Zyɔbi 3 - Cebaara Bible 2010

ZYƆBI PINƐ-MI-JOOLI NI WI TAANNYƐNBELE TAANRI NI ( 3—31 ) Zyɔbi káyaagi jóomɔ: Nyàʔa na woro yɛlɛ bi ní kòro sìi na?

¹ Koro kàdoʔo ma, a Zyɔbi nyɔ́ɔgi múgu n wi canzeegi dánga.

² A Zyɔbi syɛ́ɛnri láa n gi joo níì jo:

³ «Mii canzeegi n yɛlɛ gi kwɔ́ɔ láʔa yaà, ní yébiligee ki gi joo lè níì jo: ‹Nànbile fícɛnnɛ n taa.›

⁴ Cángi bee! Ki n yɛlɛ gi pye yébilimɛ. N Kolocɔlɔɔ yaʔa ǹjogi ni wi a ní kɔ́ gi kéeli córo í. Ki a ní kɔ́ gbɛ̀ɛnmɛ taa í!

⁵ Ki n yɛlɛ yébilimi, ní kùúw nyímɛ í da gi caa. Ki n yɛlɛ fàfanʔa í tɛ́ɛn kòro ki ǹjogi ni, fyáakpɔɔrɔ wɔ́ɔmɔ si jée gi ni.

⁶ Yébiligi bee! Ki n yɛlɛ yébiliwɔɔlɔ í gi cò! Ki a ní kɔ́ nyaa yɛ́ɛli canya ni í, ki a ní kɔ́ córo yéyi córomɔ ni í.

⁷ Ɔnhɔ́n, ki n yɛlɛ yébiligi bee í pye sìnzeemɛ wóʔo, fundaanra yákpolo a kɔ́ pye gi ni í.

⁸ Cányi dángafɔɔlɔ n yɛlɛ pe gi dánga, poro bele be gbàn ni Levyatanw yìrigí ŋúnɔmi na lè.

⁹ Ki n yɛlɛ ki nyìnwirimi ŋɔ́ripiigéle í pye yébilimɛ, kaa gbɛ̀ɛ́nmi sige, pi si a kɔ́ pan í, ki a kɔ́ nyǐnjerigi nyaa í.

¹⁰ Níì cán láagi gi mii fícɛnni taa lè, ki da láagi bee tɔ́n í, jàngó bi wɔʔɔgi naa làriga mii na í.

¹¹ Nyàʔá na mii ga kùu mii nɔ́ɔw láʔa ni í? Ba nyàʔá na mii ga kùu mii làrizeeli ni í?

¹² Nyàʔá na mii yégunyo siin taa a yi i mii télegi? Ba nyàʔá na mii yiregéle siin taa n ŋɔri?

¹³ Lǎli naa ni mii a dée pye wozinɛɔ ní yɛɛ̀nyinge na, mii a dée ra ŋúnɔ bi pye ŋɔ́ndaala na,

¹⁴ ní fànʔafɔbèle, ní tári wogbolobèlē ní, poro bele be nyanya faan peyɛɛ kéeli na lè,

¹⁵ bi pye ní fànʔafɔbiigèle ní, bele má tɛ́ɛw nyɛ lè, poro bele pe be kpáayi nyìn wálifiiw na lè.

¹⁶ Wàlá mii a dée pye beè í àmɛɛ pìiŋɔrizeeo nyɛ, wee wi nyɛ lè wolaraɔ ní. Mii a dée pye àmɛɛ pìipiigéle nyɛ gele ge lè ke ga gbɛ̀ɛ́nmi nyaa í.

¹⁷ Nɛɛ bee syɛɛnpeebèle fúugo-màʔana kwóo. Bele fànʔa gi kwɔ́ɔ lè, nɛɛ bee pe ŋɔ́ngi ni daagi.

¹⁸ Kàsolebèle myɛ i nyɛ sági peyɛɛ ma, pe ní o pe kpaàweleo yákpolo lúro í.

¹⁹ Wobile ní wogbɔɔɔ i yaà. Púlow n yirige wi kàfɔw kɔ́lɔ ni.

²⁰ Nyàʔá na wi gbɛ̀ɛnmi kaangi wee má wi wɔʔɔ lè, n wɔ́ɔ ni sìi kaangi funnyɛniyi fɔ̀ɔlɔ ma,

²¹ poro bele be kùúw yèʔerí lè wi si o maa í, ní i wi caa gbanʔama n sɔ̀lɔ lɔ́ri na,

²² poro bele pe a dée ra muguri lè sáā fundaangbɔɔrɔ kpéʔele, pe ga maa nyanweʔe taa,

²³ ní syɔ́ɔnwee má, woro wee kólogo gi làra lè, woro wee Kolocɔlɔɔ ceri n màʔa lè kàbanyi myɛ na?

²⁴ Mii ŋɔ́n-mí-fɔ̀nni li nyɛ mii yaliiri, mii kɔ́nʔɔrimi i càmí ni syée àmɛɛ lɔ̀ʔɔ nyɛ lè.

²⁵ Gee na mii fɛ̀ɛgí lè, koro gi mii taagi. Gee gi nyɛ lè mii fyáari yáriga, koro gi nangi mii na.

²⁶ Bi pye sági, wàlá bi pye yɛɛ̀nyinge na, wàlá ŋɔ́ndaala na, koro kàa o mii ma í. Fɔ̀rɔgi gi nyɛ mii na.»