Sélimɛ 21 - Cebaara Bible 2010

Izaaki seeli kéele

¹ A Yawe kacànna pye Sara na, níì gi kpéʔele wi ma n yɛlɛ ní syɛ́ɛnri ní wi da joo lè.

² A Sara baa fícɛnnɛ taa n nànbile see Abirahami ma bi gi taa Abirahami maa lɛɛ n kwɔ́ɔ, ki n pye lǎli tiimaa ni lee kéele Kolocɔlɔɔ da joo wi ma lè.

³ A Abirahami pìíw mɛ́ʔɛ le ni wi yiri Izaaki, wee Sara see wi ma lè.

⁴ A Abirahami wi jáaw Izaaki kɛ́nɛ lǎli ni wi taa lè canya kɔrɔtaanri, n yɛlɛ ní gi ní àmɛɛ Kolocɔlɔɔ da gi joo n gbàn wi ma lè.

⁵ Abirahami maa taa yɛ̀ʔɛlɛ dabata wi jáaw Izaaki làrizeeli ni.

⁶ A Sara jo: «Kolocɔlɔɔ n mii kaan mii í da tɛ́ʔɛ, wee wi ga mii kéeli lóʔo lè wi a ra gi tɛ́ʔɛ.»

⁷ A wi níì jo: «Wìí wi a dée gi joo Abirahami ma si wi pye Sara a kɔ́ pìibēle kaan be ŋɔri? Koro ní ki myɛ ní mii n nànbile see wi ma wi lɛɛgwɔɔri làla ni.»

Abirahami n Agari ní Isimayɛli lúrugo n tórigo

⁸ A pìíw baa fuguri, a be wi láʔa yíremi na. Cángi na be wi láʔa yíremi na lè, a Abirahami lìigbɔɔlɔ sámaga.

⁹ Agari wi lè Ezyipiti ye wów, pìíwee wi see Abirahami ma lè, a Sara wee bee nyaa wi i tɛ́ʔɛ.

¹⁰ A wi Abirahami pye: «Pulocew naa ní wi pìíw nɛnɛ. Níì cán pulocew naa pyà ga yɛlɛ wi kɔ́rigi lìi ní mii pìíw Izaaki ní í.»

¹¹ A syɛ́ɛnri bee tɔ̀nɔ n Abirahami bɛɛn wi pìíw kéele na.

¹² Kàjáa a Kolocɔlɔɔ gi joo Abirahami ma níì wi pye: «Pìíw ní mɔ pulocew kéele ga yɛlɛ bi gbàn mɔ ma í. Gee myɛ Sara ga ni caa mɔ ma lè, ki n yɛlɛ mi fɔ̀lɔ gi na wi ma. Níì cán Izaaki ni mɔ yodaʔayi a yiri, yee na mɔ mɛ́ɛgi a pye lè.

¹³ Mii si a wɔ́ɔ gi yaʔa syɛɛnfelegaa í yiri mɔ pulocew pyà ni, níì cán mɔ piiwaa wii.»

¹⁴ A Abirahami sɔ̀li n yìri nyǐngi nyɔ́ɔ na n yaliire láa ní wɔ́ɔ̀ lɔ̀ʔɔ le saliga kpàbi ni n kaan Agari ma, níì di cɔ̀rɔ wi fókaannyungi na, ní wɔ́ɔ̀ wi pìíw kaan wi ma níì wi lúrugo n tórigo. A wi kári n sa ni curugu ni máari Bɛɛri-Syeba fìími tára ni.

¹⁵ Lǎli ni sáligi kpàbi lɔ̀ʔɔ baa kwɔ́ɔ lè, a Agari sáà wi pìíw kàriga n yaʔa tiipiigaa láara ni,

¹⁶ níì kári n sáà tɛ́ɛn yaà yɛʔɛ̀ ma sedege ŋáʔa léeliganma na. Níì cán wi maa gi joo níì jo: «Pìíw ga yɛlɛ wi kɔ kùu mii nyɛ́nɛ na í.» A wi sáà canʔana n tɛ́ɛn yaà wi zǐnmi na ni nyaan.

¹⁷ A Kolocɔlɔɔ pìíw sùpile lóʔo. A Kolocɔlɔɔ tundunw kòro yaà nyɛ̀ʔɛni na níì Agari yeri níì jo: «Agari, nyàʔá gi mɔ taa? Mɔ a kɔ́ ra fɛ̀ɛgí í. N pìíw yaʔa yaà mɛ̀ɛ wodɛ́ɛɔn ní, Kolocɔlɔɔ n wi sùpili lóʔo.

