Jàbɔbèle 11 - Cebaara Bible 2010

Zyefite n baa pye Isirayɛli ye kùndigiw

¹ Zyefite wi pye lè Galaadi ye wów, wi maa pye kapɛɛnkpumɔn-sànbali, ní i nyɛ nànjaacewaa pyà. Galaadi si wi da Zyefite see wi na.

² Galaadi céw tiimaa si maa nànbiigèle kèle see Galaadi ma. A céw bee pìibēle ga baa lɛɛ, a be Zyefite nɛnɛ níì jo: «Mɔ a tée kɔrigɔ taa lìi wolo tóow kpaʔa ni í. Níì cán mɔ i nyɛ cewaa nikwɔɔ pyà.»

³ A Zyefite si fàn n léeli wi senyɛnbèle na n kári n sáà tɛ́ɛn Tɔbi tári ni. A gbanzan syɛ́ɛnbèle pèle yiri n peyɛɛ gbóʔoro n kári Zyefite ma n sáà pínɛ ní wi ní a pe i tuun nigoobèle na.

⁴ A làlaa ga kwɔ́ɔ, a Amɔn ye ba ni kapɛɛnni kpúmɔn ní Isirayɛli ye ní.

⁵ Amɛɛ si Amɔn ye pye kapɛɛnnɛ na ní Isirayɛli ye ní lè, a Galaadi wolɛɛbèle kári n sáà Zyefite caa Tɔbi tári ma,

⁶ níì wi pye: «Da maa mi ba pye wolo kapɛɛnkpumɔnbèle nyúngo na, koro ga pye wo sa kapɛɛnni kpúmɔn ní Amɔn ye ní.»

⁷ A Zyefite Galaadi wolɛɛbèle yari: «Yele ban ye mii para níì mii nɛnɛ n yirige mii tóow kpaʔa ni ì? Amɛɛ si wɔʔɔli nan yele na lè tɔ́ɔliw ni, nyàʔá na yele pan mii kurugo?»

⁸ A Galaadi wolɛɛbèle Zyefite pye: «Koro na si wolo lúru ni mɔ caa tɔ́ɔliw ni, koro ga pye mɔ í kári ní wolo ní bi sa kapɛɛnni kpúmɔn ní Amɔn ye ní, si pye wolo kùndigiw, gee bee n jo Galaadi ye myɛ kùndigiw.»

⁹ A Zyefite Galaadi wolɛɛbèle yari: «Yele ga mii kɔ́ri a mii lúru n kári bi sa kapɛɛnni kpúmɔn ní Amɔn ye ní, Yawe ga sáà be le mii kɔ́yi ni, mii wi a pye yele kùndigiw.»

¹⁰ A Galaadi wolɛɛbèle Zyefite pye: «Gee mɔ joo lè wolo ga pye wo ga gi kpéʔele í, Yawe a pye séera wolo níngi ni.»

¹¹ A Zyefite kári ní Galaadi wolɛɛbèle ní. A syɛ́ɛnmi sáà wi kpéʔele poro kùndigiw ní be sùlasiibèle kàfɔlɔ. A Zyefite níì wi syɛ́ɛnri myɛ joo Yawe yɛ́ʔɛ ma Misipa ni, toro dee wi da joo lè.

Tundunri Zyefite tun Amɔn ye ma lè

¹² A Zyefite tundunbéle tun Amɔn ye fànʔafɔw ma níì jo: «Nyàʔá gi nyɛ mii ní mɔ níngi ni, á koro mɔ kaan a mɔ pan mii kurugo ba kapɛɛnni kpúmɔn ní mii tári ní?»

¹³ A Amɔn ye fànʔafɔw Zyefite tundunbèle yari: «Lǎli ni Isirayɛli ye yìri Ezyipiti ma ni maa lè, pe n baa mii táraa syɔɔ, n séli yaà Arinɔn na fwɔɔ n sáà nan Yabɔki na, ní níì kári n sáà nan Zyuridɛnw na. Ti lúrugo mi kaan tɔ́ɔliw ni ní yɛɛ̀nyinge ní.»

¹⁴ A Zyefite níì tundunbèle pèle tun Amɔn ye fànʔafɔw ma

¹⁵ pe sa wi pye: «Zyefite n jo: ‹Isirayɛli ye ga Mowabi tári, ní Amɔn ye táraa faala syɔɔ í.

