LEVI 3 - SAOPOBÜ LAI (BSI)

Jujambo Lemla Kubü

¹ Ladang müt atei lemlaje sangmai lembü kubü yingalonga haoei haoeibü shatsinam yoka paang yingsikei, pi yingsikei haoei Bunyubou thedanga mo alebüei lemjan.

² Haoei lemlabü meisiaueibü khua haoeibü ikei shangetjan, kho Bunyubou yobü kamshang neichem koukhüna haitilabü hoba Aroneibü shousi shuong müilingbü shuongei lemshang kaijembo sii laklabü.

³ Hobaje Bunyubou thedanga wanei lembü tegü sangmai lembü haitiko haoei lemlabü, senmaang yukbü haabü hoba senmaanga kibü haabü pendou,

⁴ hoba kelang penyi hoba khükabü haabü hoba sen yoa kelang khübü haoei sunglabü.

⁵ Kho Aroneibü shousi shuongei wanei thüka kibü bu juokbü lembü thüka lemshanga juokjan; kho Bunyubou thedanga ponlem maibü shanga lembü ki.

⁶ Haoeibü lembü kho Bunyubou to sambü shatsinam ka sangmai lembü shanga yingalonga paang yingsikei pi yingsikei mo alebüei lemjan, yingsikei haoei kho mo alebüei lemjan.

⁷ Haoei lemlabü kho sanlon paangshouei yingalonga, haoei kho Bunyubou thedanga lemjan,

⁸ hoba haoei lemlabü khua haoeibü ikei shangetlabü, hoba kamshang neichem thedanga haitilabü hoba Aroneibü shousi shuongei sii kho lemshang kaiko lakkulabü.

⁹ Bunyubou to wanei lembü tegü sangmai lembü haitibü haoei lemlabü, khoeibü haabü hoba meikabü khümbo haoei ngeilo sühko sungan aplabü; hoba senmaang yukbü haabü hoba senmaang yukbüa kibü haabü pendou,

¹⁰ hoba kelang penyi hoba khünei kibü haabü hoba sena yukbü hoba kelang yoan sungenlabü.

¹¹ Kho ungshedbouei lemshang thüka juoklabü; ho Bunyubou to wanei lembü tegü shausiyung lembü kubü ki.

¹² Haoeibü lembü kho lon yingalonga, kho Bunyubou thedanga lemjan,

¹³ hoba haoeibü ikei khoeibü khua shangetjan hoba kho kamshang neichem thedanga haitijan, hoba Aroneibü shousi shuongei lemshang kaijembo sii lakjan.

¹⁴ Haoei kho lembü Bunyubou to wanei lembü kubü tegü lemjan; senmaang yukbü haabü hoba senmaanga kibü haabü pendou,

¹⁵ hoba kelang penyi hoba khünei kibü haabü sen yukbü hoba kelang penyi kho haoei sungenjan.

¹⁶ Kho müilingbü lemshang thüka juokjan, ho ponlem maibü shanga wanei lembü tegü shausiyung lembü ki, haabü pendou kho Bunyubou shangabü.

¹⁷ Kanei haabü ayingsi sii ashaula shanga kan kishanga meten pendoua ponpen shanga ngühkhüm che kilabü.