DANIEL 11 - SAOPOBÜ LAI (BSI)

¹ Hobaje tokei ngoje, Medebü Dairas shaangboubü poa hao senetla hoba hau kitila ngo lokei.

² Hobaje tou ngei ka la ngühmai kho lenlabü. Chühashi, Persiaa toukei Choba sem longlabü hoba leiboubü kho haoen pendou to keibou yinglabü hoba ladang hao nyaksinam danko hau kiko yeilaje haoei Grikbü Choba sangle khulimbo pendou tenseplabü.

Siria si Ijepbü Sangleshuong

³ “Hobaje Choba yaangbü che longlabü hoba songdak hao maangleko kilabü.

⁴ Hobaje ladang hao longlaje haoeibü sangle leilulabü hoba müh kabü yei pem lei la janan aplabü, lausikei kho haoeibü shousina jungto ohaulabü, ayingsi haoei songdakko kibü hau kho toukei akilabü, aishanga haoeibü sangle kho ngailanglabü, hoba khübü la aying lubü la kuan aplabü.

⁵ “Kheijinei yungthang kabü Choba hau kian kilabü, lausikei kongnyu yoa che hao tokei hau kibou yinglabü hoba hao toje haoeibü songdak yaangbou yinglabü.

⁶ Po shisho kian phaia haoen injung che la yeiko kamshailabü hoba yungthang kabü Chobaeibü nouyangshou yungkük Choba jungto sangmai kümla loulabü, lausikei saoeibü phem hau akiko kilabü ayingsi hao hoba hao ka bakbü hau lounyu akilabü, lausikei saoeibü himshuong hoba saoeibü jayangshou hoba saoeibü lao khümbo kulabü.

⁷ Lausikei saoeibü li ka shaangbou che haoeibü lin ka longlabü, haoeibü sepai tan khulimbo loulabü hoba yungkük lapheishon to atlabü hoba haoen to wapyoan thüklabü.

⁸ Tokei haoeneibü mühghaü shuong, haoen namdei leman kümbü heangsho shuong hoba haoeneibü chandinam si honeibü thung si phau shuong Ijep kaodak to haoen yoa haoei langsenlabü hoba po shishoje haoei yungkük Choba to awapyolabü.

⁹ Kho phaia hao chaang naphei sangle to loulabü hoba hao haoeibü kaodak to longeilabü.

¹⁰ “Hobaje haoeibü shousi shuongei wapyolabü hoba sepai tan yaangbü kamshaitilabü, hoba yungsen tegü danlabü hoba haoei sepeian khei lapheishon sühko wapyolabü.

¹¹ Hobaje yungthang kabü Chobaei hatlamoklabü che khauangko meimeijung haulabü hoba yungkük kabü Choba to wapyolabü hoba haoei sepai tan yaangbü lamlelabü, lausikei mütshuong yaangbü kho haoeibü ik to kuan aplabü.

¹² Hobaje ladang shuong kho thüklaje haoeibü maangpon yaangan aplabü hoba haoei hajar hajar yaangentilabü, lausikei haoei thük ühüplabü.

¹³ “Hobaje yungkük kabü Chobaei nyiboukei shaangbü toje sepai tan yaangbou leishailabü hoba po shisho kian peisilei juong yoto sepai tan yaangbü kho khulimbo meimeilabü.

¹⁴ Khübü chaloua yungthang kabü Choba khulimbo juong meimeilabü, hoba mangsang kho haüthükla shanga kan jembü mütli yoa kaangbüsekbü mütshuong longyolabü, lausikei haoen tuonglabü.

¹⁵ Kheijinei yungkük aekabü Choba loulabü hoba kao shongh yaülabü hoba maisho thangetan kibü sangnyu che lelabü. Hobaje yungthang aekabü sepai tanei hao khulimbo aloenlabü, haoen pienbü sepai taneikei lola hau akilabü.

¹⁶ Lausikei sangshibouei hao khulimbo ao akiko hao maangleko kümlabü hoba soneikangbü kaodaka lolabü hoba pendou kho haoeibü ika kilabü.

¹⁷ “Kheijinei haoeibü sangle hau pendouei yungkük kabü Choba khulimbo haoeibü thenyek yeilabü, lausikei hao to sangmai kümlabü hoba hao la yaksa shuongeibü nouyangshou haoeibü sangle leilutila kulabü, lausikei kho athük haplabü ayingsi hao shanga ku ayinglabü.

¹⁸ Kho phaia haoei yungko kaodak aeto haoeibü thenyek sepeilabü hoba juong lelabü lausikei konglebou cheei hao lilisese kho thaktilabü haü, hao yonglam lilibü kho hao jungto ngailabü.

¹⁹ Kheijinei haoeibü kaodak kabü lapheishon ae hao thenyek yeilabü, lausikei hao youa kühan tuonglabü hoba touje ühüplabü.

²⁰ “Hao jeila che longlabü; hao aoei khüm hebü che sangle soneikangbü danko hautilabü, lausikei chalou shisho kanglanga hao netla yeiko leilulabü, khauangbüa ayingsi lasona aying.”

Maang Amaibü Siriabü Choba

²¹ Hobaje khuthük hangangbüei shaknyinko lenla khangkei: “Hao jeila müt amaibü che longlabü, ao la sangle nyenhang aku, lausikei asang adoko kijinei hao loulabü hoba ngüh teibüei sangle haplabü.

²² Hao thedang ka sepai tan lemailela kotlanglabü hoba leilulabü, hoba thebülanbü Chobaeibü shou yoan leilutikulabü.

