Sélimɛ 27 - Cebaara Bible 2010

Zyakɔbi n dùbaw nɔ̀ʔɔrɔ n syɔɔ Ezau ma

¹ Izaaki maa baa lɛɛ. A wi nyapiigèle fànʔa kwɔ́ɔ. Wi da ní ni nyaagi í. A wi si kɔ́ɔ̀ wi pìilɛɛw yeri wi lè Ezau níì jo: «Dóō!» A Ezau jo: «Cooì!»

² A Izaaki wi yari: «Wéle, mɔ n gi nyaa àmɛɛ mii lɛɛ n kwɔ́ɔ lè, mii si ga mii cânguugi cán í.

³ Koro na tɔ́ɔliw ni ki n yɛlɛ mi mɔ dozoo-yáriri láa di lè mɔ segbogi, ní mɔ sedegi, mi kári sìnbirigi ni mi sa seʔe káara caa mi kpóo maa maa mii ma.

⁴ Kaatàánree ti mii dɛ́nɛ lè, mí toro tàa sɔʔɔ maa maa ní di ní mii í ba káa jàngó mii í dùbaw kpéʔele mɔ ma sáni mii í kùu lè.»

⁵ Lǎli ni si Izaaki da ni nyuu ní wi jáaw Ezau ní lè, Erebeka maa di lóʔo. A Ezau yìri n kári sìnbirigi ni bi sa seʔe káari caa bàā maa.

⁶ A Erebeka gi joo wi pìíw Zyakɔbi ma níì jo: «Wéle, mii n mɔ tóow syɛ́ɛnrɛ lóʔo, a wi gi joo mɔ yɛʔɛfɔw Ezau ma níì wi pye:

⁷ ‹Da syée mi sa seʔe káara kpóo maa maa mi ba kaatàanra sámaga mi sɔʔɔ mi ba kaan mii ma. Mii ga dee bee káa n kwɔ́ɔ, mii a dùbaw kpéʔele mɔ ma sáni mii í kùu lè.›

⁸ Tɔ́ɔliw ni, dóō, ki n yɛlɛ mi mii syɛ́ɛnri lóʔo, dee mii a joo gbàn mɔ ma lè.

⁹ Da syée yaweeri gboolo ma mi sa kapiicànyaa siin cò maa maa. Mii a ba yi sámaga yi pye kaatàanra, dee ti a mɔ tóow dɛ́nɛ lè.

¹⁰ Mɔ si kári ní di ní sa kaan mɔ tóow ma wi di káa si dùbaw kpéʔele mɔ ma sáni wi kùu lè.»

¹¹ A Zyakɔbi wi nɔ́ɔw Erebeka yari: «Wéle, mii yɛʔɛfɔw Ezau i nyɛ síinɛʔɛgɛ syɔ́ɔn. Mii céri síire si ga nɛʔɛ í.

¹² Dɔ̀ʔɔ́ mii tóow a sa mii tala tala bi wéle mii si kàri bi pye wi nyɛnɛ na námarafɔlɔ. Mii si kàri bi dánga taa dùbaw sìndɛʔɛ ni.»

¹³ Kàjáa wi nɔ́ɔw maa wi pye: «Mɔ dángaw bee n yɛlɛ wi lúru kòro mii na, dóō. Ki n yɛlɛ mɔ í tɛ́nɛ mii syɛ́ɛnri lóʔo. Máā syée mi sa kapiiyi cò maa maa.»

¹⁴ A Zyakɔbi kári n sáà yi cò n pan wi nɔ́ɔw ma. Sɔʔɔganmee pi wi tóow dɛ́nɛ lè, a wi nɔ́ɔw baa káari sɔʔɔ kánmi bee na.

¹⁵ Koro kàdoʔo ma, a Erebeka wi pìilɛɛw Ezau búrojǎnyi láa, yi da pye lè yaà Erebeka kpáagi ni n le wi pìisiin wów Zyakɔbi na.

¹⁶ Níì kapiiyi sáliya tɔ́n wi kɔ́yi ní wi yátiigi na gi pye lè wɔlɔwɔlɔ.

¹⁷ Kaatàánri ní búruw wi sámaga lè, a wi dee bee le Zyakɔbi kɔ́yi ni.

¹⁸ A Zyakɔbi kári ní di ní wi tóow ma ní sáà wi pye: «Abaa.» A tofɔw jo: «Cooì. Mɔ wìí wii, dóō?»

¹⁹ A Zyakɔbi wi tóow yari: «Mii wi nyɛ mɔ piilɛɛw Ezau. Gee mɔ da joo mii í kpéʔele lè, mii n gi kpéʔele. Koro na mii i mɔ nyɛ́ɛri, yìri mi tɛ́ɛn mí mii seʔe káari syɔɔ mi káa, dee mii sáà caa lè. Mí dùbaw kpéʔele mii ma ní mɔ fúngi ní.»

