प्रकाश 16 - चेपाङ1 ओहाङःसैको मन्दीर्सै ङाइ सोतो हाव्नयः सायःआलाङः “लौ ल्हाव्ह्दैबाङ्हाङः ओउः सात् मानाहाङः मुओ परमेस्वर्कोः ल्हुङ् मल्ह्ओपाय् पुह्नु” त दाय्ह्ती ओउः सात्गोता ल्होक्ओमयःकायः तोओ खेःतो। 2 ओउःत तोआक्तीको ओउः स्यालःओ ल्होक्ओमयः आल्ती ओउःकोः माना ल्हाव्ह्दैबाङ्हाङः पुह्आकान्। ओउःकोः माना पुह्आक्तीको ओउः तीःसै थाओकोः चीन्ह लात्ओलम्कायःमा ओउःकोः मुर्ती मानओलम्कायःमा आङ्हाङः आन पेमालो चालम् थाआकाय्। 3 ओहाङःसैको ओउःकायः गुल्ह्ती यात्ज्योः अरु ल्होक्ओमयः द्युम्मालो तीःहाङः ओउःकोः माना पुह्ती काआकान्। काआक्तीको ओउः तीःपाय् सीओ मान्ताकोः वयःलो लेखा स्याव्आ। इत स्याव्आक्तीको ओहाङः मुओ जीङः नाःओ जात्लम् सबैलेः सीजेःआकाय्। 4 ओहाङःसैको ओउःकायः गुल्ह्ओ ल्होक्ओमयःइ ओउःकोः माना पुह्ती तीःलम्हाङःमा तीःकोः सीगाङ्हाङःमा काआकान्। काआक्तीकोपाय् ओउः तीःलम्पाय् सबै वयः स्याव्आ। 5 ओहाङःसैको तीःलम्कायः योती गम्ओ ल्होक्ओमयःइ दाय्ह्ओलेः हाव्नयः सायःआलाङः “लौ नाङ् द्याह्लेः मुओ ङ्हामा खेःओ छय्ङ्ओचाक्य नाङ्इ न्युम्ह्ताक्ती जाङ्ह्ओपाय् पेओ लेःआः बा। 6 परमेस्वर्कोः मान्तालम्कायःमा ओउःकोः कुरा छ्यानःती तोओलम्कायःमा इ मान्तालम्इ सात्ती ओउःमयःकोः वयः होताक्आकानी ओउःत झ्यान्ते ओउः मान्तालम्कोः पेमालो हायःझ्याङ्कोः नाङ्इ ओउःमयःकायः वयः तुङ्सा बयःतेःनौ। ओउःपाय् स्याव्लेःनाः” त दाय्ह्ती ओउः लाङ्काकोः ल्होक्ओमयः दाय्ह्आ। 7 ओउः दाय्ह्आक्तीको बेदीसै यात्ज्योः हाव्नयः सायःआलाङः “अ नाङ् ग्वम् नाःओ प्रभु परमेस्वर्य दोङ्सीलेः नाङ्इ न्युम्ह्ताक्ती जाङ्ह्ओपाय् दोङ् पेतो लेःआः बा” त दाय्ह्ती दाय्ह्ओ खेःतो। 8 ओहाङःसैको सुम्ज्योः वाङ्आक्तीको यात्ज्योः अरु ल्होक्ओमयःइ वाङ्ती ओउःकोः मानापाय् न्याम्हाङः ल्हुक्आकान्। ल्हुक्आक्तीको न्याम्कोः रौदइ मान्तालम्कायः आन रावःती य्हुमःताक्सा खाय्ओ खेःतो। 9 य्हुमःआक्तीको मान्तालम्इ ओउः महामारी वानःसामा ल्होक्सामा खाय्ओ परमेस्वर्कोः मय्ङ्कायः प्रनःआकानी। ओउःकायः प्रनःनीतो लयःकोः पेमालो काम्लम् फेती परमेस्वर्कायः ताङ्ह्ताक्ती मानसा ओउःमयः ग्याइली। 10 ओहाङःसैको प्लैज्योः वाङ्आक्तीको यात्ज्योः अरु ल्होक्ओमयः वाङ्ती ओउःकोः माना ओउः तीःसै थाओकोः राजा च्युङःसा थाव्हाङः ल्हुक्आकान्। ओउःत ल्हुक्आक्तीको ओउःकोः राजी जुगाङ् च्याक्तोलेः स्याव्आ। मान्तालम् ओउःच्युक् जीक्ती झ्यान्ते ओउःमयःइ सय्क् ङ्हीक्आकायःइसी। 11 आने परमेस्वर्इ ओउःमयःकोः जीक्ओ चालम् बयःती झ्यान्ते ओउःमयःइ परमेस्वर्कायः प्रनःआकानी लयःकोः पेमालो काम्लम् फेनीली। 