Córolo 22 - Cebaara Bible 2010

ISIRAYƐLI YE, MOWABI TƐƐFIIYI NA Balaami kéeli : Fànʔafɔw Balaki n Balaami yeri

¹ A Isirayɛli ye yìri n kári n sáà tɛ́ɛn Mowabi tɛɛfiiyi na, Zyuridɛn jeligi na, Zyeriko zǐnmi na.

² Sipɔɔri jáaw Balaki si maa gi nyaa gee myɛ Isirayɛli ye kpéʔele Amɔri ye na lè.

³ A Mowabi tɔ̀nɔ n fyáa gbanʔama syɛɛnnɛnʔɛmi bee na. Isirayɛli kéeli maa tɔ̀nɔ n pye zɔ̀nviikɔnirɔ Mowabi na.

⁴ A Mowabi gi joo Madyan wolɛɛbèle ma níì be pye: «Yáriri myɛ di wolo màʔa lè, syɛ́ɛnmi naa a di káa tɔ́ɔliw ni àmɛɛ náapɛɛlɛ sìnbirige nyàápungo káa lè.» Sipɔɔri jáaw Balaki wi da pye Mowabi fànʔafɔw lǎli bee ni.

⁵ A wi si tundunbéle tórigo Beyɔɔri jáaw Balaami ma wi pye lè Petɔɔri ni, cábigi nyɔ́ɔ na, wi tóow tára ni, jàngó pe sa wi yeri pé wi pye: «Wéle, syɛ́ɛnbèle pèle i naa, pe n yìri Ezyipiti ma ni tásaligi tɔ́ngi ni maa, ní baa tɛ́ɛn mii zǐnmi na.

⁶ Mii i mɔ nyɛ́ɛri da maa mi ba syɛ́ɛnbèle naa dánga mii ma. Níì cán pe fǎngi n nɛʔɛ mii wógi na. Dɔ̀ʔɔ́ koro ga pye mii a fànʔa taa be na bi be jáa, si be nɛnɛ yirige tári ni. Níì cán mii n gi cán mɔ ga dùba kpéʔele wee ma lè, wee bee n dùba taa. Wee si mɔ ga dánga lè, wee bee a wɔ́ɔ dánga.»

⁷ A Mowabi wolɛɛbèle ní Madyan wolɛɛbèle kári ní kpɔʔɔrɔ ní, dee félege ní be kanyaaɔ kpɔ́ʔɔgi lè. A be sáà nan Balaami na níì Balaki syɛ́ɛnri joo wi ma.

⁸ A Balaami be pye: «Ki n yɛlɛ ye syɔ́ɔn naa, gee Yawe ga joo mii ma lè, koro mii a joo yele ma.» A Mowabi kùndigibèle kòro yaà ní Balaami ní.

⁹ A Kolocɔlɔɔ pan Balaami ma n baa wi pye: «Bɛ̀lɛ́ be nyɛ nǎnbèle naa ní mɔ ní mɔ tɛ́ɛgi ni ?»

¹⁰ A Balaami Kolocɔlɔɔ yari : «Sipɔɔri jáaw Balaki wi lè Mowabi fànʔafɔw, woro wi be tun naa mii ma, níì jo pe ba mii pye:

¹¹ ‹Wéle, syɛ́ɛnbèle pèle i naa, pe n yìri Ezyipiti ma ni tári yɛ́ʔɛ tɔ́ngi ni maa. Koro na da maa mi ba be dánga mii ma. Dɔ̀ʔɔ́ kánmi bee na mii a gbǎn kapɛɛnnɛ kpúmɔn ní be ní si be nɛnɛ.› »

¹² A Kolocɔlɔɔ Balaami yari : «Mɔ a kɔ́ kári ní be ní í. Mɔ a kɔ́ syɛ́ɛnbèle bee dánga í, níì cán pe i nyɛ dùba pìibēle.»

¹³ A Balaami sɔ̀li n yìri nyǐngi nyɔ́ɔ na n gi joo Balaki kùndigibèle ma níì be pye: «Yaa syée yele tári ma. Níì cán Yawe n cée wi ga fɔ̀lɔ bi mii yaʔa mii í kári ní yele ní í.»