²⁰ A Izaaki wi jáaw yari: «Mɔ si n wárì tàa taa kelekele dɛ, dóō!» A wi wi yari: «Yawe, mɔ Kolocɔlɔw wi mii yaʔa a mii di fàra n taa.»

²¹ A Izaaki Zyakɔbi yari: «Mi nùuni naa mii na, mii í ba mɔ tala wéle bi gi cán kapye mɔ wi nyɛ mii jáaw Ezau kányɛʔɛ ni.»

²² A Zyakɔbi nùuni wi tóow Izaaki na, a Izaaki wi tala tala n wéle níì jo: «Yákpoli i nyɛ Zyakɔbi wóli, kàjáa wi kɔ́yi i nyɛ Ezau wóyi.»

²³ Wi ga gbàn n wi cán í. Níì cán Zyakɔbi kɔ́yi maa pye yi myɛ síige àmɛɛ wi yɛʔɛfɔw Ezau wóyi nyɛ lè. A wi dùbaw kpéʔele wi ma.

²⁴ Izaaki si maa níì wi yíbe níì jo: «Mɔ lé wi nyɛ mii jáaw Ezau kányɛʔɛ ni?» A Zyakɔbi wi yari: «Ɛɛn.»

²⁵ A Izaaki níì jo: «Káari kaan naa mii ma, dóō, dee mɔ sáà caa lè, jàngó mii í di káa, koro ga pye mii í mii dùbaw kpéʔele mɔ ma ní mii fúngi ní.» A Zyakɔbi pan ní lìíli ní wi tóow ma, a wi baa lìi, ní wɔ́ɔ̀ dùvɛɛn kaan wi ma a wi gbaa.

²⁶ Koro kàdoʔo ma a wi tóow Izaaki wi yari: «Dóō, nùuni naa mii na mi ba mii syɔɔnri syɔɔnri.»

²⁷ A Zyakɔbi wɔ́ɔ̀ nùuni wi na n sáà wi syɔɔnri syɔɔnri. A Izaaki wi búroyi núngo taa, níì dùbaw kpéʔele wi ma níì jo: «Wéle, mii jáaw núngo i nyɛ àmɛɛ seʔe núngo nyɛ, gee na Yawe dùbaw taʔa lè.

²⁸ Kolocɔlɔɔ í kásagi kaan mɔ ma, gee gi yìrigí nyɛ̀ʔɛni na lè, si wɔ́ɔ yacanri kaan mɔ ma, dee tári yirigi lè. Yaliinɛʔɛri n fàra dùvɛɛnfɔnw na saʔa.

²⁹ Ki n yɛlɛ syɛɛnfeleyi í ba ra báara mɔ ma. Syɛɛnfeleyi í ba ra kpùmɔnɔ́ mɔ yɛ́ʔɛ ma. Mɔ si pye mɔ senyɛnbèle nyúngo na, ki n yɛlɛ mɔ laayirinyɛnbèle í ba ra kpùmɔnɔ́ mɔ yɛ́ʔɛ ma. Syɔ́ɔnwee wi ga ni mɔ dángi lè, ki n yɛlɛ wee bee í dánga. Wee si wi ga ni dùbaw kpéʔele mɔ ma lè, dùbaw í pye wee bee ma.»

³⁰ A Izaaki ga kwɔ́ɔ dùbaw kpéʔelele na Zyakɔbi ma, á Zyakɔbi núngo wi tóow Izaaki taana terire, a wi senyɛnw Ezau kàri n yìri senyaari-tɛ́ɛgi ni n lúru n pan.

³¹ A Ezau wɔ́ɔ̀ lìidaannaa sámaga n pan wi tóow ma, ní baa wi pye: «Abaa, yìri mi káari syɔɔ mi káa, dee mii sáà caa lè, mí dùbaw kpéʔele mii ma ní mɔ fúngi ní.»

³² A Izaaki wi yíbe níì jo: «Wìí syɔ́ɔn wi nyɛ mɔ?» A wi jo: «Mii wi nyɛ Ezau, wi lè mɔ piilɛɛw.»

³³ A Izaaki fala ni cɛ̀lɛ́ gbanʔama níì jo: «Wìí si wi sáà seʔe káari caa n pan n baa kaan mii ma? Mii n dee bee káa n kwɔ́ɔ sáni mɔ í pan lè. Mii n wɔ́ɔ̀ dùbaw kpéʔele wee bee ma. A wi si wɔ́ɔ̀ tɔ̀nɔ n dùbaw taa wii.»

