Zyowɛli 4 - Cebaara Bible 2010

Kútiiw Kolocɔlɔɔ a kúun syɛɛnfeleyi na lè

¹ «Níì cán cányi bee ni, ní lǎli bee ni, Zyuda wóbèle, ní Zyerusalɛmi wóbèle be cò n kári lè, lǎli ni mii a be lúrugo pan lè,

² mii a syɛɛnfeleyi myɛ kpóʔoro, mii a yi tìrige Zyozafati jǐnlɔgi ni. Nɛɛ bee mii a pye kútii na ní yi ní Isirayɛli ye kéeli na, pe lè mii syɛ́ɛnbèle, ní mii kɔ́rigi, poro bele yi cariga n tórigo syɛɛnfeleyi nínge ni lè, ní mii tári kéele na yi lɛɛ yiyɛɛ na lè.

³ Pe n gɔ̌n wáa mii syɛ́ɛnbèle kéele na. Pe n nìgɔcaripile fàli nànjaacɔɔ̀ na, pe n pìcaapile pára n dùvɛɛn syɔɔ n gbaa.

⁴ A yele wɔ́ɔgēle, nyàʔá yele caa mii kurugo, Tíiri ní Siidɔn ye, ní yele Filisitini tári tɛ́nɛmɛ tɛ́ɛyɛ myɛw? A yele caa lé bi gɔ̀lɔ́ wòlo mii na? Kàjáa yele ga ni caa bi gɔ̀lɔ́ wòlo mii na, mii a tɔ̀nɔ́ gi yaʔa yele gɔ̀lɔ́-wòlori í lúru kòro yele nyúnyi ni kelekele!

⁵ Yele n mii wálifiiw, ní mii tɛ́ɛw láa. Yele n mii lɔgbanri yacandelere láa n sáà tɛ́ʔɛ yele kpɔ̀ʔɔrɔli kpaaya ni.

⁶ Yele n Zyuda ní Zyerusalɛmi wóbèle pára Yavan ye ma, jàngó bi be léeli be tári na.

⁷ Wéle, tɛ́ɛgee ni yele be pára lè, mii a be yìrige yaà beè pe lúru pan, si yele gɔ̀lɔ́ wòlori yaʔa ti lúru kòro yele nyúnyi ni.

⁸ Mii a yele nànbiigèle, ní yele calipiigèle pára Zyuda wóbèle ma, poro a be pára Saba ye syɛɛnfelegi ma ki lè léelige.» Níì cán Yawe wi koro joo.

Kapɛɛnsanni ní kútiiw kéele

⁹ Ye gee naa jáari syɛɛnfeleyi nínge ni! Ye jo: «Ye yeyɛɛ zámaga kapɛɛnnɛ kánma na! Ye nànniribèle yìrige! Kapɛɛnkpumɔnbèle myɛ n yɛlɛ bàā nùuní, ki n yɛlɛ paa lúru!

¹⁰ Ye yele nìtěyi kpúmɔn ye kàriga ŋɔséebéle, ye yele kátangèle kpúmɔn ye kàriga tàbaabēle! Wee wi nyɛ lè fànʔa fun, waa gi nyuu wí jo: ‹Mii i nyɛ sànbali!›

¹¹ Yele syɛɛnfeleyi myɛ ye nyɛ lè tɔ́ɔnrɔ n màʔa n kpàra, ye tɔlɔyɔ wári, yaa maa, ye yeyɛɛ gbóʔoro! Ee Yawe, mɔ nanniribèle tìrige mi tórigo yaà beè.

¹² Ki n yɛlɛ syɛɛnfeleyi í yìri ŋúnɔmi na bi kári Zyozafati jǐnlɔgi ma! Níì cán nɛɛ bee mii a tɛ́ɛn bi syɛɛnfeleyi myɛ kútii joo yi lè tɔ́ɔnrɔ n màʔa n kpàra.

¹³ Yaa kɔniyi nyàʔá, níì cán yaliiri n lɛɛ n kwɔ́ɔ! Yaa maa ye ba ra tánʔana, ɛrɛzɛnw lɔ̀ʔɔ tɛɛnùgugo n nyìn, yaleyi n nyìn fílili! Níì cán be péemi n tɔ̀nɔ n kpɔ́ʔɔ.

¹⁴ Syɛɛnnɛʔɛmɛ, syɛɛnnɛʔɛmɛ wéle bee, kútiiw cerile jinlɔgɔ ni. Níì cán Yawe cángi n nùuni, kútiiw cerile jinlɔgɔ ni.

¹⁵ Cángi ní yégi i kàragí yébilimɛ, a ŋɔripiigèle gbɛ̀ɛnmɛ i kwóo ni syée.

¹⁶ Yawe i kaana Siyɔn ni, wi n wi yákpoli yaʔa li i lúro Zyerusalɛmi ni. Nyɛ̀ʔɛgèle ní tári n cúngo. Kàjáa Yawe i nyɛ wi syɛ́ɛnbèle tɛɛlàraga, wi i nyɛ Isirayɛli ye ma yatɔngɔ.

¹⁷ Yele a gi cán lǎli bee ni bi cán mii wi nyɛ Yawe yele Kolocɔlɔw, wi nyɛ lè wodɛ́ɛɔn ní Siyɔn ni, ki lè mii nyanbe-nyunjǎngi. Zyerusalɛmi a pye wojaɔn ní nibɔnbèle a ní tée sɔ̀lɔ yaà í.

Kolocɔlɔɔ syɛ́ɛnbèle a ní lúru peyɛɛ daa

¹⁸ «Cángi bee na, ɛrɛzɛn lógi a ra fóo ra tíri nyanbeleyi na, nɔ́nɔw a ra fóo dǎndamayi na, lǒyi a ra fóo Zyuda lókoloyi myɛ ni. Púloweele a wɔ́ɔ yiri Yawe kpáagi ni bàā Syitimi tɛɛmarigi fɔɔnri.

¹⁹ Ezyipiti a ba pye tɛɛ̀kalagiga. Edɔmi a ba pye fìimɛ tára, bi pye tɛɛ̀kalagiga, péemi kéele na be kpéʔele Zyuda wóbèle na lè, poro bele tɛɛlɛ fun sìsyaan be wo be tári ni lè.

²⁰ Kàjáa Zyuda a ba pye syɛ̀ɛnnɛ tɛɛkòrogo làla o làla, ní Zyerusalɛmi wɔ́ɔgēle, yìrigèle myɛ syɛ̀ɛnnɛ ma.

²¹ Mii a be sìsyaanw jéemununɔ fáli kpéʔele, wee wi lè mii da kɔ́ɔ̀ wi kpéʔele í.» Yawe si a tɛ́ɛn bi kòro Siyɔn ni.