DANIEL 5 - SAOPOBÜ LAI (BSI)

Belshazzar Chobaeibü Lemsilang

¹ Belshazzar Chobaei haoeibü songdak yaangenbü müt hajar che shanga lem yaangbü kümbei, hoba hajar thedanga ih yungkei.

² Belshazzarei ih yungan phaia haobou Nebukhadnezzarei Jerusalem lembü chem ka sungbabü hon hoba chandinam thung si phau shuong Choba hoba haoeibü yaangenbü shuong, haoeibü yaksishuong hoba haoeibü thangnyu shuongei khübünei yungla shanga sungbala sakkukei.

³ Kheijinei Jerusalem lembü chem ka jungan loubü honeibü thungsi- phau haoenei sungbakei; hoba Choba hoba haoeibü yaangenbü shuong haoeibü yaksi shuong hoba haoeibü thangnyu shuongei khünei yungkei.

⁴ Haoenei ih yungkei hoba hon, chandinam, chaksiam, namkung, bu hoba laang, mühghaü shuong nyen sangkei.

⁵ Kheijineitham müteibü ik che longkei hoba ikjishouei wanthung thedanga Chobaeibü chem kümthanga naangbüa dokei, hoba ikei dobü kho Chobaei hapbei.

⁶ Kheijinei Chobaeibü thenyek menthutham apbei, hoba hao maangmaukei, hoba haoeibü yousi ik nunutham apbei, hoba haoeibü youkük kakyokei.

⁷ Khaldibü huonseibü, seibüyaübü hoba khanshoulitshou tetbü leian loula Chobaei kaang ngekkei. Babilonbü hapbüngebü to Chobaei laukei, “Aoei ho dobü welaje hoba hoeibü tetlabü kü la lenlaje Chobaeibü nei neikulabü, hoba haoeibü ngüma honeibü yangmen yakkulabü hoba sanglea semboubü songdakbou yinglabü.”

⁸ Kheijinei Chobaeibü hapbüngebü pendou loukei, lausikei haoenei dobü kho aween ayingsi Choba la haoenei tetlabü kho alenen.

⁹ Kheijinei Belshazzar Choba aeibou maangmaukei hoba phaklaktham apbei hoba haoeibü yaangenbü shuong phenyembei.

¹⁰ Choba hoba haoeibü yaangenbü shuong lemensije Choba sao lemlibü chem khüto loukei hoba Choba saoei laukei, “O Choba, ponpen lang kishi, no maang temau, ayingsi no phaklaktham teyei.

¹¹ Kaibü sanglea saopobü Mühghaü soushou kia, hoba kaibü bou haanga hao to ngesakbü hoba ditenbü hoba songsido hapan kikei; hibü kaibü bou Nebukhadnezzar Chobaei sei lenbü, seibü yaübü Khaldibü hoba khanshoulitshou tetenbü thüka hao thükkabou yeitikei.

¹² Aieilausi Daniel, aola Belteshazar nyenkukei hao to soushou phang- che hoba hapbüngebü hoba ditenbü mangh tetenla, huphang ngüh tetenla hoba toknokbü apbula hau hao to kikei. Tou Daniel ngala hautiashi hoba haoei ka la tetlabü kho lenlabü.”

Danielei Dobü Wean Lenbü

¹³ Kheijinei Daniel Choba jungto leian loukei. Chobaei Daniel to laukei, “Kübouei Jihuda ka leian loubü Jihudabü langsenbou che kho no sai?

¹⁴ Ka to saopobü Mühghaü soushou kia, hoba ngesakbü hoba ditenbü hoba libünyenbü songsido ka to kia dogo kashanga ngei dida.

¹⁵ Hobaje tou hapbüngebü mütshuong hoba seibüyaübüei ho dobü haoenei wela hoba tetlabü kü la lenla shanga kü jungto leian loua; lausikei haoenei ho shanga tetlabü kü la alenen.

¹⁶ Nyi tetlabü kulabü hoba phenyembü apbula thükkei dogo ngei dida; tou nyi dobü kho wela hoba hoeibü tetlabü kü la lenla thükalonga Chobaeibü nei ka la neikulabü hoba honeibü yangmen kaibü ngüma yakkulabü hoba sanglea songdakbou semboubü yinglabü.”

¹⁷ Kheijinei Danielei Choba to jongaiko laukei, “Kaibü jongsak shuong kho kaibü yingshi hoba kaibü mu kho lubü la kushi; khei yingsikei dobü kho ngei Choba la wekukho hoba hao la tetlabü lenkho.

¹⁸ “O Choba, Thükenbou Mühghaüei kabou Nebukhadnezzar la sangle hoba yaangenbü, hoba soneikangbü hoba soumo kua.

¹⁹ Hobaje haoei hao khei yaangentibüei mütli shuong, phangshuong, hoba ngühyem pendou hao thedanga lühkei hoba hatkei; haoei haitimang sühbü haitikei, haoei phomang sühbü lang phokei, haoei tonenmang sühbü tonenkei, haoei yantimang sühbü yantikei.

²⁰ Lausikei ladang haoeibü maangpon yonglamlilikei, hoba haoeibü songsido kaangkhühtham apan hao maang lekei, kheijinei Choba setshang ka hao pekan apbei hoba haoeibü soneikangbü hao ka sungngaikei.

²¹ Hobaje hao müt yoka shian sattikei hoba haoeibü maangpon meisiau phatko yeitikei hoba Thükkabou Mühghaüei khunakshousi sangle thüka songdakda hoba haoei ao ong maangangda haoen kho thüka phokuda dogo haoei ange shongko masu tegü hao la sang shautikei hoba haoeibü manga nindei laktikei.

²² “Hobaje no haoeibü shou, O Belshazzar, ho pendou nyi ngeasikei nyi kaibü maangpon eaaoa ayei.

²³ Lausikei khuthükbü Bunyubou khulimbo no lolo lokei hoba haoeibü chema kibü thungsiphau ka jungto sungbakei hoba nyi kaibü yaangenbü shuong kaibü yaksi shuong hoba kaibü thangnyu shuongei khübünei ih yungkei, hoba nyi chandinam hoba hon, chisaknam, namkung, bu hoba laang, mühghaü shuong, laobouei ühüpda, aditda hoba angeda, khübü kho nyen sangkei, lausikei Mühghaü, aoeibü ika kaibü hak ki hoba kaibü lamthen pendou hao shangabü ki, nyi hao soneiakangti.

²⁴ Kheijinei hao jungka ik kho yantikei hoba dobü kho dokei.

²⁵ “Hobaje doan kibü kho ho: MENE, MENE, TEKEL PARSIN.

²⁶ Kho tetlabü kho ho; Mene, tetlabü, Mühghaüei kaibü sangle pakan chüha hoba kho thontia.

²⁷ Tekel, tetlabü, no sereta hauan chüha hoba seret along.

²⁸ Parsin, tetlabü, kaibü sangle jannyina hoba Medes si Persiabü la kua.”

²⁹ Kheijinei Belshazzarei ngühkhüm kukei hoba Daniel la Chobaeibü nei neikukei hoba haoeibü ngüma honeibü yangmen yakkukei, hoba sanglea hao songdakbü semboubü yinglabü dogo phinthonkei.

³⁰ Khüyou Khaldibü Chobaei Belshazzar haitian apbei.

³¹ Hobaje Mediabü Dariasei sangle kho sungletkei, ao salangbü po saosemto nyi thüng kikei.