Kɔlɔsi ye 1 - Cebaara Bible 2010

Fòów kéele

¹ Mii Pɔli, wi lè Kirisi Zyezu pìituɔn n yɛlɛ ní Kolocɔlɔɔ nyɛ́nɛ kéeli ní, mii ní wolo senyɛnw Timɔte ní,

² wolo a sɛ́bɛw naa tórigo yele ma, yele bele ye nyɛ lè Kolocɔlɔɔ syɛɛncanbéle Kɔlɔsi ni, ní i nyɛ wolo senyɛ̀nnɛ, ní wɔ́ɔ i nyɛ tágala syɛɛnnɛ Kirisi ni, ki n yɛlɛ wolo Tóow Kolocɔlɔɔ í kpɔ́ʔɔri ní fûnnyingi kaan yele ma!

Bariga kaanni nyɛ́ɛrigɛ

³ Wolo i bariga kaangi Kolocɔlɔɔ ma wi lè wolo Kàfɔw Zyezu Kirisi Tóow, ní i wi nyɛ́ɛri làla o làla yele kéeli na.

⁴ Níì cán àmɛɛ yele tága lè Kirisi Zyezu na, ní àmɛɛ yele tàmaga le ní Kolocɔlɔɔ syɛɛncanbèle ní lè, pe n gee bee joo a wolo gi lóʔo.

⁵ Gee bee n taa yele sɔ̀ngumi tɛɛtaʔaga báriga ni, gee gi nyɛ lè wogɔngɔ ní yele ma nyɛ̀ʔɛni na, kányɛɛgi syɛ́ɛnrɛ ti lè Syɛɛnjóocǎnri, toro di baa sɔ̀ngumi bee tɛɛtaʔaga tɛ̀ɛn yele na lǎli ni yele sélì di lóʔo lè.

⁶ Syɛɛnjóocǎnri bee n nan yele na, àmɛɛ di wɔ́ɔ̀ nan lè dulunyanw tɛ́ɛyɛ myɛ na. Ti i yasanra sangi ní i caragi dulunyanw tɛ́ɛyɛ myɛ ni, àmɛɛ di wɔ́ɔ̄ gi kpéʔele lè yele níngi ni, nlaa cángee na yele sélì Kolocɔlɔɔ kpɔ́ʔɔri kéele lóʔo lè níì di cán n fílige kányɛʔɛ ni.

⁷ Epafirasi wi yele tama Syɛɛnjóocǎnri bee na, wi lè wolo syɛɛn-nidaanmaɔ ní wolo pulonyɛnnɛ. Wi i nyɛ tágala syɔ́ɔn Kirisi fáliw ni wi kpéʔele yaà lè yele ma wolo sìndɛɛgi ni.

⁸ Tàmagi Pìicǎnni kaan yele ma lè, woro wi baa gi kéeli joo n tɛ̀ɛn wolo na.

⁹ Gee bee na nlaa cángee na wolo yele kéeli lóʔo lè, a wolo wɔ́ɔ̀ kòro ni Kolocɔlɔɔ nyɛ́ɛri yele kéeli na sìnlaʔa ni, wolo i wi nyɛ́ɛri koro ga pye Pìicǎnni sícilimɛ ní li kérigèle cánna myɛ í yele fúnyi nyìn, jàngó yele í Kolocɔlɔɔ nyɛ́nɛ kéeli fílige cán.

¹⁰ Ki ga pye nya, kánmee na Kàfɔw caa yele í da táanri lè, yele a gbǎn ra táanri kánmi bee na, yele kérigèle myɛ sáā wi dàán, yele sáā yasanra sangi kapyejǎngèle myɛ ni, kàa sáā fàrá yele na Kolocɔlɔɔ cánni kàbaan na.

¹¹ Wolo i Kolocɔlɔɔ nyɛ́ɛri koro ga pye yele í nìri si fànʔa taa kérigèle myɛ na wi nìjangbɔɔri séekpɔɔɔ báriga ni, jàngó kpàracogi ní fûnnyingi myɛ si pye yele ma,

¹² yele sáā bariga kaangi ní fundaanra ní Tofɔw Kolocɔlɔɔ ma, woro wee wi yele sámaga lè, koro ga pye yele í lɛɛlɛ taa wi syɛɛncanbèle kɔ́rigɔ ni gbɛ̀ɛ́nmi tɛ́ʔɛ ni.

¹³ Wi n wolo yirige yébilimi fànʔa ni níì wolo lége wi Pìinidaanmaw fànʔa ni,

¹⁴ woro wee ni wolo nyùnzyɔɔri taa lè, ti lè kapeegèle kùsulugo syɔɔlɔ.

Kirisi ní wi fáliw kéele

¹⁵ Kolocɔlɔɔ wi lè syɔɔn o wi nyaagi í, wi Jáaw wi nyɛ wi niwiriw, woro wi nyɛ Kolocɔlɔɔ pìiseliw wi yakpéʔeleri myɛ yɛ́ʔɛ na.

