प्रकाश 19 - चेपाङ1 ओहाङःसैको लाङ्कासै नाःतो हुम्ओ मान्तालम्कोः हाव्नयःलो लेखा सायःआलाङः “ङीकोः परमेस्वर्कायः ताङ्ह्ताक्तीलेः तोपाःथै। ओउःपाय् सबै दल्ताक्सा ग्वम् नाःओमा ताङ्ह्ओ परमेस्वर् लेःआः बा। 2 ओउःकोः तय्छनःती योओमा न्युम्ह्ताक्ती बयःओ काम्लम् दोङ् पेओ लेःआः। दोह् हायःती दाय्ह्सा ओउः ल्हाव्ह्दैबाङ्हाङः मुओलम्कायः रेव्ताक्ओ ताङ्ह्ओ ल्हास्याकायःपाय् परमेस्वर्इ न्युम्ह्ताक्आकान्। ओउः ल्हास्याइपाय् परमेस्वर्कोः काम् जाङ्ह्ओलम्कायः सात्आकान् त झ्यान्ते ओउःकायः परमेस्वर्इ न्युम्ह्ताक्आथै” त दाय्ह्ती ओउःमयः दाय्ह्आकाय्। 3 ओहाङःसैको “लौ परमेस्वर्कायः ताङ्ह्ताक्तीलेः तोपाःथै। ओउः सहर्कायः माक्ती जेःओ म्हेःकोः कुःओपाय् गलकायःमा त्यावःताङ् लन्ह्धैलेः मुनाः” त दाय्ह्ती दाय्ह्आकाय्। 4 ओउः चौबीस् थालवःपालम्मा ओउः चार्गोता जीङः नाःओलम्मा ओउः राजाकोः थाव्हाङः च्युङःओ परमेस्वर्कायः मानआकानी “माः ओउःतलेः स्याव्पाः। परमेस्वर्कायः ताङ्ह्ताक्तीलेः तोपाःथै” त दाय्ह्ती लुङ्तीलेः तोआकानी। 5 ओहाङःसैको ओउः राजा च्युङःसा थाव्सै यात्ज्योः हाव्नयः वाङ्ती “लौ नीङ् परमेस्वर्कोः काम् जाङ्ह्ओलम्य नीङ्पाय् ताङ्ह्ओलम्मा मीओलम्मा सुसु परमेस्वर्कः एङःतीलेः मुनै सबैइ ओउःकायः ताङ्ह्ताक्नु दा” त दाय्ह्ती दाय्ह्ओ खेःतो। 6 ओउःत दाय्ह्आक्तीको नाःतो हुम्ओलम्कोः हाव्नयः क्लोनःती ल्हक्अर्ओ तीःलो लेखामा न्याम् मुक्ओलो लेखामा सायःआलाङः “लौ परमेस्वर्कायः ताङ्ह्ताक्तीलेः तोपाःथै दोह् हायःती दाय्ह्सा ङीकोः ग्वम् नाःओ प्रभु परमेस्वर्पाय् सबैकोः राजालेः मुनाः। 7 द्याह् म्रोतोमा चोङाय्तोमा स्याव्ती परमेस्वर्कायः ताङ्ह्ताक्नी दा दोह् हायःती दाय्ह्सा ओउः भेदाकोः चोःकोः बीहा जाङ्ह्सा दीन्पाय् दाह्ओ लेःआः बा। ओउःकोः वानःसा कमापाय् चीङ्धै मुलेःजेःनाः। 8 ओउः कमा लावसाकायः पेओ जुगाङ् छीःमालो भाम्ओ नाय्लम् बयःओ लेःआः” त दाय्ह्ती दाय्ह्आकाय्। ओउः नाय्लम् त तोसापाय् परमेस्वर्कोः मान्तालम्इ जाङ्ह्ओ पेओ काम्लम् लेःआः। 9 ओहाङःसैको ओउः ल्होक्ओमयः ङाकायः तोती “लौ ‘ओउः भेदाकोः चोःकोः बीहा भोस्हाङः गोत्ओलम्पाय् चोङाय्तोलेः स्याव्नै’ त दाय्ह्ओ लेखउ दा” त दाय्ह्ती ओउःइ ङाकायः तोआताङः “माः है ओउःपाय् परमेस्वर्इ नोःओ दोङ् कुरा लेःआः बा” तमा ओउः ल्होक्ओमयःइ दाय्ह्ती तोआताङः। 10 ओउःत सायःआक्तीको ङाइ ओउःकायः मानसाकायः ओउःकोः दोम्हाङः बाःती स्यवखयःङोतो “इत हायःलाम्। नाङ्कुस्मा नाङ्कोः येसुइ छ्यानःओ दोङ् कुराकायः ङ्हाम्ओ पुःचोङ् हौचोङ्लम्कुस्मा ङा परमेस्वर्कोः काम् जाङ्ह्ओचाक् लेःआः ङ। परमेस्वर्कायःलेः मानउ दा” त दाय्ह्ती तोआताङः। दोह् हायःती दाय्ह्सा येसुइ छ्यानःओ दोङ् कुरामा अरु परमेस्वर्कोः कुरा छ्यानःओलम्इ तोओ कुरामा यातैज्योः लेःआः बा। 