Ɛsitɛri 9 - Cebaara Bible 2010

Zyefubèle gɔ̀lɔ́-wòloro

¹ Yeye kɛɛ ní siin wógi gi lè Adari yégi, ki canya kɛɛ ní taanri wógi na, a fànʔafɔw tundunro, ní wi làlwaw sɛ́bɛ syɛ́ɛnrɛ larivorolo nan. Zyefubèle nígoobéle maa ni sɔ̀ngí poro a fànʔa taa be na, kàjáa a kéeli bee si kàri, a Zyefubèle fànʔa taa be kàsiitun-nyɛ́nbèle na.

² Zyefubèle maa peyɛɛ gbóʔoro, fànʔafɔw Asyerusi tátɛɛyi myɛ kèye ni, koro ga pye bele be caa bi kapeʔe kpéʔele poro na lè, poro í kɔlɔ̀ taʔa be na. Syɔɔn faala ga gbàn n yére n tún ní be ní í, níì cán syɛɛnfeleyi myɛ maa fyáa be na.

³ Tátɛɛyi kùndigibéle myɛ, ní tátɛɛyi kàfɔɔlɔ, ní guvɛrinɛɛribèle n fàra fǎngi wáli kacɔɔnribèlē na, poro maa ni Zyefubèle dɛ̀ɛmɛ́, níì cán pe maa fyáa Maridosye na.

⁴ Ncan Maridosye maa baa pye fànʔafɔ-gbaagi syɛɛnkpɔɔwaa, wi mɛ́ɛgi maa yiri tátɛɛyi myɛ ni. Kàa maa ni fàrá Maridosye kpɔ́ʔɔli na ni syée.

⁵ A Zyefubèle pe nigoobèle myɛ kpúmɔn ní ŋɔsée ní. Pe n be kpóo, pe n tɔ̀nɔ n be kálagi. Gee ki da be dɛ́nɛ lè, a be koro kpéʔele be kàsiitun-nyɛ́nbèle na.

⁶ Suzi yagana ni, ki lè fàngegi, Zyefubèle n nànbēle saala siin ní dabata kpóo n be kwɔ́ɔ n láʔa yaà,

⁷ poro ní Parisyandata, ní Dalifɔn, ní Asipata,

⁸ ní Porata, ní Adaliya, ní Aridata,

⁹ ní Parimasyita, ní Arizayi, ní Aridayi, ní Vayezata,

¹⁰ poro be pye Hamedata jáaw Haman jáabèle kɛɛ, wi pye lè Zyefubèle kàsiitun-nyɛ́nnɛ. Koro ní ki myɛ ní pe ga yarira fuguri n láa í.

¹¹ Cángi bee tiimaa syɛ́ɛnbèle be kpóo lè Suzi ni, ki lè fàngegi, a pe be nyɔ́ɔgi tɛ̀ɛn fànʔafɔw na.

¹² A fànʔafɔw fànʔafɔjew Ɛsitɛri pye: «Zyefubèle n nànbēle saala siin ní dabata kpóo, n be kálagi Suzi ni, ki lè fàngegi, n fàrá Haman jáabèle kɛɛ na. Nyàʔá si pe a kpéʔele fǎngi tɛ́nɛmɛ tátɛɛyee wozanya ni? Nyàʔá mɔ ní i caa bi nyɛ́ɛri tɔ́ɔliw ni? Mii a ní gee bee kaan mɔ ma. Nyàʔá mɔ ní i caa gi kpéʔele? Ki a taa.»

¹³ A Ɛsitɛri wi yari: «Ki ga yɛlɛ fànʔafɔw ma wi gi yaʔa Zyefubèle bele be nyɛ lè Suzi ni, ki lè fàngegi, pe wɔ́ɔ níjanʔa wógi félege kpéʔele nyɛ̀ʔɛna, pé Haman jáabèle kɛɛ láa bi cɔ̀rɔ cɔ̀rɔli tíiyaa na.»

¹⁴ A fànʔafɔw jo gi pye kánmi bee na. A be níì làlwa kéeli bee jáari Suzi ni. A be Haman jáabèle láa n cɔ̀rɔ.

¹⁵ Zyefubèle bele be pye lè Suzi ni, a poro ní wɔ́ɔ̀ peyɛɛ gbóʔoro Adari yégi canya kɛɛ ní sicɛrɛ wógi na n nànbēle sirakele ní dabata kpóo Suzi ni, kàjáa pe ga yarira fuguri n láa í.

¹⁶ Zyefusanbèle be pye lè fǎngi tátɛɛyɛ ni, a poro peyɛɛ gbóʔoro bi kapɛɛnni kpúmɔn bi be sìíw syɔɔ. A be fànʔa taa pe nigoobèle na. A pe be kàsiitun-nyɛ́nbèle pèle sirakamayɛ taanri ní selebingéle kɔrɔsiin ní saala kagunɔ kpóo. Kàjáa pe ga yarira fuguri n láa í.

¹⁷ Koro n pye Adari yégi canya kɛɛ ní taanri wógi na. A ki ga pye canya kɛɛ ní sicɛrɛ wógi na, a be ŋɔ́n n daa níì koro pye lìigbɔɔlɔ, ní fundaanra canʔa.

