LEVI 4 - SAOPOBÜ LAI (BSI)

Shanshedtebü Shedshon shanga Lembü Kubü

¹ Bunyubouei Mosa to joyoko laukei,

² Israel shousi shuong to lenashi, Bunyubouei tekümtelei laubü kümsileia müt atei shanshedte shed shonalonga hoba khübü yoa at kümalonga;

³ shed shonbou kho onang naangko pienbü ungshedbou che yingalonga hoba müt shuong to shed sungbaalonga, kheijinei haoei shed shonbü shanga haoei shedbü kümbü lu Bunyubou la masu paangshou che lembü kuashi.

⁴ Haoei masu paangshou kho kamshang neichem koukhün junga Bunyubou jungto sungbajan, hoba haoei masu pongsu khua haoeibü ikei shangetlabü hoba Bunyubou thedanga masu paangshou kho haitilabü.

⁵ Kheijinei naangenko pienbü ungshedbou khoei masu paangshoueibü sii kho kamshang neichem khüto sungbalabü;

⁶ hoba ungshedbou khoei haoeibü ikjishou siia haman saoposhang thangtetnei thedanga Bunyubou junga haoei sii kho nyetnei lakkulabü.

⁷ Hobaje kamshang neichema Bunyubou thedanga kibü ponlem maibü lemshanga laang shuonga ungshedbouei sii naangkujan, hoba masu paangshoueibü sii pendou kho kamshang neichema kibü juokbü lembü lemshang junga kaijembo haoei jonan koutikujan.

⁸ Hobaje shabü lembü shanga masu pongsueibü haabü pendou kho haoei khüka sungenlabü, senmaang yukbü haabü hoba senmaanga kibü haabü pendou,

⁹ hoba kelang penyi hoba khünei kibü haabü hoba sen yukbü kelang kho yoan haoei sungenjan.

¹⁰ Sangmai lembüa masu pongsu haitian lembüa sungbü tegütham hoba kho ungshedbouei juokbü lembü lemshang thüka juoklabü.

¹¹ Lausikei masu pongsueibü khon hoba kho phe pendou khu, you, senmaang hoba shiang phet,

¹² masu pongsu pendou kho sühshang khongaenei sakteitham kishang lanei tap apda khünei wanei juokjan.

¹³ Israelbü pendouei angeko shed shonalonga hoba kho shuongeibü nyek ka huan kialonga hoba Bunyubouei teküm dogo laubü at küman shed kakan kialonga,

¹⁴ ladang lanei haoenei shed shonkei kho ngelaje, kheijinei shuongei shabü lembü shanga masu paangshou cheei lemjan, hoba kho kamshang neichem to sungbajan.

¹⁵ Hobaje Israelbü jaishou shuongei masu pongsueibü khua Bunyubou thedanga haoeneibü ikei shangetjan; hoba Bunyubou thedanga masu pongsu kho haitijan.

¹⁶ Hobaje makenko pienbü ungshedbouei masu pongsueibü sii kho kamshang neichem to sungbalabü,

¹⁷ hoba ungshedbouei haoeibü ikjishou siia khonan thangtetnei thedanga nyetnei sühko Bunyubou thedanga kho wenan jinkujan,

¹⁸ hoba haoei sii kho kamshang neichema Bunyubou junga kibü lemshanga kibü laang shuonga sii naangkujan hoba joubü sii kho lembü shona haoei yeian jinkulabü.

¹⁹ Hobaje kho ka haabü pendou sungenan haoei lemshang thüka juokjan.

²⁰ Kho tegü haoei masu paangshouei haoeibü shabü apla lembü jungeibü to jeteia ungshedbouei haoen shabü ka leingaila masu paangshou lembü kho kümbujan. Hobaje haoeneibü shabü apbulabü.

²¹ Kheijinei kamshang khong aeto masu pongsu kho sungbalabü; hoba kho shaangbou masu pongsu juokbü tegü juokjan; kho shuongeibü shabü shanga juokbü lembü ki.

²² Ladang khusabü cheei shed shonlaje hoba Bunyubou haoeibü Mühghaüei teküm laubü kümsilei at shanshedte kümlaje hoba shed kakan kilaje,

²³ haoei ainei shed shonkei kho haoei ngeenalonga, hao boupemei lembü lon che mo alebü paangshou che sungbajan;

²⁴ hoba haoei loneibü khua haoeibü ikei shangetlabü hoba kho lon juokbü lembü ladang haitilaje khünei Bunyubou thedanga haitijan, kho shed shonbü lembü ki.

²⁵ Hobaje ungshedbouei shed shonbü lembü sii kho hao jembü ikjishouei sungbalabü hoba kho juokbü lembü lemshanga laang shuonga naanglabü hoba kho sii kho juokbü lembü lemshang junga yeian jinkulabü.

²⁶ Hobaje sangmai lembü haitibü tegütham haabü pendou kho haoei lemshang thüka juokjan, hoba ungshedbouei haoeibü shedbü shanga saüsimaü hangan apla kümjan hoba haoeibü shedbü apbulabü.

²⁷ Bunyubouei teküm dogo laubü kümsilei at noknyüh atei kümbüleibüa shanshedte shed shonko kümouan kisi,

²⁸ haoei ainei shed shonkei kho ngeenalonga kheijinei haoei shonbü saüsimaü shanga haoei lembü shanga lon mo alebü saoen che sungbajan.

²⁹ Haoeibü shed shonbü lembü khua haoeibü ikei shangetjan, hoba juokbü lembü lemshanga shed shonbü lembü kho haitijan.

³⁰ Hobaje ungshedbouei kho sii kho haoeibü ikjishouei sungjung louan juokbü lembü lemshanga laang shuonga naangjan, hoba joubü sii kho lemshangyoudanga yeian jinkulabü.

³¹ Hobaje sangmai lembü haitibüa haabü pendou sungenbü tegütham haabü pendou kho haoei sungenjan; hoba Bunyubou thedanga ponlem maibü shanga lemshang thüka kho ungshedbouei juokjan, hoba hao shanga ungshedbouei saüsimaü hangan apla shanga kümjan, hoba haoeibü shedbü apbulabü.

³² Hobaje haoei lemla shanga san shoushou che sungbaa longa, kho haoei mo alebü saoen che jungjan.

³³ Hobaje haoei shed shonbü lembü kubü khua haoeibü ikei shangetjan hoba juokbü lembü haitishanga haoei kho shed shonbü lembü shanga haitijan.

³⁴ Ungshedbouei haoeibü ikjishouei shed shonbü lembü sii kho sungjung louan shed shonbü lembü lemshanga laang shuonga naangjan; hoba joubü sii kho haoei lemshang youdanga yeian jinkulabü.

³⁵ Hobaje sangmai lembü kujinei san shoushoueibü haabü pendou sunglangbü tegü haoei haabü pendou sunglangjan, hoba ungshedbouei khübü kho Bunyubou thedanga wanei lembü shuong ki, hoba haoei shonshaibü shedbü shanga saüsimaü hangan apla kümjan, hoba haoeibü shedbü apbulabü.