Jàbɔbèle 14 - Cebaara Bible 2010

Samisɔn kakpɔɔseligi

¹ A Samisɔn tìgi n kári Timina ma, ní sáà cewaa nyaa yaà Filisitini ye calipiigèle nínge ni.

² A wi ga lúru n pan, a wi baa gi joo wi tóow ní wi nɔ́ɔw ma níì jo: «Mii n sáà cewaa nyaa Timina ni, Filisitini ye calipiigèle nínge ni. Tɔ́ɔliw ni ye sa wi nyɛ́ɛri ye ba kaan mii ma wi pye mii céw.»

³ A wi tóow ní wi nɔ́ɔw wi pye: «A gee bee jo lé cɔlɔɔ o naa mɔ senyɛnbèle cálipiigéle nínge ni wàlá wolo syɛ́ɛnbèle nínge ni í fwɔɔ mɔ í sa cɔlɔɔ láa Filisitini ye ma, pe lè sìngɛ́nɛbèle bee?» A Samisɔn wi tóow pye: «Sa wi nyɛ́ɛri mi ba kaan mii ma, níì cán woro wi bɛ̀ɛ mii ma.»

⁴ Wi tóow ní wi nɔ́ɔw si da gi cán ncan Yawe má gee bee yìri í, níì cán wi maa ni sábabu kéelaa caa bi taa tún ní Filisitini ye ní. Lǎli bee ni Filisitini ye pe da ni Isirayɛli ye kàragí.

⁵ A Samisɔn pínɛ n tìgi ní wi tóow, ní wi nɔ́ɔw ní n kári Timina ma. A pe ga sáà nan Timina ɛrɛzɛn kɔliyi na, a càarabɔ-yɛlɛɔ fala ni kaana ni wi fàrá.

⁶ A Yawe Pǐli Samisɔn yìrige n gi yaʔa yafyɛn o nyɛ wi kɔ́gi ni í, a wi càaraw cò n yabi àmɛɛ pe gáà kapiige yabi lè. Gee wi kpéʔele lè, wi ga gi joo wi tóow ní wi nɔ́ɔw ma í.

⁷ A wi kári n sáà joo ní céw ní, a wi kéeli bɛ̀ɛ wi ma.

⁸ A làlaa ga kwɔ́ɔ, a wi lúru n kári Timina ma bi sa wi láa, ní sáà wàli n kári sa càaraguugi wéle. A wi sáà sémuugo nyaa a gi jée càaraguugi kórigo ni n sélɔʔɔ kpéʔele yaà.

⁹ A wi kàa wòlo n cò wi kɔ́yi ni ni líi ni syée kólogi na. A wi ga sáà nan wi tóow ní wi nɔ́ɔw na, a wi kàa kaan be ma, a be lìi. Kàjáa wi da gi tɛ̀ɛn be na càaraw cére ni woro sélogi bee taa í.

Samisɔn n kàseele wáa Filisitini ye ma

¹⁰ A Samisɔn tóow kári céw tɛ́ʔɛ ma. A Samisɔn sáà liigbɔɔlɔ sámaga yaà, níì cán kánmi bee na nìgɔcaribèle da ni gi kpéʔele.

¹¹ Lǎli ni be tɛ́nɛ̀ wi nyaa lè, a be nìgorobēle toko ní kpɔrigɔ nyɛ́nɛ n wòlo poro í pye ní wi ní.

¹² A Samisɔn be pye: «Mii a kàseele wáa yele ma, yele ga li fílige n joo mii ma lìigbɔɔli canya kɔrɔsiin fúngo ni, yele ga li kɔ́n, mii a buroyo toko ní kpɔrigɔ kaan yele ma bi fàra fɛ́tii canya búroyo toko ní kpɔrigɔ na.

¹³ Yele si ga pye yele ga gbàn n li fílige n joo mii ma í, yele ye a búroyi toko ní kpɔrigɔ kaan mii ma bi fàra fɛ́tiiw canya búroyo toko ní kpɔrigɔ na.» A be wi pye: «Mɔ kaseeli wáa, wolo i lúro mɔ ma.»

¹⁴ A wi be pye: «Gee be líi lè ki n yiri wee ni wi líi lè, á tàánmi si yiri woniriw ni.» Canya taanri fúngo ni pe ga gbàn n kàseeli kɔ́rɔ joo í.

¹⁵ A ki ga pye canya kɔrɔsiin wógi na, a be Samisɔn céw pye: «Mɔ nanw lɛ́ɛlɛ wi kàseeli kɔ́rɔ tɛ̀ɛn wolo na. Kapye koro ban í, wolo a mɔ ní mɔ tóow kpaʔa wòolo sórigo kpóo. A yele wolo yeri lé wii bi ba wolo kɔ́lɔ yáriri syɔɔ wolo na láà, ba mɛ̀ɛ́?»

¹⁶ A Samisɔn céw i nyaan wi na níì jo: «A mɔ mii para wii, mii kéeli ga mɔ dɛ́nɛ í. Mɔ n kàseele wáa mii syɛ́ɛnbèle pìibēle ma, mɔ si ga li kɔ́rɔw joo mii ma í.» A wi wi yari: «Mii ga caà li kɔ́rɔw joo mii tóow wàlá mii nɔ́ɔw ma í, si kɔ́ ba li kɔ́rɔw joo lé mɔ ma?»

¹⁷ A wi i nyaan wi na lìigbɔɔli canya kɔrɔsiinw myɛ fúngo ni. A ki ga pye can-kɔrɔsiin wógi na, a wi li kɔ́rɔw joo wi ma, níì cán wi maa kɔ́ɔ̀ wi fɔ̀rɔ n baa sɔ̀lɔ. A wi sáà kàseeli kɔ́rɔ joo wi syɛ́ɛnbèle pìibēle ma.

¹⁸ Canya kɔrɔsiin wógi na, sáni cángi í too lè, a kěgi nànbēle baa Samisɔn pye: «Nyàʔá gi tɛ́nɛ n sɔ̀lɔ sárigā na? Ba nyàʔá gi nìri n sɔ̀lɔ càaraɔ na?» A wi be pye: «Kapye yele da fála ní mii náapyaagi ní í. Yele mǎà dée mii kàseeli kɔ́n í.»

¹⁹ A Yawe Pǐli wi yìrige, a wi tìgi n kári Asikalɔn ma, ní sáà nànbēle toko ní kpɔrigɔ kpóo yaà, níì be yáriri koli, ní baa fɛ́tii canʔa búroyi kaan bele má pe da kàseeli kɔ́rɔ joo lè. A fúngi tɔ̀nɔ n tanʔa wi na gbanʔama, a wi lúgu n kári wi tóow kpaʔa ma.

²⁰ A be si Samisɔn céw kaan wi nìgorow ma, wee wi pye lè wi tàannyɛnnɛ.