¹⁴ A Mowabi kùndigibèle yìri n lúru n kári Balaki ma n sáà wi pye: «Balaami n sáà cée wi ga fɔ̀lɔ bi pan ní wolo ní í.»

¹⁵ A Balaki níì kùndigibèle pèle nikwɔɔlɔ tórigo, poro maa nɛʔɛ n sɔ̀lɔ wozelibèle na, a be mɛ́ɛyi kpólo n sɔ̀lɔ wozelibèle wóyo na.

¹⁶ A be sáà nan Balaami na níì wi pye: «Sipɔɔri jáaw Balaki n jo: ‹Yafyɛn a kɔ́ mɔ yérige panni na mii ma í.

¹⁷ Níì cán mii a ba mɔ kpɔ́ʔɔ gbanʔama. Yárigee faala mɔ ga joo lè, mii a gi kpéʔele. Mii i mɔ nyɛ́ɛri, da maa mi ba syɛ́ɛnbèle naa dánga mii ma.› »

¹⁸ A Balaami gi joo Balaki falipyebèle ma níì be pye: «Alí Balaki ga wi kpáagi nyìn wálifiiw ní tɛ́ɛw na n kaan mii ma, mii a gbǎn kakpɔɔlɔ wàlá kapiipiile kpéʔele bi Yawe mii Kolocɔlɔw syɛ́ɛnrɛ kána dee wi joo n gbàn lè í.

¹⁹ Tɔ́ɔliw ni, mii i yele nyɛ́ɛri, ki n yɛlɛ yele í wɔ́ɔ kòro naa yébiligi naa ni, koro ga pye gee Yawe a ní joo mii ma lè, mii í gee bee cán.»

²⁰ A Kolocɔlɔɔ pan Balaami ma yébiligi ni n baa wi pye: «Amɛɛ syɛ́ɛnbèle naa pan ba mɔ yeri lè, yìri maa syée ní be ní, kàjáa gee mii ga joo mɔ ma lè, mi koro yagana kpéʔele.»

²¹ A Balaami sɔ̀li n yìri n yatɛ́ɛnni taʔa wi jòfanicaagi na n kári ní Mowabi kùndigibèle ní.

Balaami jòfanicaagi kéele

²² A Kolocɔlɔɔ fúngi tanʔa gbanʔama wi kárili kéele na. Balaami si maa pye wi jòfaniw na, wi falipyebèle siin si i nyɛ ní wi ní. A Yawe nyɛ̀ʔɛni tundunwaa baa yére kólogi ni bi tɛɛsɔ̀lɔgi tɔ́n wi na.

²³ A jòfaniw Yawe nyɛ̀ʔɛni tunduɔn nyaa woyéreo ní kólogi ni. Wi ŋɔséew si i nyɛ wowaaɔ ní kɔ́gi ni. A jòfaniw wàli n yiri kólogi ni n jée séyi ni. A Balaami jòfaniw kpúmɔn bi wi lúrugo lége kólogi ni.

²⁴ A Yawe nyɛ̀ʔɛni tunduɔn sáà yére kobile ni ɛrɛzɛn séye nínge ni, gunyo si i nyɛ kólogi kàbanya siin na.

²⁵ A jòfaniw Yawe nyɛ̀ʔɛni tunduɔn nyaa, níì kári n sáà sígi gúngi na níì Balaami tɔ́lɔgi fari n tánga gúngi na. A Balaami níì wi kpúmɔn.

²⁶ A Yawe nyɛ̀ʔɛni tunduɔn níì kári léelige n sáà yére tɛɛgbɛ̀dɛlɛ ni, beè lè tɛɛkàrila o nyɛ bi kári kàliige wàlá kàmɔnɔ ma í.

²⁷ A jòfaniw ga Yawe nyɛ̀ʔɛni tunduɔn nyaa, a wi tìgi n sínɛ ní Balaami ní. A Balaami fúngi tɔ̀nɔ n tanʔa, a wi jòfaniw kpúmɔn ní wi kàgbeeli ní.

