Córolo 5 - Cebaara Bible 2010

Syɛɛnnɔnʔɔbèle yirigele kéele tɛɛkòrogi ni

¹ A Yawe gi joo Mowizi ma níì jo:

² «Ki joo mi gbàn Isirayɛli ye ma mí be pye pe yaanyɛɛnmi fɔ̀ɔlɔ myɛ yirige tɛɛkòrogi ni, n fàra syɔɔn o syɔɔn na wi ŋuu lè, n fàra wee faala na wi wiyɛɛ nɔ́nʔɔ kpóō kéele na lè.

³ Yele a be yirige tórigo tɛɛkòrogi kàdoʔo ma, n nǎnbèle pínɛ cébèle ni. Koro ga pye pe a kɔ́ tɛɛkòrogi nɔ́nʔɔ í, koro gee ni mii nyɛ lè wodɛ́ɛɔn ní be níngi ni.»

⁴ A Isirayɛli ye gi kpéʔele kánmi bee na n be yirige tɛɛkòrogi kàdoʔo ma. Gee Yawe joo Mowizi ma lè, a Isirayɛli ye gi kpéʔele.

Kolomɔ yáriga lúrugoganma kéele

⁵ A Yawe gi joo Mowizi ma níì jo:

⁶ «Ki joo Isirayɛli ye ma mí be pye: ‹ Nàɔn wàlá cɔlɔɔ ga kapeelaa faala kpéʔele syɔɔn na n kolo Yawe ma, níì kolomɔ taʔa wiyɛɛ na,

⁷ ki n yɛlɛ wi yére kapeeli ni, lee wi kpéʔele lè, yárigee kéele na wi kolo lè, wi a gi sìndɛɛgi myɛ lúrugo si gi tílaya kagunɔ wóʔo nibin fàra yaà bi kaan gi kàfɔw ma.

⁸ Syɔ́ɔnw bee kpaʔa wówaa ga pye wi o yaà bi kolomɔ kéeli bee yáriga sindɛʔɛ syɔɔ í, yárigi bee sìndɛʔɛ pe a kaan lè ki a pye Yawe wóʔo, pe a gi kaan sáriga-wòlow ma, si wɔ́ɔ sàraw bee ní kapeegèle kùsulugo fáli bàpɔlɔ fàra yaà, wee ní pe a kolomi fɔ́lɔ kapeele kusulugo fáli kpéʔele lè.

⁹ Yakaanree myɛ Isirayɛli ye ga wòlo n yaʔa kɔlɔ̀ na Kolocɔlɔɔ ma lè, ti i nyɛ sáriga-wòlow wóro, woro wee ma pe ga pan ní di ní lè.

¹⁰ Yárigee syɔɔn ga yaʔa kɔlɔ̀ na Kolocɔlɔɔ ma lè, ki i nyɛ sáriga-wòlow wóʔo, ní gee wi ga kaan sáriga-wòlow ma lè, ki i nyɛ sáriga-wòlow wóʔo.› »

Céwee na be tíri lè n jo wi n kanɔnʔɔrɔ kpéʔele

¹¹ A Yawe gi joo Mowizi ma níì jo:

¹² «Ki joo Isirayɛli ye ma mí be pye: ‹Nànwaa cɔ́ɔ ga làra wi na n wi jànváa,

¹³ nànwaa nikwɔɔ ga sínɛ ní wi ní, á kéeli bee làra nǎnw na, wi ga wiyɛɛ nɔ́nʔɔ nya làrama ni, séerafɔlɔ si ga taa wi kánmi na í, pe si ga wɔ́ɔ̀ wi cò kéeli bee tɛɛpyeʔe ni í,

¹⁴ á kayaʔa baa jée nǎnw sɔ̀ngurɔ ni, a wi céw kayaʔa pye wi na, wee wi wiyɛɛ nɔ́nʔɔ lè, wàlá a kayaʔa jée nǎnw sɔ̀ngurɔ ni, a wi céw kayaʔa pye wi na, bi gi taa wi ga wiyɛɛ nɔ́nʔɔ í,

¹⁵ nǎnw bee a pan ní wi céw ní sáriga-wòlow ma, si pan ní yakanʔa ní wi kéeli na, gi pye orizye míimɛ cúlo nibin. Wi si a kɔ́ sìnmɛ wo bi na í, wi a wɔ́ɔ kɔ́ nùndanʔa yáriga le bi ni í, níì cán kayaʔa yakanʔa gii, sɔ̀ngudaara yakanʔa gii, bi sɔ̀ngí taa kolomɔ kéele na.