12 ओहाङःसैको पोङाज्योः वाङ्आक्तीको यात्ज्योः अरु ल्होक्ओमयः वाङ्ती ओउःकोः मानापाय् ओउः युफ्रातेस् त तोओ ताङ्ह्ओ खोलाहाङः पुह्ती काआकान्। ओहाङः पुह्ती काआक्तीको ओउः खोलाकोः तीः सीप्ती ज्याल्जेःआ। तीः ज्याल्आक्तीको “ओउः सीप्ओ खोलापाय् दाह्न्याम्सै वाङ्सा राजालम्कायः वाह्सा ल्याम् स्याव्पाः” त दाय्ह्ती सीप्ताक्ओ खेःतो। 13 ओहाङःसैको सुम्ज्योः रेव्तो क्रीसीःओ तोक्राक्लो लेखा लान्लम् च्यवःआलाङः। ओउः लान्लम्पाय् ओउः ताङ्ह्ओ नाक् रुकोः म्होतोङ्सैमा ओउः तीःसै थाओकोः म्होतोङ्सैमा ओउः साःसै थाओ माःती स्यान्ओकोः म्होतोङ्सैमा थाती वाङ्आकाय्। 14 ओउःमयःपाय् लान्लम्कोः लेःआः इ। ग्याङ्ह्राय् जाङ्ह्ती ल्हाव्ह्दैबाङ्हाङः ब्याह्ती वाह्ती सबै ओहाङःकोः राजालम्कःताङ् दाह्ती वाङ्ती “लौ ङीकुस् वाङ्ती मीन्ह्काय्लाङ् हुम्न दा” त दाय्ह्ती ओउः ग्वम् नाःओ परमेस्वर्कोः ताङ्ह्ओ वाङ्सा खेःओ दीन्हाङः सबै राजालम् हुम्सा बोङःनानी। 15 “लौ ङापाय् चोर् वाङ्ओलो लेखा दाह्नाङः बा। सुसु म्र्यातीलेः मुती ओउःकोः नाय्लम् र्ययःतोलेः गम्नानी ओउःपाय् चोङाय्तोलेः स्याव्नाः। ओहाङःसै ङा दाह्ती वाङ्तोक्हाङः ओउःपाय् मान्ताकःहाङः सोह् वाह्ती रास्सा परल” त दाय्ह्ती प्रभु दाय्ह्आ। 16 ओहाङःसैको राजालम्कायः ओउः लान्लम्इ यातै थाव्हाङः हुम्ताक्नाःथास। ओउः थाव्पाय् हेब्रैनी भासाहाङः “हार्मेगीदो” त तोओ लेःआः। 17 ओहाङःसैको ओउः लोनेकोः ल्होक्ओमयः ओउःकोः मानापाय् अलवःहाङः पुह्आकान्। ओउःकुस् थेङ्ती सात्गोता वाङ्ओ खेःतो। ओहाङःसैको ओउःकोः माना पुह्आक्तीको ओउः मन्दीर्हाङः मुओ राजा च्युङःसा थाव्सै यात्ज्योः सोतो हाव्नयः वाङ्ती “लौ द्याह्पाय् द्योक्जेःआ बा” त दाय्ह्ती दाय्ह्आ। 18 ओउःत दाय्ह्तोक्हाङः आन न्याम् प्लीङ्ह्ओमा न्याम् मुक्ओमा ङुह्र्ओमा वाङ्आ आन ताङ्ह्ओ ल्याङ्मा वाङ्आ। ओउःच्युक् ताङ्ह्ओ ल्याङ्पाय् मान्ताकायः जापीनःती न्यास्तोक्हाङःसै गलमा वाङ्आक्ल ओउःपाय् सबैसै पेमालो ल्याङ् लेःआः बा। 19 ओउः ल्याङ् वाङ्आक्तीको ओउः ताङ्ह्ओ सहर्पाय् सुम् भाक्कायः वाक्ओलेः खेःतो सबै देस्कोः सहर्लम्पाय् ह्र्योङःती वाय्ओ खेःतो। ओउः ताङ्ह्ओ बाबीलोन् त तोओकोः पेमालो जाङ्ह्ओ कुरामा परमेस्वर्इ गीलती आन ल्हुङ् मल्ह्तोलेः स्याव्ती जुगाङ् दप्ताक्तोलेः न्युम्ह्ताक्आकान्। 20 ओहाङःसैको सबै तीःइ तोङःओ देस्लम् तीःइ क्ल्युम्ती ज्याल्ओ खेःतो स्यालुङ्लम् सबै मीह्ती वाय्ओ खेःतो। 21 ओहाङःसैको यात् मौन्च्युक् लीःओ वेर् मान्ताकःताङ् ग्लेःआ। ओउःच्युक् रैसीःआ महामारी वाङ्ती झ्यान्ते मान्तालम्इ परमेस्वर्कायः प्रनःआकानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.