²⁸ A Yawe jòfaniw nyɔ́ɔ múgu, a jòfaniw Balaami pye: «Nyàʔá mii pye mɔ na, á mɔ mii kpúmɔn n taa tɔlɔyɔ taanri?»

²⁹ A Balaami jòfaniw yari: «Níì cán mɔ n miyɛɛ nyɛ́nɛ mii na. Ŋɔsée ga maa caà pye mii kɔ́gi ni, mii mǎà dée mɔ kpóo lǎli naa ni.»

³⁰ A jòfaniw Balaami yari: «Mii ban wi nyɛ mɔ jofaniw ì, wee na mɔ téē tɛ̀ɛ́n lè làla o làla fwɔɔ n baa nan níjanʔa na ì? A mii tàli lé ni gee naa félege kpéʔele ní mɔ ní ?» A wi jo: «Eʔe.»

³¹ A Yawe Balaami nyapiigèle múgu, a wi Yawe nyɛ̀ʔɛni tunduɔn nyaa woyéreo ní kólogi ni. Wi ŋɔséew si i nyɛ wowaaɔ ní kɔ́gi ni. A Balaami tìgi n too n wi yɛ́ɛgi cíbele tári na.

³² A Yawe nyɛ̀ʔɛni tunduɔn gi joo Balaami ma níì wi pye: «Nyàʔá na mɔ mɔ jofaniw kpúmɔn n taa tɔlɔyɔ taanri? Wéle, mii wi da pan n baa kólogi tɔ́n mɔ na. Níì cán mii n mɔ nyaa kálagila kólogo ni.

³³ A jòfaniw mii nyaa níì wàli n yiri n kwɔ́ɔ mii yɛ́ʔɛ ma tɔlɔyɔ taanri. Kapye wi da wàli n yiri mii yɛ́ʔɛ ma í, mii mǎà dée caa mɔ kpóo kwɔ́ɔ si wi yaʔa sìi na.»

³⁴ A Balaami gi joo Yawe nyɛ̀ʔɛni tunduɔn ma níì wi pye: «Mii n kapeele pye, níì cán mii da gi cán mɔ n baa yére kólogi ni mii yɛ́ʔɛ ma í. Tɔ́ɔliw ni doò kapye tánʔani naa kéele n mɔ bɛɛn, mii a lúru.»

³⁵ A Yawe nyɛ̀ʔɛni tunduɔn Balaami pye: «Da syée ní nǎnbèle naa ní. Kàjáa syɛ́ɛnree mii ga sáà joo mɔ ma lè, toro yagana mɔ a jo.» A Balaami kári ní Balaki kùndigibèle ní.

Balaki n baa Balaami fàra

³⁶ Balaki gi lóʔo lè Balaami i yaà ni maa, a wi yiri n sáà wi fàra fwɔɔ Mowabi kěgi ma, ki nyɛ lè Arinɔn láʔagologi na n sogi láʔagologi na.

³⁷ A Balaki Balaami pye: «Mii ban wi syɛ̀ɛnnɛ tun pe sa mɔ yeri ì? Nyàʔá na mɔ da pan mii ma í? A koro joo lé mii a dée gbǎn ba mɔ kpɔ́ʔɔ wii í?»

³⁸ A Balaami Balaki yari: «Tɔ́ɔliw ni, mii wi pan wee mɔ ma, a mii si a gbǎn yarigaa faala joo lé ? Syɛ́ɛnree Kolocɔlɔɔ ga le mii nyɔ́ɔgi ni lè, toro mii a joo.»

³⁹ A Balaami kári ní Balaki ní, a be sáà nan Kiiriyati-Husɔti na.

⁴⁰ A Balaki yaweekpologèlē ní yaweeyiligēle wòlo sáriga, níì kaaraa tórigo Balaami ní kùndigibèle ma be pye ní wi ní lè.

Balaami n dùba kpéʔele Isirayɛli syɛ́ɛnbèle ma

⁴¹ A ki ga pye nyǐngi nyɔ́ɔ na, a Balaki Balaami kɔ́ri n sáà lúgu ní wi ní Bamɔti-Baali na. N wi yaʔa yaà beè, a wi Isirayɛli syɛ́ɛnbèle lɛ̀ʔɛgɔgaa nyaa.