LEVI 6 - SAOPOBÜ LAI (BSI)

¹ Bunyubouei Mosa to joyoko laukei,

² “Müt atei shabü shonko Bunyubou khulimbo shedbü kümalonga, hoba haoeibü lepboueibü peisileia maangleman phokubüa khüpettiko ayingsi theyolanyobüa ayingsi soshau soyungbüa ayingsi jembü lepbou khonkutiko kialonga;

³ ayingsi mauan kibü hapsi hoba khünei yepeialonga hoba amlangbüa theyolanyoalonga, mütei kümbü hoba shabü shonbü pendoua

⁴ kheijinei ho hai kilabü, haoei shabü shonan kialonga, hoba shedbü kialonga, haoei soan sungbü, ayingsi haoei ik shatan sungbü peisilei ayingsi haoeibü ika phola kubü peisilei ayingsi maubü peisilei haoei hapbü khübü kho haoei ngaitikujan,

⁵ ayingsi ajanjan pendoua haoei yepeijaweko thealanan kialonga haoei khoeibü namtet phejan ngaola janan che jinyokuan ngaitikujan, hoba haoeibü shedbü lamenbü chaloua haoei kho Bunyubou la kujan.

⁶ Hobaje Bunyubou la haoeibü shedbü lembü sanshuong yo ka mo alebü sanlon paangshou che ngaingoubüei shedbü lembü shanga ungshedbou jungto sungbalabü,

⁷ hoba Bunyubou thedanga hao shanga ungshedbouei shabü hangan apla kümlabü, hoba aiei ong hao shedlabü lele kümbei kho shanga hao la shedbü apbulabü.”

Lembüsabü Khümbo Juokbü

⁸ Bunyubouei Mosa to laukei:

⁹ Aron hoba haoeibü shousi shuong la ngühkhüm kuko lenashi. Ho juokbü lembü ngühkhüm ki; juokbü lembü kho lemshang thüka wan maanga shangan lang ange shongko kijan; hoba kho thüka lemshanga wan longyonyu phojan.

¹⁰ Hobaje ungshedbouei haoeibü phembanei neijan, hoba haoeibü mang phembanei lenglengbüei youshang shangjan; hoba lemshanga juokbü lembü wanei lonshembü tap haoei sungletan lemshang napheinei pholabü.

¹¹ Kheijinei haoei haoeibü neisimei hangletan lubü neisimei lejan, hoba shaishang khongaenei saoposhang kaoen to tap sungbajan.

¹² Hobaje lemshanga wan kho athakko kho thüka longtian phojan, hoba kho anyettijan; hoba ngeyang weko ungshedbouei kho thüka bu jikjan; hoba kho thüka juokbü lembü küpjembo phojan, hoba kho thüka sangmai lembü haabü juokjan.

¹³ Athakko kho thüka wan longyoyo phojan; kho anyettijan.

Shausiyung Lembü

¹⁴ Habü ho shausiyung lembü ngühkhüm ki; Aroneibü shousi shuongei Bunyubou junga lemshang thedanga kho lemjan.

¹⁵ Hobaje kho ka haoeibü ik khong che shenko shausiyung lembü inyaibü sungenlabü, hoba kho ka onang hoba shausiyung lembü thüka kibü jen pendou hoba Bunyubou to damenlabü shanga lemshang thüka ponlem maibü shanga kho juokjan.

¹⁶ Hobaje kho ka joubü kho Aron hoba haoeibü shousi shuongei shaulabü; kho tokai ayoko saopobü kaoena shaujan; kamshang neichem khonga haoenei kho shaujan

¹⁷ Kho tokai ajinko ngoujan, kho ngei haoen la kü to wanei lembü haoeneibü phejan kua, shabü shonbü lembü hoba shedbü lembü tegütham kho aeibou saopobü.

¹⁸ Wanei Bunyubou to lembü ka meten meten shanga haplabü phejan tegütham, Aroneibü shousi shuongei bousu wekoei kho shaujan; aoyouei khübü to meitilaje saopolabü.

¹⁹ Bunyubouei Mosa to laukei,

²⁰ Ho Aroneibü shousi shuongei Bunyubou to hao la onang naangkubü chaloua lemlabü ki; ponpen shausiyung lembü shanga wen inyaibü efa anboubü phejan, kho thoche ngeyang hoba thoche chasem.

²¹ Wentek ngoubü phau chenei kho onang yoa kümjan; kho onanga haman nyi jungan kaiyet; hanpang la yeitian Bunyubou la ponlem maibü shausiyung shanga nyi kujan.

²² Hobaje onang naangkuko pienbü hao jeibü haoeibü shousi yo ka kho lemjan; ponpen ngühkhümei kho kümbo Bunyubou la juokbü lembü kujan.

²³ Hobaje ungshedbou shanga shausiyung lembü weko wanei khümbo juokjan; kho ashaujan.

Shed Shonbü Lembü

²⁴ Bunyubouei Mosa to laukei,

²⁵ Aron hoba haoeibü shousi shuong to lenshi: Ho shedshonbü lembü ngühkhüm ki; juokbü lembü lan haitida khünei Bunyubou thedanga shedshonbü lembü haitijan; ho aeibou saopobü.

²⁶ Ungshedbou aoei kho shabü shanga lemlaje, haoei kho shaujan; kamshang neichem khongmaanga saoposhang chenei kho shaujan.

²⁷ Kho phea aoei meitilaje, saopobü yeilabü hoba neisimei ata sii lakan kialonga ainei lakan ki kho saoposhang chenei sakjan.

²⁸ Lausikei thamchak laoboua kho thungkei, kho phetnyinjan; hoba kho chinam chaka thungalonga sateiko saman deia jekan aptiashi.

²⁹ Ungshedbou yoa bou shuongei kho shaulabü; ho aeibou saopobü.

³⁰ Hobaje shabü lembü kubü laobou kamshang neichema saoposhang saüsimaü hangan apla jungan lotan ki kho ashaujan, kho wana jikan apjan.