LEVI 2 - SAOPOBÜ LAI (BSI)

Youshouei Lembü

¹ Ladang müt atei Bunyubou to youshouei lemda, haoei lembü kho wen la yeitijan; hoba haoei kho thüka onang jinkulabü,

² hoba haoei kho Aroneibü shousi shuong jungto jungan loulabü. Hobaje khoka wen inyaibü hoba onang ikkhong che shenko khünei kibü jen pendou sungenlabü; hoba kho ungshedbouei lemshanga damenlabü shanga juoklabü; kho Bunyubou to ponlem maibü wanei takteibü ki;

³ hoba lembü kuan joubü kho Aron si haoeibü shousi shuong shangabü yinglabü; kho Bunyubou to wanei lembü aeibou saopobü kümsilei ki.

⁴ Hobaje ladang nyi wen kümbü hoka wentek shaknyinan shausiyung lembü kulaje, kho tokai ajinbü wentek peklebü onang naangan yingjan.

⁵ Hobaje kaibü lembü kho wentek kümbü phauyaanga ngoubü yingalonga kho tokai ajinbü wen inyaibü onang to kheiyobü yingjan.

⁶ Nyi kho netla yeiko shaknyinan kho thüka onang yeian jinkujan, kho shausiyung lembü ki.

⁷ Hobaje kaibü lembü kho chaka ngoubü shausiyung lembü kubü yingalonga kho wen inyaibü onang to nyatyobü kijan.

⁸ Hobaje khübü peisilei kümbü shausiyung lembü nyi Bunyubou jungto sungbajan hoba kho ungshedbou la kulabü hoba haoei kho lemshang to sungbalabü.

⁹ Hobaje ungshedbou khoei shausiyung lembü ka damenlabü shanga at sungenan lemshang thüka juoklabü; kho Bunyubou to ponlem maibü wanei lembü ki.

¹⁰ Hobaje shausiyung lembü kubü ka joubü kho Aron hoba haoeibü shousi shuong shanga kilabü, ho Bunyubou jungto juokbü lembü aeibou saopobü ki.

¹¹ Shausiyung lembü laobou kanei Bunyubou to lemlaje kho tokaiei akümjan; aieilausi wanei Bunyubou to lembü kanei tokai ayingsi naodei ajuokjan.

¹² Khübü nyi shaangbü buhek lembü shanga Bunyubou to lemla thükkei; lausikei khübü kho ponlem maibü shanga lemshang thüka aphojan.

¹³ Hobaje shausiyung lembü wekoa nyi jem jinjan; kaibü Mühghaü to theyolanyobü jem kho kaibü shauayunga ayoko akijan; kaibü lembü pendoua nyi jem kujan.

¹⁴ Nyi shaangbü buhek shausiyung lembü che Bunyubou to lemalonga youshou wana ngouan youshou haanbü thengbüei lemjan,

¹⁵ hoba khünei nyi onang jinan kho thüka ponlem hibü jinjan.

¹⁶ Damenlabü lembü tegü youshou ngünnyinbü hoba onang hoba jen pendou kho ungshedbouei juoklabü; ho Bunyubou to wanei lembü ki.