11 ओहाङःसैको लाङ्का फोल्ओलेः च्यवःआलाङः। ओहाङः यात्ज्योः भाम्ओ घोरा मुओ खेःतो। ओउः घोरा लन्ह्ओचाक्पाय् “दोङ् ङ्हाम्सीःओ” त तोओ लेःआः। ओउःइपाय् पेतोलेः तय्छनःती योमानौ परमेस्वर्कोः बीरोत्लम्कुस् मीन्ह्काय्ती पेतोलेः क्लीमःमानौ। 12 ओउःकोः मीक्पाय् ल्युङ्ह्ओ म्हेःलो लेखा प्लीङ्ह्आ तालाङ्हाङः नाःतो मुकुत् ल्हुप्ओ खेःतो। ओउःकोः आङ्हाङः अरुइ चीःसा खाय्मालो मय्ङ् लेखओ खेःतो ओउः मय्ङ्पाय् ओउःइ ह चीःलेःनौ। 13 ओउःकोः क्रमःनाय् वयःहाङः जोःओ खेःतो। ओउःकोः मय्ङ्पाय् “परमेस्वर्कोः नोःराय्” लेःआः। 14 ओउःकायः गुल्ह्ती लाङ्काकोः पल्तन्लम् भाम्ओ घोरालम् लन्ह्ती वाङ्आकाय्। ओउःमयःमा पेओ छीःमालो भाम्ओ नाय् लावआकायःइसी। 15 ओउः ङ्हा वाह्ओचाक्कोः म्होतोङ्सै व्हानःओ तरवाल् ग्ल्युङ्ह्ओ खेःतो ओउः तरवाल्इ ओउःइ जात् जात्लम्कायः क्लीमःती जुगाङ् जोक्ओ ल्हुङ्इ ओउःइ राजालो लेखा हुकुम् बयःनाःथास। सुसुकः ओउः ग्वम् नाःओ परमेस्वर्पाय् आन ल्हुङ् मल्ह्तो स्याव्नै ओउःमयःकायः ओउः ङ्हा वाह्ओचाक्इ न्युम्ह्ताक्नाःथास। 16 ओउःकोः नाय्हाङःमा प्लेक्हाङःमा “राजालम्कोः राजालेः प्रभुलम्कोः प्रभुलेः” त दाय्ह्ती यात्ज्योः मय्ङ् लेखओ खेःतो। 17 ओहाङःसैको यात्ज्योः ल्होक्ओमयः न्याम्हाङः चीङ्ती मुओ च्यवःआलाङः। ओउःपाय् सबै अलवःहाङः स्युङ्ती वाह्ओ वाःलम्कायः सोतोलेः गोःती “लौ वाङ्न दा। परमेस्वर्कोः ताङ्ह्ओ भोस् जेःलाङ् हुमःती वाङ्न। 18 राजालम् सेनापती हवल्दार् सीपाही घोरा घोरा लन्ह्ओमयः सबैकोः आङ्कोः मायः जेःलाङ् वाङ्न। ताङ्ह्ओ मान्ताकोःमा मीओ मान्ताकोःमा काम् जाङ्ह्सा नोकरी खेःओलम् काम् जाङ्ह्सा खेःमालोलम् सबैकोः मायः जेःलाङ् वाङ्न” त दाय्ह्ती ओउः ल्होक्ओमयःइ तोआकान्। 19 ओहाङःसैको ओउः तीःसै थाओमा ल्हाव्ह्दैबाङ्कोः राजालम्मा ओउःमयःकोः पल्तन्लम्कुस् मीन्ह्काय्लाङ् चीङ्ती हुम्ओ च्यवःआलाङः। ओउःमयःइपाय् ओउः घोरा लन्ह्ओचाक्कुस्मा ओउःकोः पल्तन्लम्कुस्मा मीन्ह्काय्सा बोङःनानी। 20 मीन्ह्काय्लाङ् वाङ्तोक्हाङः ओउः तीःसै थाओकायःमा ओउःकुस् वाह्ओ माःओ कुरा छ्यानःती तोओचाक्कायःमा चुम्आकानी। ङ्हापाय् ओउः माःती तोओइपाय् ग्याङ्ह्राय् जाङ्ह्ती ओउः तीःसै थाओकोः चीन्ह आङ्हाङः नाःओलम्कायःमा ओउःकोः मुर्तीकायः मानओलम्कायःमा ब्रःताक्ती थ्योन्ह्ओ खेःतो। ओहाङःसैको चुम्आक्तीको ओउः तीःसै थाओमा ओउः माःती तोओमा ओउःनीस्पाय् सेलः मुतोक्हाङः म्हेः ल्युङ्ओ गन्धक् नाःओ दुम्हान्हाङः तोस्ती वाय्ओ खेःचतो। 21 ओउःनीस्कुस् वाह्ओलम्कायः ओउः घोरा लन्ह्ओचाक्कोः म्होतोङ्सै ग्ल्युङ्ह्ओ तरवाल्इ सात्ओ खेःइतो ओहाङःसैको ओउःमयःकोः म्हाङ्कोः मायःपाय् वाःलम्इ कोस्तोलेः जेःआकानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.