Zyonasi 1 - Cebaara Bible 2010

Zyonasi i kanmaa caa bi fǎn léeli Yawe na

¹ A Yawe syɛ́ɛnri nan Amitayi jáaw Zyonasi na kánmi naa na, wi n jo:

² «Yìri maa syée Niniivi ma, ki lè kèkpɔɔgi mi sa yákpoli wáa gi kánmi na. Níì cán ki péemi kéele n lúgu fwɔɔ n baa nan naa mii na.»

³ Lǎli bee ni a Zyonasi yìri bi fàn bi kári Tarisiisi ma bi léeli Yawe na. A wi tìgi n kári Zyafa ma ní sáà bàtowaa nyaa yaà, wee wi da ni syée Tarisiisi ma lè. A wi wi tánʔani lɔ́rɔ sàra, níì jée ní syɛ́ɛnbèle ní bi kári Tarisiisi ma bi léeli Yawe na.

⁴ Kàjáa a Yawe káfalapeʔe yìrige ki i funu sólomi lɔ̀ʔɔ ǹjoʔo ni, a gi pye káfalakpɔʔɔ, fwɔɔ a bàtow i caa bi kabagi.

⁵ A bàtow falipyebèlē fyáa. A pe myɛ nibin nibin i be kolocɔlɔbèlē nyɛ́ɛri gbanʔama be poro syɔɔ. A be bàtow fúngo yárira yirige n wáa sólomi lɔ̀ʔɔ ni jàngó bàtow í faʔa. Zyonasi si maa tìgi n jée bàtow fúngo ni n sáà sínɛ ni ŋúnɔ yaà gbanʔama.

⁶ A bàtow kùndigi nùuni wi na n sáà wi pye: «Nyàʔá na mɔ ŋúnɔ? Yìri maa mɔ kolocɔlɔw yiri! Dɔ̀ʔɔ́ Kolocɔlɔw bee a sɔ̀ngi wolo kéeli na, wolo si a kɔ́ kùu í.»

⁷ A pe gi joo peyɛɛ ma níì jo: «Yaa maa wo ba gɔ̌n wáa, jàngó wo gi cán wee kéele na kapeegi naa wolo taa lè.» A be gɔ̌nw wáa, a gɔ̌nw too Zyonasi na.

⁸ Lǎli bee ni a be wi pye: «Ki tɛ̀ɛn wolo na wee kéele na kapeegi naa wo taa lè. Nyàʔá gi nyɛ mɔ kapyeli? Sán mɔ yìri? Tárìí wóo mɔ nyɛ? Syɛɛnfelegìí wóo mɔ nyɛ?»

⁹ A wi be yari: «Mii i nyɛ Heburuo, Yawe mii kpɔ̀ʔɔrɔ́, wi lè nyɛ̀ʔɛni Kolocɔlɔɔ, woro wee wi sólomi lɔ̀ʔɔ ní tári kpéʔele lè.»

¹⁰ A fyáakpɔɔrɔ nǎnbèle bee cò, a be wi pye: «Nyàʔá na mɔ gee naa kpéʔele?» Níì cán pe maa gi cán a wi fé bi léeli Yawe na wii, ncan woro wi da gee bee joo be ma.

¹¹ A be wi pye: «Nyàʔá wolo a kpéʔele mɔ na jàngó sólomi lɔ̀ʔɔ í yére wolo ma?» Níì cán kàa maa ni fàrá sólomi lɔ̀ʔɔ tugo-mí-yìrile na.

¹² A wi be yari: «Ye mii láa ye wáa sólomi lɔ̀ʔɔ ni, sólomi lɔ̀ʔɔ a yére yele ma. Níì cán mii n gi cán mii kéeli na káfalakpɔɔgi naa yele taa.»

¹³ A nǎnbèle bee i bàtow waari jàngó bi nan táfàa na, kàjáa be fanʔa ga taa í, níì cán sólomi lɔ̀ʔɔ maa ni tugu ni yìrigí ni be yéregi.

¹⁴ Lǎli bee ni a be i Yawe nyɛ́ɛri gbanʔama níì jo: «Ee Yawe, wolo i mɔ nyɛ́ɛri ki ga yɛlɛ wolo í kùu nǎnw naa sìi kéele na í, mɔ a kɔ́ tɛɛlɛ fun sìsyaan wolo kapeele túgoro tugo wolo na í! Níì cán mɔ, Yawe, gee gi mɔ dɛ́nɛ lè, koro mɔ kpéʔele.»

¹⁵ A be náà Zyonasi cò n wáa sólomi lɔ̀ʔɔ ni, a sólomi lɔ̀ʔɔ jángila yére.

¹⁶ A nǎnbèle bee fyáa Yawe na gbanʔama. A be sáriga wòlo Yawe ma, níì nyɔɔfaliya kpéʔele.