LEVI 5 - SAOPOBÜ LAI (BSI)

Shedshonbü Lembü Kubüa Ngühsidei Juongbü

¹ Müt atei shed shonan hoba thebülanbü ngüh ditan kho haoei hapan ayingsi ngean aukabü kuan kialonga, hoba haoei ngüh üanglonga kheijinei haoei lubü che khoeibü shedbü kho haoei künlabü.

² Ayingsi atei asaopobü peisilei at to meitisi, asaopobü meisiau haibü mang to yingsikei asaopobü samkeisamuk haibü mang to yingsikei ayingsi hongyobü yangsikok haibü mang to yingsikei hoba kho haoei küplepan phoan kialonga hao asaopoko yeilabü, hoba hao shedbü kilabü.

³ Ayingsi müt asaopobü to meitialonga, asaopobü aiei ong müt shedtilaje, hoba hao haka küplepan phoan kialonga ladang haoei kho ngelaje khei hao shedbü kilabü.

⁴ Ayingsi atei helelea amaibü kümla, ayingsi maibü kümla jembü sembung ka thelalanlaje ai ong mütei helelea theyolanyoko laulaje, hoba kho haoei küplepan kialonga ladang haoei kho ngelaje kheijinei khübü pendoua hao shedbü kilabü.

⁵ Hobaje ladang khübü yoa chenei ongkei shedbü kilaje lanei haoei shed shonkei kho shanga haoei shedbü thekulabü,

⁶ hoba haoei shonbü shabü shanga Bunyubou jungto haoeibü shedbü lembü, san shuong yo ka saoen che, san shoushou che ayingsi lon che shabü lembü shanga haoei sungbalabü; hoba haoeibü shabü shanga ungshedbouei saüsimaü hangan apbula hao shanga kümbulabü.

⁷ Hobaje haoei san shoushouei lemla athüklonga kheijinei haoei haoeibü shedbü lembü ainei haoei shed shonkei kho shanga jemau penyi ayingsi dukutuk penyi Bunyubou jungto sungbalabü; che shabü lembü shanga hoba lubü che juokbü lembü shanga,

⁸ hoba haoei khübü kho ungshedbou jungto sungbalabü hoba laobou shabü lembü ki, shaangla haoei khoei lemlabü; hoba haoeibü ngüm ka khu sükthetkulabü lausikei kho abangtilabü,

⁹ hoba shabü lembü sii kho lemshang you junga laklabü hoba joubü sii kho lemshang junga pionglama koutilabü, kho shabü lembü ki.

¹⁰ Hobaje nyiboubü kho haoei juokbü lembü shanga songa kibü kilabü, hoba haoei shedbü shonbü shanga ungshedbouei hao shanga saüsimaü hangan apbulabü, hoba haoeibü shedbü apbulabü.

¹¹ Lausikei haoei jemau penyi ayingsi dukutuk shoushou penyi kula athüklonga, kheijinei haoei ainei shed shonkei kho shanga lembü wen inyaibü an phejana che shed shonbü lembü jungan loulabü; haoei khünei onang yingsikei ayingsi haoei khünei jen yingsikei ajinkulabü; aieilausi kho shabü shanga lembü ki.

¹² Hobaje kho haoei ungshedbou jungto sungbalabü, hoba kho ungshedbouei haoeibü ikmaang shenko damenlabü shanga lelabü, hoba Bunyubou thedanga wenei lembü thüka lemshanga kho juoklabü, kho shabü lembü ki.

¹³ Hobaje khübü kümsilei at haoei shonbü haoeibü shabü shanga hao shanga ungshedbouei saüsimaü hangan apla kümlabü, hoba haoeibü shedbü apbulabü, hoba shausiyung lembü tegütham joubü kho ungshedbou shangabü kilabü.

Lembüsabü Ngaingoubü

¹⁴ Bunyubouei Mosa to laukei,

¹⁵ Bunyuboueibü saopobü peisileia müt atei shanshedte shedbü che jungeialonga kheijinei haoei haoeibü shedbü lembü sanlon shuong yo ka mo alebü sanlon paang che Bunyubou jungto jungan loujan, kho shedbü lembü shanga lemshanga kibü shekelei nyi chandinam takbü thüng kulabü,

¹⁶ hoba saopobü peialeia haoei mashikan kümbü shanga haoei jeibü kujan; hoba phejan ngaoboubü khünei jinan kho ungshedbou la kujan; hoba ungshedbouei hao shanga sanlon paangshouei shedbü lembü haoeibü shabü hangan apla shanga kümlabü, hoba haoeibü shedbü apbulabü.

¹⁷ Hobaje müt atei shabü shonalonga hoba Bunyubouei teküm dogo laubü at kümalonga haoei kho angesikei haoei haoeibü shedbü künlabü.

¹⁸ Hobaje sanshuong yo ka sanlon paangshou mo alebü che ngaingoubüei shedbü lembü shanga haoei ungshedbou jungto sungbajan, hoba mashikbü laobou haoei shanshedte kümbei hao shanga ungshedbouei saüsimaü hangan apla shanga kümlabü.

¹⁹ Ho shedbü lembü ki, maimaitham Bunyubou thedanga hao sheda.