¹⁶ Níì cán lǎli ni Isirayɛli yiri Ezyipiti ni ni maa lè, a wi tánʔa n foro fìími tára ni n pan n baa nan Nyɛ́nɛri Solomɔ Lɔ́ʔɔ na, níì sɔ̀lɔ n fala Kadɛsyi ma.

¹⁷ Lǎli bee ni a Isirayɛli tundunbéle tun be sa Edɔmi fànʔafɔw pye: Mii yaʔa mii í foro mɔ tári ni. Kàjáa Edɔmi fànʔafɔw ga fɔ̀lɔ n yafyɛn lóʔo í. A wi wɔ́ɔ̀ pèle tun Mowabi fànʔafɔw ma, a woro sáà cée. A Isirayɛli jân kòro Kadɛsyi ni.

¹⁸ Koro kàdoʔo ma, a wi tánʔa n foro fìími tára ni n Edɔmi tári ní Mowabi tári màʔa n sɔ̀lɔ Mowabi tári canʔafolomɔ ma. A be sáà tɛ́ɛn Arinɔn jeligi na. Pe ga jée Mowabi tásaligi ni í, níì cán Arinɔn wi nyɛ Mowabi láʔagologi.

¹⁹ A Isirayɛli tundunbéle tun Amɔri ye fànʔafɔw Sihɔn ma wi pye lè wodɛ́ɛɔn ní fǎngi na Hɛsyibɔn ni. A Isirayɛli wi pye: Wolo yaʔa wolo í foro mɔ tári ni bi kári tɛ́ɛgee ma wolo syée lè.

²⁰ Kàjáa Sihɔn ga tága cama Isirayɛli na bi wi yaʔa wi foro woro tásaligi ni í. A Sihɔn wi syɛ́ɛnbèle myɛ kpóʔoro n sáà tɛ́ɛn Yahasi ni, níì kapɛɛnni kpúmɔn ní Isirayɛli ní.

²¹ Yawe wi lè Isirayɛli Kolocɔlɔw, a wi Sihɔn ní wi syɛ́ɛnbèle myɛ le Isirayɛli kɔ́yi ni, a wi be jáa. A Isirayɛli Amɔri ye tári myɛ syɔɔ n taa poro bele be pye wodɛ́ɛnbéle ní tári bee ni lè.

²² A be Amɔri ye tásaligi myɛ syɔɔ n taa, n séli Arinɔn na fwɔɔ n sáà nan Yabɔki na, ní níì séli fìími tára na fwɔɔ n sáà nan Zyuridɛnw na.

²³ Amɛɛ si Yawe Isirayɛli Kolocɔlɔw Amɔri ye tɛ́ɛgi syɔɔ n kaan wi syɛ́ɛnbèle Isirayɛli ye ma lè, mɔ si ba gi nɛnɛ syɔɔ lé?

²⁴ Kemɔsyi wi lè mɔ kolocɔlɔw, wi ga yárigee kaan mɔ ma lè, mɔ a gi syɔɔ gi pye mɔ wóʔo ì? Gee myɛ si Yawe wolo Kolocɔlɔw kaan wolo ma lè, wolo a gi syɔɔ gi pye wolo wóʔo.

²⁵ A mɔ tɔ̀ʔɔ̂ sɔ̀lɔ lé Sipɔɔri jáaw Balaki na, wi pye lè Mowabi fànʔafɔw? A woro kàkabaga kpéʔele lé ní Isirayɛli ní wàlá n kapɛɛnnɛ kpúmɔn ní wi ní?

²⁶ Nlaa Isirayɛli ye nyɛ lè wodɛ́ɛnbéle ní Hɛsyibɔn, ní gi tɛ́nɛmi kèye ni, ní Aroyɛɛri, ní gi tɛ́nɛmi kèye ni, ní Arinɔn taana kěyi myɛ ni, ki yɛ̀ʔɛlɛ sirakele ní dabata wi wee, nyàʔá na yele da taa si yi nɛnɛ syɔɔ lǎli bee ni í?