²³ Hobaje hao to injung che yeisilengko ka haoei khüpeilangeiko kümlabü aishanga hao müt shisho danko hau kiko yeilabü.

²⁴ Asangadoko kijinei provinsa keiboutham thükto hao loulabü hoba haoeibü bousi shuongei ayingsi pisi shuongei akümbü haoei kümlabü; haoen yoa haoei soletbü peisilei hoba peisilei maibü phinnyinlabü hoba lapheishon khulimbo huon amaibü taklabü lausikei jih tuisho shanga ong.

²⁵ “Hobaje yungthang kabü Choba khulimbo sepai tan yaangbüei wapyolabü, lausikei hao athüklabü, aishanga hao khulimbo huon amaibü taklabü.

²⁶ Haü, aoyouei hao yoa shausiyung maibü shauda haoenei hao yantilabü hoba haoeibü sepai tan koklanglabü hoba juong wapettilabü.

²⁷ Hobaje khübü Choba ham maangpon kombü kilabü hoba khümsok chenei setan lepbülangbü ngüh lauyolabü, lausikei kho ai ayinglabü, aishanga thonbü kho jih sühbüa kilabü.

²⁸ Kheijinei hao haoeibü kaodak to nyaksinam juong yoa ngailabü, lausikei haoeibü maangpon saopobü theyolanyobü khulimbo kilabü hoba hao maangleko ik shatlabü hoba haoeibü kaodak to ngailabü.

²⁹ “Jih sühbüa hao longeilabü hoba yungthang aeto loulabü; lausikei touje shaangbü tegü ayinglabü.

³⁰ Aishanga Kitimbü long shuong hao khulimbo loulabü, yingsije hao hatkomokko suklabü. “Hobaje hoba saopobü songle khulimbo khauanglabü hoba hao maang lelabü, hao khei sepeinyu satlabü hoba saopobü thebülanbü apyobü yoto che la yeilabü.

³¹ Hobaje hao ka sepai longan haoenei lemshang si lapheishon shatilabü hoba chalou weko juokbü lembü sunglanglabü. Hobaje leilutibü mangsenlabü haoenei pholabü.

³² Hobaje thebülanbü lulimbo amaibü kümbü shuong haoei ngüh teibüei suletlabü, lausikei aoyouei Mühghaü ngekei haoenei kaangkhühtham hoba maian kümlabü.

³³ Mütshuong yoa aoyou songsido ki haoenei juong lenlabü lausikei in hoba wanlongei haitiko thüngbüa hoba soshau soyungko chalou juong haoen tuonglabü.

³⁴ Ladang haoen tuonglaje, haoenei thuibü hansho haplabü lausikei juong haoen lolo ngüh teibü lauko haoen yoto loulabü.

³⁵ Hobaje songsido kibü yo ka atje tuonglabü hoba thonbü chalou sühko haoen thupaitila shanga hoba saüenla hoba hinseitila shanga haoen tuonglabü, aieilausi kho takletbü jih toukei asühkei.

³⁶ “Hobaje Chobaei haoei maangangbü tegü kümlabü, hoba hao jembü lolo hangenlabü, hoba mühghaü shuong thüka Mühghaü to limbo maangpanglabü laulabü hoba leilubü akou shongko hao haalayaanglabü, aishanga lamlean phobü kho haüthükjan.

³⁷ Haoei pisiboueibü mühghaü shuong ayingsi yaksa shuongei sanoubü mühghaü shuong aikei aweeilabü, ai mühghaü tokei ühütlabü, aishanga pendou thüka haoei hao lolo yaangenlabü.

³⁸ Lausikei khübü jeiko lapheishon mühghaü hangenlabü hoba mühghaü ao haoeibü pisibousi shuongei ange, hao to hon, chandinam, namseklaang hoba jongsak maibüei tonenlabü.

³⁹ Pendou to hau kibou lapheishon shuong kho küksithangeibü mühghaü lembü la haoei lomtilabü, hoba aoyouei kho mühghaü sungletlaje haoen haoei hangenlabü. haoei juong thüka haoen songdakbou yeitiko haoen la jongsak shanga kao janan kulabü.

⁴⁰ “Thonbü chaloua yungthang kabü Chobaei hao to jaanglabü, lausikei yungthang kabü Chobaei hao khulimbo mühghaü yei che tegü kailong shuong hoba koli sepai shuong hoba longchem juongnyu yoa loulabü hoba hao kaonyek danko yungsenei tegü kuan apjung danlabü.

⁴¹ Hao tokei soneikangbü kaodak to atlabü hoba hajar hajar tuonglabü, lausikei khübü haoeibü ikei khümenlabü: Edom, Moab, hoba Amonbü shousi shuong yoa kongnyubou.

⁴² Tokei haoei kaonyek shuong thüka haoeibü ik shinglabü hoba Ijep kaodak asatenlabü.

⁴³ Lausikei Ijep kaodak kabü hon, chandinam, hoba namsek peisilei shuong thanshang pendou thüka hao bunyu yinglabü. Hobaje Libiabü hao phainei pailabü.

⁴⁴ Lausikei chaang si yungkük kabü ngühlang shuongei hao mokde apyolabü, hoba khau aeibou angko mautilabü hoba lemailela juong shian apla hao haulabü.

⁴⁵ Hobaje haoei haoeibü Chobaeibü neichem yungnyu si soneikangbü saopobü shongh kanglanga kümlabü, khei yingasikei hao haoeibü thonbü sühlabü hoba aoeikei hao to athuilabü.”