LEVI 7 - SAOPOBÜ LAI (BSI)

Ngaingoubü Lembü Kubü

¹ Habü ho shedtimashikbü lembü kubü, laobou aeibou saopobü ki.

² Lanei juokbü lembü haitida, khünei shedshonbü lembü haitijan; hoba kho khoeibü sii haoei lemshang kaijembo lakkujan.

³ Hobaje haoei khoeibü haabü pendouei lemjan, mei hoba senmaang yuklepbü haabü pendou

⁴ hoba kelang penyi hoba khoeibü hapa kibü haabü hoba senjan yukbü kelang yoan haoei sungan phojan;

⁵ hoba kho Bunyubou to wanei lembü shanga ungshedbouei lemshanga wanei juokjan, ho shed shonbü lembü ki.

⁶ Ungshedbou shuong yoa bousu wekoei kho shaujan, kho saüenbü kaoen chenei shaujan; ho aeibou saopobü.

⁷ Shabü lembü tegü shedbü lembü kho ki, khübü shanga ngühkhüm che kia; ungshedbou aoei shabü hangan apla kümda, phe kho hao shangabü yinglabü;

⁸ hoba ungshedbou aoei ao shanga juokbü lembü kulaje, haoei juokbü lembü kubü khon kho ungshedboueibü yinglabü.

⁹ Hobaje wentek kangshang kümbü shausiyung lembü weko hoba wentek ngoubü phau kümbü hoba youshou kümbü phaua künbü shuong kho lemla kubou ungshedboueibü yinglabü.

¹⁰ Hobaje shausiyung weko onang yoa kheiyoan yingsikei, ulangtham yingsikei Aroneibü shousi pendou khei jeteitei haoeneibü yinglabü.

Jujambü Lembü

¹¹ Bunyubou to lemla shanga ho sangmai lembü lemlabü ngühkhüm ki.

¹² Kho haoei nyensangbü shanga lemalonga kheijinei nyensang lembü yo khünei haoei tokai ajinbü wentek ontou onang yoa kheiyoan hoba tokai ajinbü wentek kho onanga haman hoba wen inyaibü onang yoa kheiyoan haoei kujan.

¹³ Nyensangkubü lembü yo khünei tokai jinbü wentekei haoei lemjan;

¹⁴ hoba kho ka haoei lembü phang weko ka che che yoshaian, haoei Bunyubou to lemjan; kho ungshedbou aoei sangmai lembü sii lakkulaje hao shangabü yinglabü.

¹⁵ Hobaje haoei sangmai lembü haitibü phe kho haoei lemnyet shaujan, nyibounyet ngeyang sühko haoei aikei jouan aphojan

¹⁶ Lausikei haoei theletbü lembü che kualonga ayingsi maangmai lembü che yingalonga haoei lembü kho khünyet shaulabü, lausikei joubü kho ngiet shaulabü.

¹⁷ Lausikei lembü phe sembounyet sühko jouan kibü khoje wana jikan aplabü.

¹⁸ Hobaje sangmai lembü phe at sembounyet shaualonga kho asungletlabü; ayingsi aoei lemda kho aweeilabü; kho mangsenlabü kilabü, hoba kho aoei shaulaje haoei jembü shedbü künlabü.

¹⁹ Hobaje asaopobü peitoleito meitibü phe aikei ashaujan, kho wana jikan apjan, lubü pheje saopoan kibü pendouei shaulabü.

²⁰ Lausikei aoei lulu to asaopobü kian Bunyuboueibü sangmai lembü shaulaje kho müt jembü mütli yo ka wapan aplabü.

²¹ Müt atei asaopobü peitoleito, müt asaopobü to yingsikei, asaopobü meisiau yingsikei ayingsi asaopobü mangsenlabü to meitialonga hoba Bunyubou to sangmai lembü phe shaualonga, kho müt jembü mütli ka shian aplabü.

²² Bunyubouei Mosa to laukei,

²³ “Israel shousi shuong to lenshi: Kanei masu, sanlon ayingsi saneibü haabü ashaujan.

²⁴ Hobaje hao lolo haibü haabü, hoba meisiau taketbüeibü haabü kümsilei lubü shanga jungeila athük lausikei ai yinglaje yingsikei kanei kho ashaujan.

²⁵ Aieilausi Bunyubou to wanei lembü kubü meisiau haabü aoyouei shaulaje kho shaubü müt kho jembü mütli yo ka shian apjan.

²⁶ Kan kishanga ausiyuk ayingsi meisiaueibü sii ashaujan.

²⁷ Sii at ongkei aoyouei shaulaje kho müt jembü mütli ka wapan aplabü.”

²⁸ Bunyubouei Mosa to laukei,

²⁹ “Israel shousi to lenashi, aoei Bunyubou to haoeibü sangmai lembü lemlaje haoei jembü sangmai lembü shuong ka Bunyubou to lembü jungjan;

³⁰ haoei jembü ikei Bunyubou to wanei lembü shuong sungbajan. Bunyubou thedanga soueibü lembü shanga senlangei soueilabü lele haabü yoa senlang haoei jungan loujan.

³¹ Hobaje ungshedbouei haabü kho lemshang shona juokjan; lausikei senlang kho Aron hoba haoeibü shousi shanga yinglabü.

³² Hobaje sangmai lembü shanga haitibü ka mae youshi kaneibü heshaibü lembü shanga ungshedbou la kanei kujan.

³³ Aroneibü shousi shuong aoei sangmai lembü sii hoba haabüei lemlaje mae youshi phejan lejan.

³⁴ Israel shousi shuong haoeneibü sangmai lembü haitibü ka soueibü senlang hoba lekyen heshaibü youshi lembü shanga ngei sungena, hoba khübü kho Aron ungshedbou hoba haoeibü shousi la Israelbü shousi shuong ka kula kibü tegütham ponpen shanga kua.

³⁵ Bunyubouei haoen ungshedbou kümsileia khangenla kubü chaloua Bunyubou to wanei lembü kubü ka ho Aron shanga naangkulabü phejan hoba haoeibü shousi shuong shanga naangkulabü phejan ki;

³⁶ kho haoen naangenko pienbü chaloua Israelbü ka haoen la haoei kula Bunyubouei sakkukei. Haoen meten meten kho haoeneibü phejan ponpen shanga ki.

³⁷ “Juokbü lembü shanga, shausiyung lembü shanga, hoba shabü lembü shanga hoba khümbo kubü shanga, hoba sangmai lembü shanga haitibü, habü ngühkhüm ki.

³⁸ Kho Sinai Yamlamanga haoei Israel shousi shuong to Bunyubou la haoeneibü lembü kula sakkubü chaloua Mosa la Sinai shongha Bunyubouei sakkubü ki.”