Jàbɔbèle 15 - Cebaara Bible 2010

Samisɔn gɔ̀lɔ́-wòlori kéele

¹ A làlaa ga kwɔ́ɔ, a ki ga pye bilew làrilaala ni, a Samisɔn kapiige cò n kári sa wi céw wéle, ní sáà jo: «Mii a jée mii céw kurugo kpaafungi ni.» Kàjáa wi céw tóo ga fɔ̀lɔ wi jée yaà í,

² níì jo: «Mii maa kɔ́ ni sɔ̀ngí wi kéeli mɔ bɛɛn wii, a mii si wi kaan mɔ nigorow ma. Wi cɔnɔw si n nyɔɔ n sɔ̀lɔ wi na. Anbée ban gi nyɛ ì? Ki n yɛlɛ mi woro láa wi sìndɛɛgi ni.»

³ A Samisɔn be pye: «Kátali naa na, mii ga kapeʔe kpéʔele Filisitini ye na, mii a kolo í.»

⁴ A Samisɔn kári, ní sáà sɔriyɔ sirakele ní dabata cò, níì yi nányi wáa yiyɛɛ ma, níì nìmubwɔɔgéle nibin nibin láa n pwɔɔ nányi siin-ziin lariya ni.

⁵ A wi náagi le nìmubwɔɔgèle na níì sɔriyi yaʔa a yi jée Filisitini ye bilew ni n bilepwɔɔgèle, ní bilenaa-sìngɔniw sórigo n fàra olivye kɔliyi na.

⁶ A Filisitini ye jo: «Wìí syɔ́ɔn wi koro pye?» A pe be yari: «Samisɔn wii, wi lè Timina ye wówaa pyà nàɔn. Ncan wee bee n wi céw syɔɔ wi ma n kaan wi nìgorow ma.» A Filisitini ye kári n sáà céw ní wi tóow sórigo n kpóo.

⁷ A Samisɔn be pye: «Amɛɛ yele gi kpéʔele lè kánmi naa na, mii a mii gɔ̀lɔ́w wòlo yele na si náa yére.»

⁸ A wi be kpúmɔn cama n saʔa kpóo be ni. Koro kàdoʔo ma a wi kári n sáà kòro Etami fálaweegi ni.

Samisɔn ní jòfaniw kpàcɔʔɔlɔgɔ

⁹ Lǎli bee ni a Filisitini ye kári n sáà tɛ́ɛn Zyuda tári ni kapɛɛnni kánma na, níì yàli fwɔɔ n sáà nan Lehii na.

¹⁰ A Zyuda nǎnbèle jo: «Nyàʔá na yele pan wolo kánmi na?» A pe be yari: «Samisɔn wolo pan ba pwɔɔ jàngó gee wi kpéʔele wolo na lè wolo í koro kpéʔele wi na.»

¹¹ A Zyuda nǎnbèle pèle selebinnɛ ní saala kagunɔ kári Etami fálaweegi ma n sáà Samisɔn pye: «Mɔ ga gi cán ncan Filisitini ye be nyɛ wolo nyúngi na ì? Nyàʔá na mɔ gee naa pye wolo na?» A wi be yari: «Gee be pye mii na lè, koro mii pye be na.»

¹² A be wi pye: «A wolo pan ba mɔ pwɔɔ wii sa le Filisitini ye kɔ́yi ni.» A Samisɔn be pye: «Ye kàli mii ma bi gi tɛ̀ɛn yele tiimaa ban ye a mii kpóo í.»

¹³ A be wi yari: «Eʔe, a wolo caa bi mɔ pwɔɔ wii yagana bi sa le be kɔ́yi ni, wolo a mɔ kpóo í.» A be wi pwɔɔ ní mɛɛnfɔ́ngéle siin ní n yìri yaà fálaweegi ma n lúgu n kári ní wi ní.

¹⁴ Lǎli ni wi baa nan lè Lehii na, a Filisitini ye i yákpogèle wáa ni wi fàrá. A Yawe Pǐli wi yìrige. Mɛ́ɛngèle ge pye wi kɔ́yi na lè, a ge pye mɔ a jo lɛn yòoro dii, dee be sórigo ní naà ní lè. A wi yapwɔɔri cɛnɛ n láʔa wi kɔ́yi na.

¹⁵ A wi jòfani kpàcɔʔɔlɔ-pírige taa n láa n tɛ́ʔɛ n nànbēle saala kagunɔ kpóo.

¹⁶ A Samisɔn jo: «Ní jòfaniw kpàcɔʔɔlɔgɔ ní, jòfaniwaa jòfanibèle nínge ni, ní jòfaniw kpàcɔʔɔlɔgɔ ní mii nànbēle saala kagunɔ kpóo.»

¹⁷ A wi ga kwɔ́ɔ jooli na, a wi kpàcɔʔɔlɔgi kàriga n wáa. A be tɛ́ɛgi bee mɛ́ʔɛ le ni gi yiri Aramati-Lehii.

¹⁸ A lògbaagi kɔ́ baa wári wi na gbanʔama, a wi Yawe nyɛ́ɛri níì jo: «Mɔ wi mɔ falipyew kɔ́yɔ tɛ́ʔɛ n syɔɔgbɔɔli naa kpéʔele wi lè mii. Tɔ́ɔliw ni lògbaagi si kɔ́ ba mii kpóo lé bi kaan sìngɛ́nɛbèle naa ma?»

¹⁹ Fálaweegi gi lè Lehii ni, a Kolocɔlɔɔ gi yabi, a lɔ̀ʔɔ yiri. A Samisɔn ga gbaa, a wi pǐli jée wi ni, a fànʔa lúru n jée wi ni. Koro na be pùnweeli bee mɛ́ʔɛ le ni li yiri Ɛn-Hakore. Li i yaà Lehii ma àlí n baa nan níjanʔa na.

²⁰ A Samisɔn pye jàbɔlɔ Isirayɛli ni yɛ̀ʔɛlɛ toko fúngo ni, Filisitini ye lǎli ni.