१ युहना 5 - चेपाङ1 “येसुपाय् ओउः वाङ्सा खेःओ ख्रीस् लेःआः” त दाय्ह्ती ङ्हाम्ओलम् झुङ्आले परमेस्वर्कोः चोःलम् स्याव्नै। फेरी सुसुइ आपाकायः राप्नानी ओउःइलेः आपाकोः चोःलम्कायःमा राप्नाःथास। 2 ङीइ परमेस्वर्इ तोओ कुरा सायःती ओउःकायः राप्नाःतय्ह्नी त खेःया ओउःकोः चोःलम्कायःमा राप्नाःतय्ह्नी त चीःसा खाय्नाःतय्ह्नी। 3 ङीइ परमेस्वर्इ तोओ कुरा सायःती जाङ्ह्धार्नालेः ओउःकायः राप्नाःतय्ह्नी। फेरी ओउःइ तोओ कुरा जाङ्ह्सापाय् चाक्तो खेःल 4-5 दोह् हायःती दाय्ह्सा परमेस्वर्कोः चोःलम्इ ल्हाव्ह्दैबाङ्कोः रेव्ओकायः क्लीमःसा खाय्नानी। सुसु परमेस्वर्कोः चोः स्याव्नै ओउःलेः “येसुपाय् परमेस्वर्कोः चोः लेःआः” त दाय्ह्ती ङ्हाम्ती झ्यान्ते ल्हाव्ह्दैबाङ्कोः रेव्ओकायः क्लीमःनानी। ओउःलो लेखा ङ्हाम्ओलम् ह रेव्ओकायः क्लीमःसा खाय्नानी। 6 येसु ख्रीस्पाय् तीःइ बाप्तीस्मा त्याक्तीमा लयःकोः वयः क्लेह्ती जीङः बयःतीमा थाती वाङ्ओआः। तीःकोः बाप्तीस्मा ह खेःल तीःमा वयःमा वाङ्ओआः बा। ओउःत हायःओ कुराकायः परमेस्वर्कोः ग्वालामःइलेः पाःती तोनौ दोह् हायःती दाय्ह्सा ओउःइ दोङ् कुरा नोःओ। 7 येसु ख्रीस्कायः सुम्ज्योः छ्यानःराय् मुनाः 8 परमेस्वर्कोः ग्वालामः यात्ज्योः लेःआः ओउः बाप्तीस्माकोः तीः यात्ज्योः अरु ओउःइ सीओहाङः क्लेह्ओ वयः लेःआः ओउः सुम्ज्योः क्रुम्ह्ती मुनै। 9 मान्ताइ पाःती तोओ कुरापाय् ङ्हाम्नाःतय्ह्नी। मान्ताइ पाःती तोओसै परमेस्वर्इ पाःती तोओ कुरा दोङ्सी लेःआः ओउःहाङःसै परमेस्वर्इ लयःकोः चोःकायः “ङाकोः दोङ् चोः लेःआः” त पाःती तोओआः। 10 सुसुखेइ “येसुपाय् परमेस्वर्कोः चोः लेःआः” त दाय्ह्ती ङ्हाम्नानी ओउःकोः ल्हुङ्हाङः परमेस्वर्इ पाःती तोओ कुरापाय् मुलेःनाः सुसुखेइ इ कुरा ङ्हाम्नीली ओउःइलेः परमेस्वर्इ पाःती तोओ कुरा ङ्हाम्माःत झ्यान्ते परमेस्वर्कायः माःरेव्लो लेखा ताःनानी। 11 फेरी परमेस्वर्इ येसुकायः पाःती तोओ कुरापाय् इ लेःआः। परमेस्वर्इ लयःकोः चोः ल्होक्ती ङीकायः चोःसै रौ जीङः दोःताक्आतय्ही। 12 सुसुखे परमेस्वर्कोः चोःकुस् मुचनै ओउःलेः रौ जीङः दोःनै। सुसुखे परमेस्वर्कोः चोःकुस् मुइली ओउःलेः जीङः दोःइली। 13 नीङ् परमेस्वर्कोः चोःकायः ङ्हाम्ओलम्पाय् रौ जीङःतेः दोःतेःआकाय् ओउःतलेः चीःताक्साकायः इ कुरा लेखनेःनाङ्स। 14 परमेस्वर्इ झाक्ओ कुरा ङी ओउःकः तेचानाःतय्ही त खेःया ओउःइ सायःनाःतय्ही। एत चीःती ङी ओउःकःताङ् फुतीलेः तेलाङ् वाङ्नाःतय्ही। 15 ओहाङःसै ओउःकः तेती तोतोक्हाङः दोह्त ङी तेआतय्ही ओउःलेः बयःनाःतय्ही इतमा चीःनाःतय्ह्नी। 16 नीङ्इ यात्चाक् लयःकोः पुःचोङ् हौचोङ् रेव्तो जाङ्ह्ओ च्यवःतेःचानी त खेःया ओउः मान्ताकायः परमेस्वर्कः तेती तोनु दा ओहाङःसैको ओउः मान्ता रौ जीङः दोःनाः। ओउः सीताक्सा खाल्कोः रेव्ओकायः ह रौ जीङः दोःल ओउः खाल् जाङ्ह्ओकायः परमेस्वर्कः तेसा परल। 17 सबै पेमालो काम्पाय् रेव्ओ लेःआः यात्नीस् रेव्ओ काम्कायः मान्ता सीसा परल। 18 परमेस्वर्कःसै रौ जीङः दोःओ मान्ताइ रेव्ओ काम् जाङ्ह्धै जाङ्ह्उलु दोह् हायःती दाय्ह्सा परमेस्वर्कोः चोःइ ओउःकायः ओम्पायःती सैतान् वाङ्सा ताक्उलु। 19 ङीखे परमेस्वर्कोः लेःआः तय्ही अरु ल्हाव्ह्दैबाङ्कोः मान्तालम्खे सैतान्कोः काम् जाङ्ह्तीलेः वाह्धै मुनै ओउःतलेः चीःनाःतय्ह्नी। 20 फेरी परमेस्वर्कोः चोः वाङ्ती ङीकायः व्हाय्ताक्आतय्ही ओहाङःसै ङीइ दोङ् परमेस्वर्कायः तय्ह्सा खाय्नाःतय्ह्नी। ओउःतलेः चीःनाःतय्ह्नी फेरी ङीपाय् ओउः दोङ् परमेस्वर्कुस्लेः ओउःकोः चोः येसु ख्रीस्कुस् मुनाःतय्ही। ओउःपाय् दोङ् परमेस्वर् लेःआः ओउःइ गलमा द्युम्मालो रौ जीङः बयःनौ बा। 21 लौ हौलम्य द्यव्तालम्कायः स्यवतेःचानी। ओउःच्युक्लेः स्याव्पाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.