DANIEL 8 - SAOPOBÜ LAI (BSI)

Lon Che hoba Sanlon Paang Cheeibü Mangsang

¹ Belshazzar Chobaei songdakbü po semboua ngo Daniel jungto shaangla tegü mangsang che longkei.

² Mangsanga ngei hapbei hoba kho hapjinei ngo Elam provins Suza sangnyua kikei, hoba ngeibü mangsanga Ulai shumang nyangko kikei.

³ Kheijinei chühentikei, hoba chühashi, yungkoa sanlon paang che laang penyi yeman loan kikei, hoba laang penyi ham kho loubang lausikei che loushangbou kikei, hoba thonla loubou kho longkei.

⁴ Sanlon paang khoei, yungkük hoba yungthang aeto thenbü ngei hapbei; hoba meisiau che ongkei aloenen ayingsi aoeikei haoeibü ik ka khümenla athüken, lausikei lulu maang lekei, hoba hao lolo yaangenkei.

⁵ Hobaje ngei damanchühko kitoua, chühashi, chanep ka lon paang che kaodak pendou thükto kaoa ameiyouko ong loukei, hoba lon khola haoeibü nyek kanglanga shetennyu laang che kikei.

⁶ Hobaje laang penyi angbü sanlon paang laobou ngei shumang thedanga loan hapbei hao jungto khauang longan haujembo haoei shijung loukei.

⁷ Hobaje sanlon paang nyangko loubü ngei hapbei hoba hao khulimbo lekeiko hao khauangko hoba sanlon paang khüto kakkei hoba haoeibü laang penyi kho leilutikukei hoba hao thedanga sanlon paang kho lola hau akisije haoei hao kaoa tuongtikei hoba hao to nakeikei hoba haoeibü ik ka sanlon paang kho khümenla aokei akitei.

⁸ Hobaje lon paang kho hao lolo aeibou yaangenan apbei, hoba hao hau kian apjinei laang yaangbü kho leiluan apbei hoba kho jeiko mühkabü yei lei aeto shangshenko laang lei longkei.

⁹ Hobaje haoen che ka laang hanbü che longkei, laobou yungthang, chaangbou hoba soneikangbü kaodak ae aeibou yaangan apbei.

¹⁰ Kho aeibou, khei müha jakko yaangenkei; hoba lakjaibü khanshoulitshou tan ka at kaodak to thenan attikei, hoba khübü thüka nakeikei.

¹¹ Khei haoei jembü lolo khanshoulitshou tan Choba tokei leiyoko yaangenkei hoba haoei athakko juokbü lembü hao ka sunglangkei, hoba haoeibü lemshang pankukei.

¹² Hobaje ngühkhüm leilubü danko khanshoulitshou tan athakko juokbü lembü yoan hao la kuan kikei, hoba haoei ngühmai kaoa attikei, hoba haoei maangangbü kümbo naangmaikei.

¹³ Kheijinei khuthük hangangbü cheei lubü khuthük hangangbü che to lauko ngei ditkei, “Athakko juokbü hoba sangliphang la yeitibü hoba khübü lemshang hoba tan ham youei nakeitilabü shanga mangsang lalokche kila?”

¹⁴ Hobaje haoei hao to laukei, “Chasem hoba ngeyang hajar nyito saongao sem sühko shanga; kho phaia lemshang kho saüenlabü.”

Hangangbü Gabrielei Mangsang Wanenkubü

¹⁵ Hobaje ladang ngo Danielei, mangsang kho hapbei, ngei kho ditenla lambei, hoba chühashi, kü junga müt che phatko lokei.

¹⁶ Hobaje Ulai yungko kanglanga ngei müteibü ngüh cheei ngako ditkei, “O Gabriel, ho müt la mangsang ditentiashi.”

¹⁷ Hibü ngo loshang nyangko hao loukei, hoba hao loujinei ngo hatko mokkei hoba ngo the khüman khüpetkei. Lausikei haoei kü to laukei, “Ditenashi, O müteibü shou, aishanga mangsang kho thonbü chalou shangabü ki.”

¹⁸ Haoei kü to joyoko kijinei ngeibü the kao ae yeian nyeket shian apbei, lausikei haoei kü to meitikei hoba lotikei.

¹⁹ Hobaje haoei laukei, “Chühashi, khau- angbü thonlama ai kila ngei ka la ngetilabü, aishanga kho thonbü takletbü chalou shangabü ki.

²⁰ “Sanlon paang laang penyi yeman kibü nyi hapbü kho Media hoba Persiabü Choba ki.

²¹ Hobaje lonpaang kho Grikbü Choba ki, hoba haoeibü nyek kanglanga kibü laang yaangbü kho püngbü khangbü Choba.

²² Hobaje laobou laang leiluan apbei hoba kho jeiko lei longkei, kho sangle pem lei, phangshuong ka longlabü, lausikei haoeibü hau tegü ayinglabü.

²³ “Hobaje haoeneibü sangle thonlam to ladang ngühkhüm lulimbü shuongei shenan aplaje hatla moklabü Choba che aoei maangka pakbü si huphang ngüh jukyosayobü longlabü.

²⁴ Hobaje haoeibü sei yaang kilabü, lausikei jembü hauei aying hoba haoei hatlamoklabü che leilutikulabü hoba naangmailabü; hoba haoei maangangbü kümlabü hoba hau yaangbü shuong hoba saopobü mütshuong haoei leilutikulabü.

²⁵ Hobaje haoeibü huoneiyouei haoeibü ika khüpbülangbü haala- yaanglabü hoba haoeibü maanga hao kho yaangenlabü hoba haoen maang asangko kijinei haoei juong leilukulabü; haoei tokei Choba shuong thüka Choba khulimbo tokei lolabü lausikei müteibü ik ayoko hao leilulabü.

²⁶ Hobaje nangnak si ngeyang shanga mangsang lenbü kho tükde ki; lausikei nyi mangsang kho khinan phoashi, aishanga ho loulabü shangabü ki.”

²⁷ Hobaje ngo, Daniel, hüanshembei hoba chalou shisho shatko kikei, kheijinei ngo pikei hoba Chobaeibü kümsilei kümbei; lausikei mangsang khoei ngo phenyembei hoba aoeikei kho aditen.