Danyɛli 9 - Cebaara Bible 2010

Danyɛli nyɛ́ɛrigi

¹ Dariyusi fǎngi yɛɛzelile na, wi lè Asyerusi jáaw, ní i nyɛ Mɛdi ye syɛɛnfelegi wówaa, woro wee wi baa pye lè Kalide ye fǎngi fànʔafɔlɔ,

² wi fǎngi yɛɛzelile na, a mii Danyɛli gi nyaa sɛ́bɛbèle ni a gi jo Zyerusalɛmi a ba kòro gurubɛɛrɛ yɛ̀ʔɛlɛ togoye taanri ní kpɔrigɔ fúngo ni. Yawe maa yɛ́ɛgèle bee nyɔ́ɔ joo kanyaajoow Zyeremii ma.

³ A mii mii yɛ́ɛgi wáa Kàfɔw Kolocɔlɔɔ ma bi nyɛ́ɛrigɛ, ní nyɛ́ɛrigboloyo kpéʔele, si súnw le, si gɔ̀nvaʔaga le burogo, si cɔnʔɔ wo niyɛɛ na.

⁴ Mii n Yawe, mii Kolocɔlɔw nyɛ́ɛri níì kapeeli joo n tɛ̀ɛn níì jo: «Ee Kàfɔw Kolocɔlɔɔ wogbɔɔw, mɔ wi lè fyáakpɔɔrɔ yáriga, mɔ i mɔ joogaanni forogi, níì kòro ni funjànga kpéʔele ní bele ní be tàmaga lè ní mɔ ní lè níì mɔ kajoodɛɛngèle sámaga n cò.

⁵ Wolo n kapeele pye, wolo n kakoloyo kpéʔele, wolo n peemɛ ní céemɛ kele kpéʔele, wolo n wàli n láʔa mɔ kajoodɛɛngèle, ní mɔ kajoo-mí-cerigèle na.

⁶ Mɔ falipyebèle be lè kanyaajoobèle, poro bele pe da ni nyuu wolo fànʔafɔbèle, ní wolo kùndigibèle, ní wolo tóolɛɛbèle, ní wolo tári syɛ̀ɛnnɛ myɛ ma mɔ mɛ́ɛgi na lè, wolo ga lóʔo be ma í.

⁷ Ee Kàfɔw, mɔ wi nyɛ sínni fɔ́lɔ, wolo wóri si i nyɛ fɛ̀ɛ́ri, àmɛɛ gi nyɛ lè níjanʔa Zyuda syɛ́ɛnbèle, ní Zyerusalɛmi ye, ní Isirayɛli ye myɛ na, poro bele be nùuni lè, ní bele tɛ́ʔɛ gi léeli lè tátɛɛyi myɛ ni, beè mɔ be nɛnɛ n tórigo lè pe sìnzinmi kapyere kéele na, dee be tɛ́ʔɛ n peyɛɛ kolo mɔ ma lè.

⁸ Ee Kàfɔw, wolo yɛ́ɛyi ni fɛ̀ɛ́ri kòro, ní wolo fànʔafɔbèle, ní wolo kùndigibèle, ní wolo tóolɛɛbèle. Níì cán wolo n kapeele pye mɔ na.

⁹ Nyínimi, ní kùsuluzyɔɔri i nyɛ Kàfɔw, wolo Kolocɔlɔw taana, àlí n wírè gi yaʔa wolo n sìnloʔomɔ kpéʔele wi na.

¹⁰ Wolo ga fɔ̀lɔ n Yawe wolo Kolocɔlɔw jóomɔ lóʔo í, si taʔa wi làlwabèle na, poro bele wi da télege n kaan wolo ma lè wi falipyebèle nyɔ́ɔyɔ ni í, pe lè kanyaajoobèle.