¹⁸ Zyefubèle bele si be pye lè Suzi ni, poro maa kpóʔoro canya kɛɛ ní taanri wógi, ní kɛɛ ní sicɛrɛ wógi na, níì ŋɔ́n n daa canya kɛɛ ní kagunɔ wógi na níì koro pye lìigbɔɔlɔ ní fundaanra canʔa.

¹⁹ Koro na Zyefubèle bele be nyɛ lè wodɛ́ɛnbéle ní tò fun kěyi ni, a poro Adari yégi canya kɛɛ ní sicɛrɛ wógi yaʔa a gi pye fundaanra, ní lìigbɔɔlɔ, ní fɛ́tii canʔa, ní i lɛɛgéle tórogi peyɛɛ ma.

Sɔ̀ngudaara fɛ́tii sélimɛ

²⁰ A Maridosye kérigèle bee sɛ́bɛ sɛ́bɛbèle ni n tórigo Zyefubèle myɛ ma, fànʔafɔw Asyerusi tátɛɛyi myɛ ni, yee yi nùuni lè, ní yee yi léeli lè,

²¹ jàngó pe Adari yégi canya kɛɛ ní sicɛrɛ wógi ní kɛɛ ní kagunɔ wógi yaʔa yi pye fɛ́tii canya yɛɛlɛ o yɛɛlɛ.

²² Níì cán cányi bee ni Zyefubèle fànʔa taa pe nigoobèle na. Yégi bee ni be fúnyi wɔʔɔgɔ kàri fundaanra, a be kùúw káyaʔa kàri n pye fɛ́tii. A wi jo be cányi bee yaʔa yi pye lìigbɔɔlɔ, ní fundaanra canya, páā lɛɛgéle tórogi peyɛɛ ma, sáā yakaanya kaangi foomɔfɔbèle ma.

²³ Kérigèle Zyefubèle séli lè, ní gele Maridosye sɛ́bɛ lè, a be koro kpéʔele kalɛɛlɛ.

²⁴ Níì cán Haman wi pye lè Agagi wów Hamedata jáaw, woro wee wi pye lè Zyefubèle myɛ kàsiitun-nyɛ́nnɛ, woro maa gi tímana bi Zyefubèle kpóo. Wi maa Puriw wáa, gee bee n jo, wi maa gɔ̌nw wáa, koro ga pye bi be wɔʔɔ si be kpóo.

²⁵ Kàjáa lǎli ni Ɛsitɛri kári fànʔafɔw ma lè, a woro gi sɛ́bɛ n gi joo n gbàn níì jo: «Kapeegee wi da tímana Zyefubèle kánma na lè, ki n yɛlɛ gi kòro wi tiimaa nyúngi ni, pe wi cɔ̀rɔ cɔ̀rɔli tíige na, pe wɔ́ɔ wi jáabèle kpéʔele nya.»

²⁶ Koro na be cányi bee yiri Purimi, puriw mɛ́ʔɛ na. Kánmi bee na kérigèle myɛ ge kpéʔele lè, gele sɛ́bɛw tɛ̀ɛn lè, ní gee pe da nyaa lè, ní gee ki da kpéʔele be na lè,

²⁷ a Zyefubèle koro kpéʔele peyɛɛ ma kalɛɛlɛ, lee li lè li a tée sàa poro ní poro yòdaʔayi ma í n fàra bele na pe ga tan poro na lè, ncan poro a ra cányi bee siin kpéʔele fɛ́tii yɛɛlɛ o yɛɛlɛ bi yɛlɛ ní gee ní gi sɛ́bɛ lè, ní lǎli ní li tɛ̀ɛn lè,

²⁸ poro a cányi bee fɛtii yaʔa wi kòro beè yìrigèle myɛ syɛ̀ɛnnɛ ma sɔ̀ngudaara kéele narigbaʔa o narigbaʔa, ní tátɛʔɛ o tátɛʔɛ, ní kàʔa o kàʔa ni. Purimiw bee canya a tée sàa poro Zyefubèle ma í, poro yòdaʔayi a tée fɛ̀ʔɛ yi kéeli na í.»

²⁹ Fànʔafɔjew Ɛsitɛri wi lè Abisyayili pìíw, ní Maridosye wi lè Zyefuw, a poro sɛ́bɛwaa sɛ́bɛ ní be fǎngi myɛ ní jàngó bi Purimiw sɛ́bɛ siin wów bee fílige.

³⁰ A be sɛ́bɛbéle tórigo Zyefubèle myɛ ma fànʔafɔw Asyerusi fǎngi tátɛɛyɛ togoye kɔrɔni ní kɔrɔsiin ni, bele ni yɛɛ̀nyingi, ní kányɛɛgi syɛ́ɛnrɛ da sɛ́bɛ lè.

³¹ A be Purimiw bee canya kéele fílige n yɛlɛ ní yi làrigèle ní àmɛɛ Zyefuw Maridosye, ní fànʔafɔjew Ɛsitɛri da ge tɛ̀ɛn lè poro Zyefubèle, ní be yòdaʔayi na pe súnleri, ní be sùpiiwáari kéele na.

³² Ɛsitɛri kéeli n Purimiw kéele fílige, koro na li sɛ́bɛ sɛ́bɛw naa ni.