¹⁶ Níì cán woro bárigaw ni Kolocɔlɔɔ yáriri myɛ faan, nyɛ̀ʔɛni wóro, ní tári wóro yoo, yanyaari, ní dee di lè syɔɔn a gbǎn di nyaa í yoo, kàfɔbèle, ní kùndigibèle, ní fànʔafɔbèle, ní séekpɔɔw fɔ̀ɔlɔ yoo, woro bárigaw ni, ní woro kéeli na Kolocɔlɔɔ ti myɛ faan.

¹⁷ Jaafɔw maa téè pye yaà yáriri myɛ yɛ́ʔɛ na, ti myɛ n tiyɛɛ cò n yére wi bárigaw ni.

¹⁸ Woro wi nyɛ céri nyúngo di lè Egiliziw, ní i nyɛ sélimi, ní wɔ́ɔ̀ pye wozeliw, wee wi nyán n yiri lè kúbèle nínge ni, jàngó bi pye yáriri myɛ yɛ́ʔɛ na.

¹⁹ Níì cán kánmee na Kolocɔlɔɔ nyɛ lè, ki n wi dɛ́nɛ, a wi kánmi bee myɛ yaʔa bi kòro woro Jáaw ni.

²⁰ Tofɔw n yáriri myɛ bɛ̀ɛ ní wiyɛɛ ní wi Jáaw báriga ni, tári yárira yoo, nyɛ̀ʔɛni wóro yoo, wi n bɛ̀ɛlɛ lége woro ní yáriri bee myɛ nínge ni wi Jáaw sìsyaan báriga ni wi wo lè tiiparigi na.

²¹ Gee si gi yele kéeli kwɔ́ɔ lè, yele maa sélì pye Kolocɔlɔɔ téefɔɔlɔ ní wi nigoolo yele fúnyi ni kapeebyeri báriga ni.

²² Tɔ́ɔliw ni, Kirisi n yele bɛ̀ɛ ní Kolocɔlɔɔ ní wi tiimaa kùúw báriga ni céri kàbaan na, koro ga pye bi yele tɛ̀ɛn Kolocɔlɔɔ na, wi yele córo wojanbéle ní, si wɔ́ɔ yele córo tɛɛlɛ fun, ní dìgire fun,

²³ ní yele ga tɛ́nɛ̀ kòro tágali ni níì yeyɛɛ daʔa li na níì nìrimɛ le, yele si ga wɔ́ɔ̀ láʔa sɔ̀ngumi tɛɛtaʔaga na í, gee yele taa lè Syɛɛnjóocǎnri ni yele lóʔo lè í, toro dee di joo syɛ́ɛnbèle myɛ ma lè dulunyanbo, a mii Pɔli tiimaa wɔ́ɔ baa pye ti joofɔwaa.

Fáliw wi kaan Pɔli ma lè Egiliziw nyɔɔnɔ kéele na

²⁴ Mii i fundaanra kpéʔele tɔ́ɔliw ni àmɛɛ mii fɔ̀rɔgí lè yele kéeli na, àmɛɛ Kirisi da ni wɔʔɔ lè, gee gi sèʔê fɔ̀n lè wɔʔɔyi bee ni, mii i gee bee forogi wi céri kéele na di lè Egiliziw, àmɛɛ mii fɔ̀rɔgí lè mii céri ni.

²⁵ Mii n baa pye Egiliziw falipyeo n yɛlɛ ní fáliw ní, wee Kolocɔlɔɔ kàlifáa mii ma lè yele kéeli na. Fáliw bee wi nyɛ mii í da woro syɛ́ɛnri myɛ nyuu yele ma.

²⁶ Kolocɔlɔɔ maa syɛ́ɛnri bee làriga syɛ́ɛnbèle myɛ na nlaa yaà làridɔɔnnɔ ni, kàjáa tɔ́ɔliw ni wi n di tɛ̀ɛn wi syɛɛncanbèle na,

²⁷ bele na wi da ni caa lè bi kalarali bee nìjanra kpɔ́ʔɔrɔ tɛ̀ɛn lè syɛɛnfeleyi nínge ni, kalarali bee li nyɛ àmɛɛ Kirisi nyɛ lè yele fúnyi ni, koro gi nyɛ nìjangbɔɔri sɔ̀ngumɔ tɛɛtaʔaga.

²⁸ Kirisi kéeli wolo nyuu ní i syɛ́ɛnbèle myɛ sàmí, ní i pe myɛ tama sícilimi myɛ ni, koro ga pye wolo í gbǎn pe myɛ nibin nibin tɛ̀ɛn Kolocɔlɔɔ na be pye wozinvorobéle ní Kirisi ni.

²⁹ Gee bee na mii ŋàʔaná ni báara ni yɛlɛgi ní wi fǎngi ní gi báara mii ni lè gbanʔama.