Heburubèle 1 - Cebaara Bible 2010

Kolocɔlɔɔ n baa joo wolo ma wi Jáaw ni

¹ Booma ni Kolocɔlɔɔ maa ni wi syɛ́ɛnri nyuu kanyaajoobèle ma, a be i di nyuu wolo tóolɛɛbèle ma làrigēle saʔa ni jooganmi féleye saʔa na,

² kàjáa wi n baa joo wolo ma wi jáaw ni cányi naa ni yi lè canzanyi. Woro bárigaw ni Kolocɔlɔɔ dulunyanw kpéʔele, níì wi télege wi pye yáriri myɛ kɔriliio.

³ Jaafɔw bee wi nyɛ lè Kolocɔlɔɔ nìjangbɔɔri darigala, ní wi niwiriw, wi bárigaw syɛ́ɛnrɛ n dulunyanw yárira myɛ tɔʔɔ n yérige. Lǎli ni wi kapeegèle jéemununɔ kpéʔele n kwɔ́ɔ lè, a wi sáà tɛ́ɛn nyɛ̀ʔɛni ni, Nìjangbɔɔri Fɔ́lɔ kàliige ma.

Jaafɔw n kpɔ́ʔɔ n sɔ̀lɔ nyɛ̀ʔɛni tundunbéle na

⁴ A Kolocɔlɔɔ mɛ́ɛgaa le wi na, gee gi kpɔ́ʔɔ n sɔ̀lɔ nyɛ̀ʔɛni tundunbéle wóyo na lè, àmɛɛ wi kpɔ́ʔɔ n sɔ̀lɔ be na lè.

⁵ Nyɛ̀ʔɛni tundunwìí má Kolocɔlɔɔ kɔ́ɔ̀ gi joo níì jo: «Mɔ wi nyɛ mii Jáaw, mii n mɔ see níjanʔa?» Ba wìí kéele na wi kɔ́ɔ̀ gi joo níì jo: «Mii a pye wi ma tofɔlɔ, wí pye mii ma jaafɔlɔ?»

⁶ Lǎli ni si Kolocɔlɔɔ da wi pìiseliw lége lè dulunyanw ni, a wi gi joo níì jo: «Ki n yɛlɛ nyɛ̀ʔɛni tundunbéle myɛ í da wi kpɔ̀ʔɔrɔ́.»

⁷ Dee wi da joo nyɛ̀ʔɛni tundunbéle kéele na lè, toro di nyɛ dee naa: «Wi i wi nyɛ̀ʔɛni tundunbéle kpéʔele káfalaya, ní i wi falipyebèle kpéʔele naanyìnye.»

⁸ Kàjáa dee wi da joo lè Jaafɔw kéele na, toro di nyɛ dee naa: «Ee, Kolocɔlɔɔ, mɔ fangoli a kòro beè làla o làla kwɔ́ɔmɔ fun.» Ní níì jo: «Sínni li nyɛ mɔ fangi kàgbeele.

⁹ Sínni n mɔ dɛ́nɛ, á kolomi mɔ bɛɛn. Koro na ee Kolocɔlɔɔ, mɔ Kolocɔlɔw n fundaanra sìnmɛ wo mɔ na n mɔ kpɔ́ʔɔ n sɔ̀lɔ mɔ pínɛnyɛnbèle na.»

¹⁰ Ní níì jo: «Kàfɔw, mɔ wi tári kpéʔele làrizelili ni. Nyɛ̀ʔɛni ní li yáriri i nyɛ mɔ kɔ́yi yakpéʔelere.

¹¹ Ti si a ba kwɔ́ɔ, mɔ si a kòro beè. Ti myɛ a ba lɛɛ àmɛɛ burogo nyɛ lè.

¹² Mɔ a di kùru àmɛɛ burogbɔʔɔ nyɛ lè, ti a kàri àmɛɛ burogo nyɛ lè, kàjáa mɔ a kòro kanijanmi na, mɔ yɛ́ɛgèle a kwɔ́ɔ bi nyaa í.»

¹³ Nyɛ̀ʔɛni tundunwìí má si Kolocɔlɔɔ kɔ́ɔ̀ gi joo làlaa faala ni níì jo: «Ba tɛ́ɛn mii kàliige ma bi taa mii í ba mɔ nigoobèle kpéʔele mɔ tɔ́lɔyi yataʔaga?»

¹⁴ Nyɛ̀ʔɛni tundunbéle myɛ o nyɛ pìigēle, gele ge Kolocɔlɔɔ fáliw kpéʔele lè ì? Wi i ge tungu syɔɔli kɔriliibéle dɛɛmɛnɛ kéele na.