हेब्रैनी 2 - चेपाङ1 ओउःत झ्यान्ते ङीइ सायःओ परमेस्वर्कोः कुरा पेतोलेः ल्हुङ्हाङः सेती गम्सा खेःतो ओहाङःसैको ङी ओउःकोः दोङ् पेओ ल्याम्कायः फेतय्ह्नीली। 2 दोह् हायःती दाय्ह्सा ओउः लाङ्काकोः ल्होक्ओमयःइ तोती बयःओ कुरापाय् दोङ् सायःसा खेःओ कुरा खेःतो। सुसुइ ओउः कुरा सायःसा ग्यामाःत झ्यान्ते जाङ्ह्नीली ओउःपाय् लोने न्युम्ह्तोलेः स्याव्नै। 3 ओउः लाङ्कामयःइ बयःओ कुराखे सायःमालोलम् न्युम्ह्आकाय् त खेःया न्हाङ्तोलेः परमेस्वर्कोः चोःइ बयःओ ताङ्ह्ओ दल्ताक्सा कुराखे ङीइ सायःसालेः खेःतो बा उया ङीइपाय् गलमा दल्तो स्याव्तय्हीली बा। ओउः दल्सा कुरापाय् प्रभु येसुइ ङ्हासै तोआकान् ओहाङःसैको ओउःइ तोआक्तीको ओउःकायः सायःओ मान्तालम्इमा ङीकायःपाय् पाःतीलेः तोआतय्ही। 4 परमेस्वर्इमा ओउःकोः ग्वम्इ आन पेओ ग्याङ्ह्राय्लम् जाङ्ह्ती येसुकोः कुरा “दोङ् कुरा लेःआः” तमा पाःती छ्यानःआकान्। ग्याङ्ह्राय्मा जाङ्ह्माआकान् ओउःइ लयः झाक्तीलेः लयःकोः ग्वालामःइ पेओ कुरालम् वेःताक्माआकान्। 5 ओउः वाङ्सा खेःओ ल्हाव्ह्दैबाङ्कोः राजीहाङः हुकुम् बयःसा थेङा परमेस्वर्इ लाङ्काकोः ल्होक्ओमयःखेकायः छ्युङ्ह्ती गम्उलु मान्ताखेकायः छ्युङ्ह्ती गम्आकान्। ओउः राजीकोः कुरा ङी द्याह् तोनाङःसु। 6 ओउःकोः आखरःहाङः इ परमेस्वर्कायः तोओ कुरा मुनाः “लौ मान्ताकोः जात्पाय् दोह्लो खेःनाः दाय्ह्सा नाङ् मान्तालम्कायः ल्हुङ् र्याङःतीतेः मुतेःनाः बा दोह् हायःतीतेः ओउःकायः एत पेतोलेः योनःतेःनौ र। 7-8 मान्तापाय् लाङ्काकोः ल्होक्ओमयःसै बल मीतो गम्तेःउतो लोनेः ओउःकायः आन पेतोलेः राजालो लेखालेः ताङ्ह्ताक्ती सबै थोक्कायः पुःतेःताक्तेःआकान्” त दाय्ह्ती दाय्ह्ओलेः मुनाः। मान्ताकायः परमेस्वर्इ “सबै थोक्कोः हुकुम् बयःसाकायः गम्तेःआकाय्” त दाय्ह्ओआः ओउःत झ्यान्ते मान्तापाय् सबै थोक्कायः हुकुम् बयःसा खेःलेःनाः। तेन्छ्याङ्पाय् एतलेः स्याव्धाङ्ल मान्ताकोः जात् सबै थोक्कायः हुकुम् बयःसा खेःधाङ्ल। 9 मान्ताकोः जात्खे एत खेःधाङ्ल येसुखे एत हुकुम् बयःसा राजा स्याव्ओलेः च्यवःनाःतय्ह्नी। ङ्हालेः येसुपाय् लाङ्काकोः ल्होक्ओमयःसै बल मीतो स्याव्तो ओहाङःसै परमेस्वर्इ मान्तालम्कायः योनःती योती झ्यान्ते येसु ओउःमयःकायः दल्ताक्साकायः ल्हाङःती सीलेःआ। ओउः सीआ त खेःओ द्याह् ओउःपाय् राजालो लेखालेः आन पेतो ताङ्ह्तोलेः स्याव्ओ त च्यवःनाःतय्ह्नी। 