LEVI 12 - SAOPOBÜ LAI (BSI)

Shou Bukan Phaia Nyu Saüenbü

¹ Bunyubouei Mosa to laukei:

² Israel shousi shuong to lenshi, mang akongbü nyu che aoei bousu shou buklaje, kheijinei nyu kho chalou nyetnyet asao- poko kilabü, sao mangnei toteibü jihsiphaia asaopoko kilabü.

³ Hobaje setbounyet shoueibü khop tang kho kipan apjan.

⁴ Chalou khujinto sem sühko nyu saüenan kijan, sao saüenbü chalou apen shongko, saoei saopobü peisilei aineikei ameitijan, ayingsi lemshang to aloujan.

⁵ Lausikei saoei yaksa che buka longa sao lit weko mang samenbü tegü bale penyi asamenko kilabü, hoba sao samenlabü jih apen shongko chalou saosem to lak saüenan kijan.

⁶ Ladang bousu shou shanga yingsikei yaksa shou shanga yingsikei, sao samenbü chalou benlaje, kamshang neichem to ungshedbou jungto saoeibü juokbü lembü shanga sanlon shoushou po cheeibü, dukutuk che, jemau che shabü lembü shanga saoei jungan loujan,

⁷ hoba saoei kho Bunyubou thedanga kulabü hoba sao shanga saomeisaubü kümjan; hoba sao sii koubü ka saüenan kilabü. Bousu ayingsi yaksa bukbü shanga ngühkhüm kho ho.

⁸ Saoei sanlon shoushou che kula athük longa saoei jemau penyi, ayingsi dukutuk penyi jungjan; che juokbü lembü shanga, hoba che kho shabü lembü shanga; hoba ungshedbouei sao shanga saomeisaülabü, hoba sao hinseian kilabü.