DANIEL 4 - SAOPOBÜ LAI (BSI)

Nebukhadnezzareibü Nyiboubü Mangh

¹ Nebukhadnezzar Chobaei kaodaka kibü mütshuong, phang hoba ngühyem pendou to, “Kan yoa sangmai hakso yingshi!” dogo lauko ngühlang hautikei.

² “Thükkabou Mühghaüei kü aenei kümbü amaaphilabü hoba seikümseilei ngetila ngei maia dogo dambei.

³ “Haoeibü amaaphilabü shuong ailai yaangkei, hoba haoeibü seikümseilei shuong ailai hau yaangkei! Haoeibü sangle ponpen kibü sangle ki, hoba haoeibü songdak meten meten kida.

⁴ “Ngo Nebukhadnezzar, ngeibü chema haksoko ngeibü Chobaeibü chema naangmaiko kikei.

⁵ Ngei mangh che hapbei hoba khoei ngo moktikei, ngeibü yepshanga damanchühbü hoba ngeibü khua mangsangei ngo khonkutikei.

⁶ Hibü mangh tetlabü kho kü la ngetila shanga Babilona songnge donge pendou kü thedang to leian loula ngei ngühkhüm che kümbei.

⁷ Kheijinei huonseibü shuong, thulenbü shuong, Khaldibü shuong, hoba khanshoulitshou tetbü shuong loukei hoba haoen thedanga ngei ngeibü mang lenkei, lausikei haoenei kho tetlabü kü la alenen.

⁸ Lausikei phaila thonla Daniel, aoeibü nyen Belteshazar ngeibü mühghaüeibü nyenphai ka hoba aoto saopobü Mühghaüeibü soushou ki, hao kü jungto lotkei, hoba ngei ngeibü mangh ho tegü hao to lenkei.

⁹ O Belteshazar, thuseibü thüka Bunyubou Saopobü Mühghaü ka to kia, hoba huphang ngüh aikei ka thedanga sekbü aying dogo ngei ngesije ngei hapbü ngeibü mangh hoba kho tetlabü kü la lenshi.

¹⁰ “Ngo shena lengan kijinei ngeibü khua mangh kho ho tegü kikei. Ngei chühkei hoba chühashi, kaodak bunyua bulong che kikei hoba kho aeibou loubü kikei.

¹¹ Bulong kho yaangbünyu yeian kangkhühtham kikei, hoba kho kaodak thonshang pendou ka hapbo kikei.

¹² Khoeibü yik hemaian kikei hoba khoeibü buhek juong hoba khonei pendou shanga shausiyung kikei; yama meisiau shuong haoeibü yemekoubü phanga haksokei, hoba khoeibü bubheka aushuong shaikei hoba phe pendou ho ka sambo kikei.

¹³ “Ngeibü shen thüka ngeibü khua ngei chühkei hoba chühashi, lombou che hoba Saopobü che khuthük ka louyankei.

¹⁴ Haoei kaang ngekkei hoba laukei, ‘Bulong kho akashi, hoba haoeibü bhek wapan apashi, haoeibü yik nyaakletashi, haoeibü hekshuong phinphin aptiashi, kho phang ka meisiau shuong hoba haoeibü bhek ka aushuong sattiashi.

¹⁵ Lausikei haoeibü li si chungthem kaoa namkung si chisaknamei khühlepan yama nyemsang yoa apyoshi. “ ‘Hobaje kho mühkabü nindeiei nembo apyoshi hoba haoeibü phejan kaodakbü nyem yoa meisiau yoa kitishi.

¹⁶ Müteibü maangpon ka hao jakshaitiashi hoba meisiaueibü maangpon hao la kuashi, hoba hao thedang to nyetnei dantiashi.

¹⁷ Lombü shuongei janenbü ngühkhüm kho kia, hoba saopobü shuongei janenbüei sakkubü kho ki, khei Thükkabouei khunakshousi sangle thüka songdakla hoba kho haoei maangangbü la kuda, hoba kho thüka phangkabü mütshuong phokuda dogo lang kibü pendouei ngela shanga.’

¹⁸ “Ho mang ho ngo Nebukhadnezzar Chobaei hapbei, hoba no Belteshazar, nyi tetlabü ngetiashi, ngeibü sanglea songnge donge pendouei tetlabü kü la ngetila athükko kiasikei, nyije thükakei, aishanga Saopobü Mühghaüeibü soushou ka to kia.”

Danielei Mangh kho Tetenkukei

¹⁹ Kheijinei Daniel, aoeibü nyen Belteshazar kikei, longche phenyeman apbei; Chobaei laukei, “Belteshazar, mangh ayingsi kho tetlabüei no khontesak.” Belteshazarei laukei, “Ngeibü bunyubou, mangh kho no mangsenbü shuong shanga yingtishi, hoba tetlabü kho kaibü dangbou shuong shanga yingtishi.