²⁷ Mii ga kapeele pye mɔ na í, mɔ wi kapeʔe kpéʔele mii na, àmɛɛ mɔ kapɛɛnni kpúmɔn ní mii ní lè. Yawe wi lè kútiijoow, woro wi yɛlɛ wi kútiiw ceri níjanʔa Isirayɛli ye ní Amɔn ye níngi ni.› »

²⁸ Syɛ́ɛnri Zyefite tun a be sáà joo Amɔn ye fànʔafɔw ma lè wi ga di lóʔo í.

Zyefite nyɔɔfaligi

²⁹ A Yawe Pǐli pye Zyefite na, a wi foro Galaadi, ní Manase ni, n sɔ̀lɔ Misipa ma wi lè Galaadi wów, níì yiri Misipa ni wi lè Galaadi wów n sɔ̀lɔ n kári Amɔn ye kurugo.

³⁰ A Zyefite nyɔɔ fàli Yawe ma níì jo: «Mɔ ga Amɔn ye le mii kɔ́yi ni,

³¹ mii ga yìri yaà Amɔn ye ma n lúru ni maa yɛɛ̀nyinge na, wee wi ga yiri mii kpáagi kpaaweele ni n mii fàra lè, wi a yaʔa kɔlɔ̀ na Yawe ma, mii si wi pye sáriga sórigoo.»

³² A Zyefite sɔ̀lɔ n kári Amɔn ye kurugo bi sa kapɛɛnni kpúmɔn ní be ní. A Yawe sáà be le wi kɔ́yi ni.

³³ A wi tɔ̀nɔ n be jáa n séli Aroyɛɛri na n fala Miniti kàbangi na, a yoro pye kèye toko fwɔɔ n sáà nan Abɛli-Kemiimi na. A Amɔn ye fǎngi kwɔ́ɔ Isirayɛli ye yɛ́ʔɛ ma.

³⁴ A Zyefite ga lúru ni maa wi kpaʔa ma Misipa ma, wéle, a wi calipili yiri ní tàmábéle ní ni yóo ni wi fàrá. Pìíw bee nibin wi da pye wi ma, nànbile wàlá calipilaa da níì pye wi ma n fàra wee bee na í.

³⁵ Wi tɛ́nɛ̀ wi nyaa lè, a wi fala n búroyi sulugu wiyɛɛ na níì jo: «Yóò! Nɔ́ɔ̄, mɔ n tɔ̀nɔ n wɔʔɔlɔ taʔa mii na. Mɔ i nyɛ mii wɔʔɔfɔbèle ni, níì cán mii n mii nyɔ́ɔgi fàli Yawe ma, mii si a gbǎn ní gi sàa í.»

³⁶ A wi wi pye: «Abaa, mɔ n nyɔ́ɔgi fàli n kwɔ́ɔ Yawe ma, gee gi yiri mɔ nyɔ́ɔgi ni lè, ki kpéʔele mi foro mii na. Níì cán mɔ nigoobèle be lè Amɔn ye, Yawe n mɔ gɔlɔ́w wòlo be na.»

³⁷ A wi wi tóow pye: «Fɔ̀lɔ mii ma kéeli naa na, loro li nyɛ, yeye siin yaʔa mii ma mii í kári sa ra nyaari nyanbeleyi na ní mii tàannyɛnjebèle ní, sáā nyaan mii nàngeele sinjánmi kéele na.»

³⁸ A wi wi yari: «Da syée.» Níì wi yaʔa wi sa yeye siin kwɔ́ɔ. A wi kári ní wi tàannyɛnjebèle ní, ní sa ni nyaan wi nàngeele sinjánmi kéele na nyanbeleyi na.

³⁹ A yéyi siin ga kwɔ́ɔ, a wi lúru n pan wi tóow ma. Nyɔɔfaligee tofɔw da kpéʔele lè, a wi baa gi foro wi na, wi si da kɔ́ɔ̀ nàngeele cán í. Lǎli bee ni kalɛɛli naa séli Isirayɛli ni,

⁴⁰ loro li nyɛ yɛɛlɛ o yɛɛlɛ Isirayɛli calipiigèle n kári sa nyɛni canya sicɛrɛ yɛ́ɛli fúngo ni Galaadi ye nǎnw Zyefite pìíw kéele na.