¹⁸ Yìri mi sa pìíw láa mi yìrige, wi cò kɔ́gi na. Níì cán mii a wi kpéʔele syɛɛnfelegaa, gee ki a nɛʔɛ lè gbanʔama.»

¹⁹ A Kolocɔlɔɔ wi nyapiigèle múgu, a wi wéle n kɔ̀lɔ́ nyaa. A wi kári n sáà sáligi kpàbi nyìn lǒgi na n baa pìíw kaan a wi gbaa.

²⁰ A Kolocɔlɔɔ pye ní nànbili ní, a li baa yìri n lɛɛ níì tɛ́ɛn fìími tára ni. A wi baa pye sedeŋɔɔ-sànbali.

²¹ Paran fìími tára ni wi da tɛ́ɛn. A wi nɔ́ɔw sáà Ezyipiti ye céwaa láa n baa kaan wi ma.

Abirahami n joogaanna kpéʔele ní Abimelɛki ní

²² Lǎli bee ni Abimelɛki pan Abirahami ma, woro ní Pikɔli ní wi lè wi kapɛɛnkpumɔnbèle kàfɔlɔ. A wi baa Abirahami pye: «Kolocɔlɔɔ tɔ̀nɔ́ i nyɛ ní mɔ ní kérigèle myɛ ni mɔ kpéʔele lè.

²³ Koro na tɔ́ɔliw ni ki n yɛlɛ mi kàli mii ma nɛɛ naa Kolocɔlɔɔ mɛ́ɛgi na bi gi tɛ̀ɛn mii na mɔ a tée mii jànváa í. Mɔ a wɔ́ɔ mii pìíbèle ní mii pìíbèle pìibēle jànváa í. Kàjáa kánmee na mii kacànna pye mɔ na lè, ki n yɛlɛ mɔ í wɔ́ɔ kacànna pye mii na, si wɔ́ɔ kacànna pye tári naa na, dee ni mɔ tɛ́ɛn lè.»

²⁴ A Abirahami jo: «Mii a kàli gi na.»

²⁵ A Abirahami joo Abimelɛki na kɔ̀lɔ́ kéele na wee wi falipyebèle da syɔɔ Abirahami ma lè fànʔa na.

²⁶ A Abimelɛki jo: «Mii ga gee bee pyefɔlɔ cán í. Mɔ si ga wɔ́ɔ̀ gi joo mii ma í. Mii ga gi cán í kapye níjanʔa ban í.»

²⁷ A Abirahami yaweeyiligēle ní yaweekpologèlē cò n kaan Abimelɛki ma, á pe myɛ siinw pínɛ n joogaanna kpéʔele ní peyɛɛ ní.

²⁸ A Abirahami bàpyabèle pèle kɔrɔsiin cɔɔnri yaweeri gboolo ni n yaʔa kɔlɔ̀ na.

²⁹ A Abimelɛki wi yíbe níì jo: «Nyàʔá na mɔ bǎbèle bee cɔɔnri n yaʔa kɔlɔ̀ na?»

³⁰ A Abirahami wi yari: «Ki n yɛlɛ mi fɔ̀lɔ mi bǎbèle naa kɔrɔsiin syɔɔ mii ma pe pye mɔ ma sɔ̀ngudaara yáriga bàā gi tèé mɔ na ncan mii wi kɔ̀lɔ́w naa túgu.»

³¹ Koro na be tɛ́ɛgi bee mɛ́ʔɛ le ni gi yiri Bɛɛri-Syeba, níì cán pe siinw n kàli yaà beè.

³² Nɛɛ bee be joogaanni kpéʔele Bɛɛri-Syeba ni. Koro kàdoʔo ma a Abimelɛki ní wi kapɛɛnkpumɔnbèle kàfɔlɔ Pikɔli yìri n lúru n kári Filisitini tári ma.

³³ A Abirahami tamariisi tíige cɔ́rɔ yaà Bɛɛri-Syeba ni, níì Yawe mɛ́ɛgi yeri yaà beè wi lè Bàngwɔɔ Kolocɔlɔw.

³⁴ A Abirahami tɛ́ɛn Filisitini tári ni n mɔn yaà.