¹¹ Isirayɛli ye myɛ n mɔ lalwaw kálagi, níì kólogi yaʔa, pe ga mɔ jóomi lóʔo í. Lǎli bee ni dángaw kèlē ní kàligi kèlē ge sɛ́bɛ Kolocɔlɔɔ falipyew Mowizi làlwaw ni lè, a koro si wolo tɔ́n, níì cán wolo n kapeele pye mɔ na.

¹² Syɛ́ɛnree wi da joo lè wolo, ní wolo kùndigibèle kánma na, poro bele be pye wolo nyúngi na lè, wi n di foro àmɛɛ wi wɔʔɔgbɔɔgi yaʔa a gi baa too wolo na, gee gi lè gi felege ga kɔ́ɔ̀ pye nyɛ̀ʔɛni láara woboo ni í n yɛlɛ ní gee ní gi kpéʔele Zyerusalɛmi na lè í.

¹³ Ki n pye n yɛlɛ ní gi ní àmɛɛ gi sɛ́bɛ Mowizi làlwaw ni lè, a wɔʔɔgi bee myɛ too wolo na. Kàjáa wolo ga Yawe wolo Kolocɔlɔw funjànga nyɛ́ɛri í, wolo ga wàli n láʔa wolo kolomi kèlē na í, níì mɔ kányɛɛgi lóʔo í.

¹⁴ Yawe n gi kɔ̀rɔsíi níì gi yaʔa wɔʔɔgi naa í too wolo na. Níì cán Yawe wolo Kolocɔlɔw n sín wi kapyegèle myɛ ni wi kpéʔele lè, kàjáa wolo wo nyɛ wo ga wi jóomi lóʔo í.

¹⁵ Tɔ́ɔliw ni doò, Kàfɔw, wolo Kolocɔlɔw, mɔ wee wi mɔ syɛ́ɛnbèle yirige lè Ezyipiti tári ni ní mɔ séew kɔ́lɔ ní, níì mɛ́ʔɛ taa fwɔɔ n baa nan níjanʔa na, wolo n kapeele pye, wolo wo kakologi kpéʔele.

¹⁶ Ee Kàfɔw, bi yɛlɛ ní mɔ sínni kapyegèlē ní, ki n yɛlɛ mi mɔ fundanʔari, ní mɔ fundanʔagbɔɔri láʔa nya Zyerusalɛmi na, ki lè mɔ kegi ní mɔ nyanbejǎngi. Níì cán Zyerusalɛmi, ní mɔ syɛɛnfelegi n pye yafaʔala syɛ́ɛnbèle myɛ ma pe wolo màʔa lè, wolo kapeegèle ní wolo tóolɛɛbèle kolomɔ kele kéele na.

¹⁷ Koro na tɔ́ɔliw ni, ee wolo Kolocɔlɔw, ki n yɛlɛ mi mɔ falipyew nyɛ́ɛrigɛ, ní wi nyɛ́ɛrigboloyi lóʔo, mí mɔ yɛ́ɛcɔɔli gbɛ̀ɛnmɛ cáan mɔ tɛɛcǎngi wogalagiga na, miyɛɛ kéeli na, ee Kàfɔw.

¹⁸ Mii Kolocɔlɔw, líiyi cáan mi lóʔo! Nyapiigèle múgu mi wolo gurubɛɛri wéle, kěgee na mɔ mɛ́ɛgi yeri lè! Wolo o wolo nyɛ́ɛrigboloyi nyɛ́ɛri mɔ ma wolo sínnɛ kapyegèlē kéele na í, mɔ nyinigbɔɔmi kéele na wii.

¹⁹ Ee Kàfɔw, ki n yɛlɛ mi lóʔo! Kàfɔw, kùsulugi syɔɔ! Ee Kàfɔw, ki n yɛlɛ mi lóʔo, mí kérigèle bee cɔɔnri! Ki pye miyɛɛ kéeli na, ee mii Kolocɔlɔw, mɔ a kɔ́ mɔn í! Níì cán mɔ mɛ́ɛgi gi yiri mɔ kegi, ní mɔ syɛ́ɛnbèle na.»