²⁰ Nyi hapbü bulong laobou chingkei hoba kaangkhühtham kikei hotenei müh sühan kikei, hoba kaodak pendou ka hapbo kikei.

²¹ Laobou yik hemaian kikei, hoba khükabü hek shuong khübü pendou shanga shausiyung kikei, laobou phanga yamkabü meisiau shuong huda hoba bhek shuonga mühkabü aushuong pakshang kikei.

²² “O Choba, yaangenko hoba hau kiko kibü kho no, aishanga no yaangenbü müh sühko hoba kaibü songdak kaodak thonbü sühko kia.

²³ Hobaje müh ka lombou che hoba saopobü che louyenko laobou Chobaei hapbei, haoei laukei, ‘Bulong kho akashi, hoba mautiashi, khei yingsikei li si chungthem kho kaoa namkung hoba chisaknamei kaijembo yuklepan yama nyem alibü thüka ap- yoshi hoba hao mühkabü nindeiei nemtiko meisiau yoa kitishi.’

²⁴ “O Choba, tetlabü kho ho, hoba ho Thükkabou kabü ngühkhüm ngeibü bunyubou jungto loubü ki.

²⁵ No müt yo ka shian sattilabü hoba no yama meisiau yoa kilabü; hoba nyi masuei tegü sang shaulabü hoba mühkabü nindeiei nemlabü, hoba ka thüka jih nyet dantilabü; khunakshousi sangle thüka Thükkabouei songdakda hoba kho haoei maangangbü la kuda, dogo nyi angeshongko kho khei kilabü.

²⁶ Hobaje bulong chungthem li apyola sakkubü kho ho; khei khuthükbü Mühghaüei songdakda dogo nyi ngean phaia kaibü sangle maimaitham ka la kulabü.

²⁷ Hibü, O Choba, sanoudambo nyi ngeibü songsido sungletashi hoba saopobü kümbüei kaibü shabü shuong, hoba shalebü to onou lenbüei kaibü shedbü shuong pailetashi, aingenyu kheijinei kaibü naangmaibü süngshonlabü.”

²⁸ Ho pendou Nebukhadnezzar to loushadkei.

²⁹ Lit anthük nyiboubü thonlama Babilon Chobaeibü chemdaka hao paiko kijinei,

³⁰ Chobaei hao lolo laukei, “Ho Babilon yaangbü ho ngo Choba kishang aying lo?”

³¹ Chobaeibü sembunga ngüh kho kitoua khuthük ka ngüh che louyenkei, “O Choba Nebukhadnezzar, ho ka to lenda, ka ka sangle banga,

³² hoba no müt yoka shian sattilabü hoba kaibü kishang yam khongthu meisiau yoa kilabü; masu pongsu tegü no khonkuko sang shautilabü hoba khunakshousi sangle thüka Thükkabouei songdakda hoba kho haoei maangangbü la kuda dogo nyi ange shongko po nyet dantilabü.”

³³ Kheijineitham Nebukhadnezzar Choba thüka ngüh kho haüthükkei. Müt yoka hao shian sattikei, hoba masu tegü sang shaukei, hoba haoeibü mang mühkabü nindeiei nemshatko kikei, hoba haoeibü khulou aulueibü wi tegü hoba haoeibü yousen iksen aueibü yousen tegü yeikei.

Nebukhadnezzarei Mühghaü Nyensangbü

³⁴ “Chalou jihsiphai thonbüa ngo, Nebukhadnezzarei ngeibü nyek khuthük ae chühangtikei hoba ngeibü songsido kü jungto sepeinyu longeikei hoba ngei Thükkabou haükukei, hoba pon- pen lang kibou la ngei nyensang kukei hoba souhatkei. Aishanga haoeibü songdak ponpen thon akibü songdak hoba haoeibü sangle meten meten kida.

³⁵ Hao thedanga kaodaka kibü pendou aikei weko aki; khuthük hangangbü tan yoa hoba kaodaka kibü müt yoa haoei ai maangangda kho haoei kümda; hoba haoeibü ik senetla ayingsi hao to ‘Ai kümda,’ dogo laulabü ao aki.

³⁶ “Kheijineitham ngeibü songsido kü jungto sepeinyu longeikei, hoba ngeibü sangle soneikangbü shanga ngeibü soumo hoba ngeibü soumokakbü kü jungto sepeinyu longeikei hoba ngeibü songnge donge shuong hoba kü phanga yaangenbü shuong ngo lambo loukei, hoba ngeibü sanglea ngo setkei, hoba kü la jembophambo yaangenla jinyokukei.

³⁷ “Tou ngo Nebukhadnezzarei khuthükbü Choba sangda hoba souhatda, aishanga haoeibü kümsilei pendou tükde ki, haoeibü lamnyu maimaitham kia hoba aoyou lilisese paida haoei hao yantila thükakei.”