³⁴ Lǎli ni Ezau wi tóow syɛ́ɛnrɛ lóʔo lè, a wi funbɛɛnrɛtɔw tɔ̀nɔ n sùpiigi súu níì wi tóow pye: «Abaa, ki n yɛlɛ mi wɔ́ɔ dùbawaa kpéʔele mii ma.»

³⁵ A tofɔw wi yari: «Mɔ cɔnɔw n pan n baa mii jànváa níì mɔ dubaw nɔ̀ʔɔrɔ n syɔɔ.»

³⁶ A Ezau jo: «Koro na si ban pe wi yiri Zyakɔbi ì? Ncan wi n mii jànváa níì wiyɛɛ lége mii sìndɛɛgi ni n kwɔ́ɔ tɔlɔyɔ siin. Wi n sélì mii lɛ́ɛgi tɔ̀nɔ syɔɔ. Wéle, tɔ́ɔliw ni wi n níì mii dùbaw nɔ̀ʔɔrɔ n syɔɔ.» A Ezau níì jo: «Dùbawaa ga níì kòro lé mɔ ma bi kpéʔele mii ma í?»

³⁷ A Izaaki wi yari: «Wéle, mii n wi télege n kwɔ́ɔ mɔ nyúngi na. Mii n wi senyɛnbèle myɛ kaan wi ma paa báara wi ma. Mii n lìíli ní dùvɛɛnfɔnw kaan wi ma. Nyàʔá si mii a ní gbǎn pye mɔ ma, dóō?»

³⁸ A Ezau wi tóow yari: «Dùbaw bee yagana si lé wi nyɛ mɔ ma? Ki n yɛlɛ mi wɔ́ɔ dùbawaa kpéʔele mii ma, Abaa.» Níì fala ni nyaan ni yákpogi wáa.

³⁹ Lǎli bee ni a wi tóow Izaaki wi yari: «Wéle, mɔ tɛɛ̀tɛ́ɛnni a léeli tátaanri na. Kásagi gi yìrigí nyɛ̀ʔɛni na lè, mɔ tári a ra gi taagi í.

⁴⁰ Mɔ ŋɔséew báriga ni mɔ a ra mɔ liili taagi. Mɔ si a pye mɔ senyɛnw kɔ́lɔ na. Kàjáa mɔ ga baa curugo n màʔa n kwɔ́ɔ, lǎli bee ni mɔ a wi zúuw kabi bi láʔa mɔ yátiigi na.»

Zyakɔbi n fàn n kári wi syɛɛnlɛɛw Laban ma

⁴¹ A Ezau Zyakɔbi para, àmɛɛ poro tóow dùbaw kpéʔele wi ma lè. A Ezau gi joo wiyɛɛ fúngi ni níì jo: «Cɛɛri na mii tóow a kùu. Lǎli bee ni mii a mii cɔnɔw Zyakɔbi kpóo.»

⁴² Lǎli ni pe baa Erebeka pìilɛɛw Ezau sɔ̀nguri tɛ̀ɛn Erebeka na lè, a wi fala n wi pìisiin wów Zyakɔbi yeri ní baa wi pye: «Ki n yɛlɛ mi kɔ̀rɔsíi, mɔ yɛʔɛfɔw Ezau i caa bi mɔ kpóo bi woro gɔ̀lɔ́w wòlo mɔ na.

⁴³ Tɔ́ɔliw ni, dóō, ki n yɛlɛ mi mii syɛ́ɛnri lóʔo. Mí yìri mi yiri nɛɛ naa mi kári mii yɛʔɛfɔw Laban ma Karan ma,

⁴⁴ mi sa kòro yaà ní wi ní mi làlaa kwɔ́ɔ bi taa mɔ yɛʔɛfɔw fúngo í ba tìgi.

⁴⁵ Wi fúngi ga baa tìgi mɔ kurugo, gee mɔ kpéʔele wi na lè, a gee bee yiri wi fúngi ni, lǎli bee ni mii a tundunro tun mɔ ma bi mɔ yeri mɔ í da maa. Nyàʔá na mii yɛlɛ bi kɔ́ bɔ̀nɔ yele myɛ siinw ni cannijanga?»

⁴⁶ A Erebeka gi joo Izaaki ma níì wi pye: «Sìíw láa n kwɔ́ɔ mii ni Hɛti calipiigèle gele kéele na. Zyakɔbi ga wɔ́ɔ níì Hɛti yòdaʔayi wówaa pɔri, tári naa cewaa, àmɛɛ bele bee nyɛ lè, nyùngìí ki a ní pye gi na mii í pye naa sìi na?»