10 परमेस्वर्इपाय् सबै थोक् जाङ्ह्आकान् ओउःकायः सबै थोक् मुलेःनाः ओउःत झ्यान्ते ओउःइ नाःतो मान्तालम् लयःकोः चोः जाङ्ह्तोक्हाङः ओउःकुस् ताङ्ह्तोलेः स्याव्ताक्सा थेङा ओउःमयःकायः स्यालःओ येसुकायः लीह्सीःओ गोरःधार्नालेः परमेस्वर्इ नीङ्ताक्आथै। ओउःत हायःसा स्याव्ओ लेःआः। 11 ओउः मान्तालम्कायः रेव्ओसै छय्ङ्ताक्सा येसुकोः आपामा ओउःइ छय्ङ्ताक्ओ मान्तालम्कोः आपामा यातैज्योः लेःआः। ओउःत झ्यान्ते ओउः छय्ङ्तो स्याव्ओलम्कायः येसुइ “हौ” त सोकार्तोलेः तोनाःथास। 12 ओउःइ इतलेः आखरःहाङः दाय्ह्आ “अ परमेस्वर्य नाङ्कोः कुरापाय् ङाइ ङाकोः हौलम्कायः छ्यानःनाङःसु। सबै हुम्ती थनःलाङ् वाङ्ओलम्कःहाङः नाङ्कायः ङाइ माननेःनाङ्” त दाय्ह्ती येसुइ तोआकान्। 13 फेरी “परमेस्वर्कायः ङाइ जुगाङ् ङ्हाम्लेःनाङः” तमा ओउःपाय् दाय्ह्आ “लौ परमेस्वर्इ ङाकायः ल्हाओ हौलम्कुस् ङापाय् इहाङः मुलेःनाङः” तमा दाय्ह्ती दाय्ह्आ। 14 ओउःकोः हौलम् त तोओपाय् सास् नाःओ वयः नाःओ खाल् खेःलेःनै ओउःत खेःओ येसुमा ओउःमयःलो लेखालेः थाङ्ती मान्तालेः स्याव्आ। ओउःत स्याव्आक्तीको ओउःकोः सीधार्नालेः येसुइ सीताक्सा ग्वम् नाःओ सैतान्कायः क्लीमःती वाय्सामा खाय्ओ खेःतो। 15 मान्तालम् लयःकोः सेलः मुच्युक्हाङः सीओकः रैनै सैतान्कायः क्लीमःधार्नालेः येसुइ ओउःमयःकोः रैओकायः जुगाङ् फेताक्सामा खाय्ओ खेःतो। 16 एत हायःओलेः येसुइ लाङ्काकोः ल्होक्ओमयःकायः खेःल आब्राहाम्कोः प्लोमःदाने मोमःदानेकायः लव्ह्आकान् माःर। 17 ओउःत झ्यान्ते येसुपाय् लयःकोः हौलम्लो लेखालेः यातैज्याङ्लेः घार्तोलेः स्याव्सा खेःओ खेःतो। ओहाङःसैको परमेस्वर्कायः ताङ्ह्ओ पुरोहीत्कोः काम् पेतो जाङ्ह्ती येसुइ मान्तालम्कायः योनःती योती “लौ इमयःकोः रेव्ओ काम् जाङ्ह्झ्याङ्कोः क्युम्ह्ती वाय्पाःथास” त परमेस्वर्कः तेती तोसा खाय्नौ। 18 ओउःकायः ल्हुङ्तुक् वेलःती योतोक्हाङः येसुइ लीह्सीःओ गोरःओआः द्याह् अरु मान्तालम्कोः ल्हुङ्तुक् वेलःती योसाकायः लीह्सीःओ गोरःओ बेलाहाङः ओउःमयःकायः येसुइ लव्ह्सा खाय्नौ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.