আবিলেচ্ 5 - Chakma Bibleখেমা পেবাত্তে তবনা 1 ও লগেপ্রভু, আমা উগুরে যিয়েনি ঘোট্যে সিয়েনি ইদোত্ তুলি চাহ্; তুই রিনি চাহ্, আমা অগমানানি চাহ্। 2 আমা ভাগর্ সোম্বোত্তিগানি বিদেশীগুনো আঢত্ দিয়্যে ওইয়্যে, আর ঘরানি দিয়্যে ওইয়্যেদে নানান্ জাদর মানুচ্চুনোরে। 3 আমি অনালর্ ওইয়্যেই, আমার বাপ্পো নেই, আমা মাগুনে রানি ওইয়োন্। 4 আমার হেবার্ পানিগান কিনি হা পড়ে; বানা দাম দিইনে আমি তক্তা পেই পারিই। 5 যিগুনে আমারে লোড়েয়োন্ তারা আমা ইধু এইনে লুম্বোন্দি; আমি বল্পোজ্যে ওইয়্যেই, জিরেন্ ন-পের্। 6 যগাজ্যে হানা পেবাত্তে আমি মিসর আর আসিরিয়ার অধিন্ ওইয়্যেই। 7 আমা পুরোণি মানুচ্চুনে পাপ গোজ্যন্; তারা ইক্কিনে আর নেই, মাত্তর্ আমি তারার্ সাজানি বুয়োই নেযের্। 8 চাগরুনে আমারে শাজন্ গত্তন্; তারা আঢত্তুন্ আমারে উদ্ধোর্ গুরিবার্ কনজন নেই। 9 ধূল্যেচর-চাগালাত্ ডাগেত্তুনো দরে পরানর্ বাঁজি রাগেইনে আমি হানা থুবেই। 10 আমা চামানি পোগোন চুলো ধোক্ক্যেন্ গরম; পেট্পরায় জ্বর্ জ্বর্ ভাব পাঙর্। 11 সিয়োনত্ মিলেগুনোরে বর্বাত্ লাগা ওইয়্যে; যিহূদার আদামত্ আর শঅরত্ বর্বাত্ লাগা ওইয়্যে গাবুজ্যে মিলেগুনোরে। 12 দাঙর্ পোজিশনর্ কামগুরিয়্যেগুনোর আঢ্তানি বানিনে টাঙেই রাগা ওইয়্যে; বুড়ো নেতাগুনোরে সর্মান দেগা ন-অয়। 13 গাবুজ্যেগুনোর্ মিশিন্ ঘুরেইনে কাম্ গরা পড়ের্; চিগোন্ পুয়োগুনে তক্তার্ ভরে উজোত্ খাদন্। 14 শঅর-গেদো ইধু বুড়ো নেতাগুনে আর ন-বজন্; গাবুজ্যেগুনে বাজনা বাজানা থামেয়োন্। 15 আমা মনানিত্তুন্ হুজিগান যেয়েগোই আমি নাজ বদলে আবিলেচ্ গুরির্। 16 আমা মাঢাত্তুন্ মুকুট পড়ি যেইয়্যেগোই। অভিশাব্ পোড়োক্ আমার্, কিত্যেই আমি পাপ গোজ্যেই! 17 ইয়েনিত্তে আমা মনানি ভাঙি যেইয়্যে, ইয়েনিত্যে আমার চোগোর্ তেজ্চানি কমি যেইয়্যে। 18 সিয়োন মুড়োবো মানুচ্ নেইয়্যে ওইনে পড়ি আঘে; শিয়েলুনে তা উগুরে ঘুরি বেড়ান্। 19 ও লগেপ্রভু, তুই উমরত্যে রাজাগিরি গর্, তর্ সিংহাসনান্ বংশর্ পর বংশ ধুরি থিদেবর্। 20 তুই কি উমরত্তে আমারে ভুলি যেবে? এদক্ দিন ধুরিনে কিত্তে তুই আমারে ছাড়িনে আগচ্? 21-22 ও লগেপ্রভু, যুনি তুই আমারে এক্কুবারে এলাফেলা ন-গুরি থাচ্, যুনি তুই আমা উগুরে অমকদ বেজার্ ন-ওই থাচ্, সালে তইদু আমারে ফিরেই নেযা যেনে আমি ফিরি এই পারিই; আমা পুরোণি অবস্থাগান্ ফিরেই দে। |
Copyright © 2021 Bangladesh Bible Society
Bangladesh Bible Society