DANIEL 10 - SAOPOBÜ LAI (BSI)

Danieleibü Mangsang Tigris Shumang junga

¹ Persiabü Choba Sairas po semboubüa Daniel, aoeibü nyen Belteshazar kikei, hao jungto haoeibü ngüh tang khitkei, huphangngüh kho tükde kikei hoba kho wapyo yaangbü che shangabü kikei, hoba haoei ngüh kho ditenkei hoba mangsang kho tetenkei.

² Khübü chaloua ngo, Daniel, bale sem sünga manghaapbo kikei.

³ Ngei shausiyung maibü aikei ashau, ayingsi ngeibü sembunga ih thenan achüh, ayingsi bale sem aon shongko ngei khua ai onang anaang.

⁴ Kho phaia shaangbou lit chalou saoto leiboubüa ngo shumang yaangbü Tigris yungkoa loan kikei.

⁵ Ngeibü nyekei chüh- an angtikei, hoba chühkei, hoba chühashi, müt che phemba nei neian kikei, hoba haoeibü shenshang ofir hon maibüei shembe kaian kikei.

⁶ Haoeibü mang beril namsek laang tegü lailaibü, haoeibü thenyek langpon tegü hoba haoeibü nyek hantin ninbü tegü hoba haoeibü you si ik samsilengkobü chisaknam tegü lailaitham hoba haoeibü ngühang shuong yaangbüeibü ngühang hima kikei.

⁷ Hobaje ngo, Danielei ong mangsang kho hapbei, aieilausi kü yoa kibü mütshuongei mangsang kho ühüp, lausikei haoen aeibou lühkei hoba haoen kho hula satkei.

⁸ Hibü ngo ong apyokei, hoba kho mangsang yaangbü hapbei, hoba ngo hau akiko apbei hoba ngo thenyek saklangtham apbü maian apbei hoba hau akiko apbei.

⁹ Kheijinei ngei haoeibü ngüh ditkei hoba haoeibü ngüh ditjinei ngeibü thenyek kaoae khüpetkei hoba ngo haileleko ngakkei.

¹⁰ Hobaje chühashi, ik cheei kü to meitikei hoba ngeibü youkük si ik lühkei.

¹¹ Hobaje haoei kü to laukei, “O aeibou maangshikbü Daniel, ngei ka to lenbü ngüh shuong ditashi, hoba tangshaitham loashi, aishanga tou ngo ka jungto hautiakei.” Hobaje haoei habü ngüh laujinei ngo lühjilühko lokei.

¹² Kheijinei haoei kü to laukei, “Tehüt, Daniel, aishanga shaanglathama Mühghaü thedanga ditenla shanga nyi kaibü maang- pona maangdakbü hoba sembüambü jihsiphai ka kaibü welau dida hoba nyi joyobü ka ngo louakei.

¹³ Chalou saoto che sühko Persia sangle Chobaei ngo thangetkei, lausikei thükkabou hangangbü yoa che, Maikhel kü to thuila loukei hibü khünei hao Persia sangle Choba yoa apyoan ngo loukei.

¹⁴ Phaia kaibü mütli shuong to ai haüthükla kho ka la ditentila ngo loukei, aishanga mangsang kho loulabü jihsiphai shanga ki.”

¹⁵ Hobaje ladang haoei kü la habü ngüh lenkei, ngei ngeibü thenyek kaoae khüpjung atkei hoba ngo ngoubü la yeikei.

¹⁶ Hobaje chühashi, müteibü shou phatbü cheei ngeibü sembung khopa meitikei kheijinei ngei ngeibü sembung ipbei hoba laukei, hoba kü thedanga loan kibü to ngei laukei, “Ngeibü Bunyubou mangsang danko ngo khonsakei süha hoba ngo hau akiko apa.

¹⁷ Hibü ho ngeibü bunyu khangenbouei ngeibü bunyu to lai joyoenkei? Aieilausi kü to hau hansho ongkei aki, ayingsi kü la hak ajoukei.”

¹⁸ Tokei müteibü hesihaang phatan müt cheei louan kü to meitikei hoba haoei ngo hau kitikei.

¹⁹ Hobaje laukei, “O aeibou maangshikbü müt, tehüt, ka yoa hakso kishi hau kiashi, hoba maangkaangashi.” Hobaje haoei joyoan phaia ngo hau kingaikei, hoba ngei laukei, “Ngeibü bunyubouei lautiashi, aishanga nyi ngo hau kitia.”

²⁰ Kheijinei haoei laukei, “Ngo aila loukei nyi ngekeilao? Lausikei tou ngo Persia Choba to wapyola ngailabü, hoba ladang ngo ngailaje, chühashi, Grikbü Choba loulabü.

²¹ Lausikei ngühmai lea ai doan ki ngei ka la lenlabü khübü khulimbo kü to thuiyola kaibü Choba Maikhel to limbo lubü ao aki.”