei netla yeiko jemnyinkei, hoba Mosaei khu si phenet hoba haabü wana jikkei.

²¹ Haoei senmaang si you deiei sakkei, hoba Mosaei sanlon paang pendou lemshang shona juokkei; kho ponlem maibü shanga juokbü lembü kikei; kho Bunyubouei Mosa la sakkubü tegü kikei.

²² Hobaje haoei lubü sanlon paang kho khümbo kubü sanlon sungbakei, hoba Aron si haoeibü shousi shuongei sanlon khua haoeneibü ikei shangetkei.

²³ Hobaje haoei kho wapettikei, hoba Mosaei khoeibü sii sungjung louan Aroneibü mae nouhotena hoba mae ik ikbem hoba mae you youbema hambukei.

²⁴ Hobaje tokei Mosaei Aroneibü shousi shuong leibakei hoba haoeneibü mae nouhotena hoba haoeneibü mae ik ikpema hoba haoeneibü mae you youbema Mosaei sii naangkukei hoba lemshang thük kaijembo joubü sii lakkukei.

²⁵ Hobaje haabü, meia haabü hoba senmaanga kibü pendou hoba sen yukbü hoba kelang penyi hoba khübü haabü mae youshi haoei sungenkei;

²⁶ hoba Bunyubou junga kibü tokai ajinbü wentek kam che ka haoei tokai ajinbü wentek khüh che che, hoba onang jinbü wentek khüh che kho sungenan hoba khübü haabü hoba mae youshi thüka pholabü.

²⁷ Hobaje haoei khümbo Aroneibü ika hoba haoeibü shousi shuongeibü ika phokukei, hoba Bunyubou thedanga soueibü lembü shanga khübü kho soueikei.

²⁸ Hobaje Mosaei khübü kho haoeneibü ik ka sungletkei hoba lemshanga juokbü lembü khübü kho juokkei; khübü kho ponlem maibü khümbo kubü kikei.

²⁹ Mosaei senlang kho sungan Bunyubou thedanga soueibü lembü shanga khoei soueilabü kho sanlon paang khümbo kubü Mosa shangabü phejan kikei kho Bunyubouei Mosa la sakkubü tegü kikei.

³⁰ Hobaje Mosaei naanglabü onang hoba lemshanga kibü sii sungbakei, hoba kho Aron si haoeibü neisimei to hoba haoeibü shousi shuongeibü neisimeia lakkukei; hoba Aron si haoeibü neisimei hoba hao yoa haoeibü shousi shuong hoba haoeibü shousi shuongeibü neisimei saüenan phokei.

³¹ Hobaje Mosaei Aron si haoeibü shousi shuong to laukei, “Kamshang neichem koukhün junga phe kho thungashi; Aron hoba haoeibü shousi shuongei kho shaulabü haang dogo kü la sakkubü tegü khünei kho hoba khümbo kubü kama kibü wentek shauashi.

³² Hobaje laobou phe hoba wentek joulaje kanei khokei wana jikan apashi.

³³ Kan khümbo kuan apbü chalou apenshongko kan kamshang neichem koukhün ka chalou nyetnyet üangjan.

³⁴ Senei tat kümbü tegü kho khei kümbo kaneibü saüsimaü hangletla shanga Bunyubouei sakkukei.

³⁵ Hobaje chalou nyet change nangnaka kamshang neichem koukhüna kan kiphang, hoba kan ühaila shanga Bunyubouei sakkubü jungeiashi; aieilausi kho tegü kula sakkukei.”

³⁶ Hibü Aron si haoeibü shousi shuongei Mosa danko Bunyubouei sakkubü kümbei.