Cégboogèle togoye taanri ní kpɔrigɔ kanyaajooro kéele

²⁰ Mii maa sèʔê pye jooli na, mii maa ni nyɛ́ɛri, mii maa ni mii kapeeli nyuu ni tèé, ní mii syɛ́ɛnbèle Isirayɛli ye kapeeli, ní i mii nyɛ́ɛrigboloyi nyɛ́ɛri Yawe mii Kolocɔlɔw ma, mii Kolocɔlɔw nyanbejànga kéele na.

²¹ N mii yaʔa jooli na mii nyɛ́ɛrigi ni, nǎnw bee, Gabiriyɛli mii da nyaa lè mii yanyaazeligi ni, a woro yìri fókaanya na kelekele n pan mii ma cângwɔɔgi nyɔ́ɔ sáriga làriwololo ni.

²² A wi baa mii tama níì joo ní mii ní níì mii pye: «Danyɛli, mii n pan tɔ́ɔliw ni bi ba mɔ tama cánni na.

²³ Lǎli ni mɔ séli mɔ nyɛ́ɛrigboloyi na lè, a syɛɛnrɛ joo mii ma, a mii si pan bi ba di joo mɔ ma. Níì cán mɔ tɔ̀nɔ́ i nyɛ syɛɛn-nidaanmaɔ. Syɛ́ɛnri sámaga mi cò, mí yanyaagi kɔ́rɔ cán.

²⁴ Cégboʔolo togoye taanri ní kpɔrigɔ n tɛ́ʔɛ mɔ syɛ́ɛnbèle ní mɔ kecangi kéele na, bi làlwaw céele yérige, si kapeegèle kwɔ́ɔ, bi sìnzinmi kapeele kusulugo fáli kpéʔele, si pan ní bàngwɔɔ sínni ní, bi ba yanyaagi ní kanyaajoobèle syɛ́ɛnrɛ foro, si sǐnmi wo Tɛɛcàndelegi na.

²⁵ Koro na ki n yɛlɛ mɔ í gi cán bi gi kɔ́rɔw cán bi cán nlaa lǎli ni syɛ́ɛnri joo lè níì jo pe ní Zyerusalɛmi télege, bi wi faan kavɔn bi taa ba nan Kùndigi Wonyɛnɛ-wòlow làribanna na, koro a pye cégboʔolo kɔrɔsiin. Zyerusalɛmi kadàlayi, ní wi wéeyi a ní sámaga télege bi ní faan kavɔn cégboʔolo togoye taanri ní siin fúngo ni. Kàjáa ki a pye funjurugogbɔɔrɔ larigéle ni.

²⁶ Cégboogèle togoye taanri ní siin kwɔ́ɔlɔ kadoʔo ma, wonyɛnɛ-wòloo a láʔa yaà, syɔɔn faala a pye ní wi ní í. Fànʔafɔbile a pan, li syɛ́ɛnbèle a ba kěgi ní tɛɛcǎngi jaa, li kwɔ́ɔmi si a ba pye ní kálagigbɔɔlɔ ní àmɛɛ cábiga nyìn n kabi lè. Kapɛɛnni a pye beè fwɔɔ bi ba nan lǎli kwɔ́ɔmɔ na. Kálagili kèlē n kɔ̀rirɔ n tímana bi kòro beè.

²⁷ Li si a bànzaa joogaanna kpéʔele ní syɛɛnnɛʔɛmɛ ní fwɔɔ bi sa nan cégboolo nibin na. Cégbooli tíla kwɔ́ɔlɔ kadoʔo ma, li a sárigaw wòlolo ní yakaanyi kéele yérige. Kálagifɔlɔ a kapeekpoloyo kpéʔele bi sa nan ki dǎnw na, fwɔɔ bi taa kálagili ní kakɔrirɔli í ba too kálagifɔw tiimaa na.»