¹⁶ Sáriga-wòlow a be pye pe wi nùuni yaà si ba wi yérige Yawe yɛ́ʔɛ ma.

¹⁷ Sáriga-wòlow a lòcàngaa kóo cóoro kodɔɔlɔ ni, si fànikpaagi kpaadaala támiigaa koli bi le lǒgi bee ni.

¹⁸ Sáriga-wòlow a céw yérige Yawe yɛ́ʔɛ ma, si wi nyúngi múgu yaʔa si sɔ̀ngudaari yakanʔa míimɛ le wi kɔ́yi ni, pi lè kayaagi míimɛ sáriga. Lòsorogaa si pye sáriga-wòlow kɔ́lɔ ni, gee gi dángaw taari syɔɔn na lè.

¹⁹ Sáriga-wòlow a céw kɔ́ri wi kàli si wi pye: Kapye nànwaa nikwɔɔ ga sínɛ ní mɔ ní í, n mɔ yaʔa mɔ nanw fànʔa láara ni, kapye mɔ ga wi jànváa ní sáà miyɛɛ nɔ́nʔɔ í mɔ a syɔɔ lòsorogi naa ma ki dángaw kaangi lè.

²⁰ Kàjáa n mɔ yaʔa mɔ nanw fànʔa láara ni, mɔ ga wi jànváa níì kári n sáà miyɛɛ nɔ́nʔɔ, nànwaa nikwɔɔ ga sínɛ ní mɔ ní kapye mɔ nanw ban í,

²¹ sáriga-wòlow a wi kɔ́ri wi kàli, kàligi bee si pye ní dánga ní, si wi pye: Ki n yɛlɛ Yawe í mɔ kpéʔele dánga yáriga, ní kàliga yáriga mɔ syɛ́ɛnbèle nínge ni, mɔ lɛʔɛgèle í waʔa tára, mɔ fícɛnni si fɛɛ.

²² Lǒgi naa gi maa ní dángaw ní lè koro í tɔ̀nɔ́ jée mɔ láagi ni bi mɔ fícɛnni fɛɛ, si mɔ lɛʔɛgèle waʔa táriga. Céw a gi joo si jo: Amiina! Amiina!

²³ Sáriga-wòlow a kàligi syɛ́ɛnrɛ sɛ́bɛ sɛ́bɛwaa ni, si di kurugo láʔa ní lòsorogi ní.

²⁴ Lòsorogi gi maa ní dángaw ní lè, wi a céw kɔ́ri wi gi gbaa. Lǒgi bee gi dángaw kaangi lè, ki a jée wi ni bi pye yasorogo.

²⁵ Sáriga-wòlow a kayaagi yakanʔa yirige céw kɔ́yɔ ni, bi fíige fíige Yawe yɛ́ʔɛ ma sáriga-fíigeo, si pan ní gi ní sáriga-wòlo-yafaangi ma.

²⁶ Sáriga-wòlow a kɔbonyɛnnɛ wòlo yakaangi bee míimɛ ni bi sórigo sáriga-wòlo-yafaangi na gi pye sɔ̀ngudaara yáriga. Koro kàdoʔo ma wi a náa céw kɔ́ri wi lǒgi gbaa.

²⁷ Lǎli ni wi ga céw kɔ́ri a wi lǒgi bee gbaa n kwɔ́ɔ lè, kapye wi maa wiyɛɛ nɔ́nʔɔ, kapye wi maa wi nǎnw jànváa, dángaw bee lɔ̀ʔɔ a jée wi láagi ni bi pye yasorogo. Wi fícɛnni a fɛɛ, wi lɛ̀ʔɛgèle si waʔa tára. Céw bee a pye dánga yáriga wi syɛ́ɛnbèle nínge ni.

²⁸ Kàjáa kapye céw ga wiyɛɛ nɔ́nʔɔ í, kapye wi i nyɛ fɔɔnrɔ fun, wi a córo tɛɛlɛ fun syɔ́ɔn, wi a pìibēle taa.

²⁹ Gee bee gi nyɛ làlwaw kayaagi kéele na, bi cɔlɔɔ yaʔa wi nǎnw fànʔa láara ni, wi ga wi nǎnw jànváa ní sáà wiyɛɛ nɔ́nʔɔ.

³⁰ Wàlá kayaʔa ga jée nàɔn fúngo ni wi cɔɔ̀ kéele na, sáriga-wòlow a ba céw bee yérige Yawe yɛ́ʔɛ ma, si làlwa kéeli naa myɛ kpéʔele foro wi na.

³¹ Nǎnw a pye tɛɛlɛ fun, céw si wiyɛɛ kolomi túgoro tugo.› »