Proverbios 7 - Tsimane

Mọꞌ rụijsis dyijyedyeꞌ ñutschusinꞌ juchajyaꞌ

¹ Ạvaꞌ, jämꞌ raꞌ seꞌvibutiꞌ mi ọij p̂eyacdyeꞌ soꞌmeyes yụ, mọꞌ raꞌ jiꞌsiteꞌ mi ĉojtyiꞌĉan.

² Chiquevaꞌ ọij jutacdyeꞌ jéyes yụ paj qui mọꞌ tsạꞌchun. Mọꞌ yụꞌtacdyeꞌ anic mọjoꞌchaꞌ yaꞌiꞌ, yojdyemꞌ jämꞌ ĉujcati vejyaꞌ u mi, meꞌdye raꞌ mọꞌ chiqueꞌ mi mọꞌ yụꞌtacdyeꞌ.

³ Jam raꞌ damꞌ farajjeꞌ mi ọij jiꞌchäyitidyeꞌ, jeñej buꞌyiꞌ aty sánac ĉojtyiꞌĉan mi judyeyaꞌ aty panac un mi, meꞌ raꞌ jam farajjeꞌ mi dyijyedyeꞌĉan.

⁴ Meꞌ raꞌ dyijtuiꞌ mi mọꞌ rụijsis dyijyedyeꞌ, paj qui mọꞌ jeñej buꞌyiꞌ vojiꞌ shupquiꞌ mi, judyeyaꞌ mọꞌ rụijsis chị́dyeꞌ paj qui mọꞌ jeñej buꞌyiꞌ ĉụiꞌsiꞌ chätidyeꞌ mi, meꞌ raꞌ räjĉan dyijtuiꞌ mọꞌ mi.

⁵ Meꞌ raꞌ mi paj qui mọꞌ rụijsis dyijyedyeꞌ ñutschun mi paj qui jam voꞌvoij mi, paj qui jam jụjjebiꞌ mi mọꞌsiꞌ jiꞌmaꞌyacdyes p̂eyacdyeꞌ mọꞌ.

Junꞌ chuc carijtaquiꞌ mọꞌ voꞌvoiꞌsiꞌ p̂en

^6-7 Yirisĉan mạyedyeꞌ acaꞌĉan bäꞌvaꞌjoij yụ. Ĉụiꞌdye ventanayaꞌ nạijte yụ yirity nanaty, anic itŝity dyijyedyeꞌ.

⁸ Cayeĉan tyeij judyeyaꞌ chaꞌshebiꞌ dochtidyeꞌ cayes mọꞌ, yóyaꞌdyemꞌ bäꞌyiꞌ mọꞌ meꞌsis p̂en o.

⁹ Jurumyejoiꞌ shupqui sóbaqui muꞌ nanaty, aty raꞌ tomajyejoiꞌ, muꞌyaꞌ muꞌ tyeij jiyi.

¹⁰ Repjeĉunꞌte vatyquej mọꞌ p̂en, täcñityĉan quịꞌsiꞌ mọꞌ, joꞌmetyĉan meꞌtaquiꞌ, aꞌc̣histum ĉojtyiꞌĉansiꞌ dyijyedyeꞌ ayij mọꞌ.

¹¹ Ọyaꞌquiꞌdyiꞌ mijam chicacsiꞌ mọꞌ, chimeꞌdye jam p̂utscuiꞌ.

¹² Meꞌ meꞌ natiꞌ, prasayaꞌ jịjcaiꞌ räj caye socorꞌjeꞌ chimeꞌ bisacsiꞌ joꞌmeiꞌve sonꞌ in.

¹³ Nạijte mọmoꞌ noq̂uenꞌ tŝọ́tyete judyeyaꞌ pụꞌsete,

¹⁴ Mijam tsị́caiꞌ. Jéte: "Q̂uinꞌ aty jiꞌcoꞌshayeꞌ yụ cuꞌdyeꞌ Jenꞌdyes, yoj yiꞌdyemꞌ Jenꞌsiꞌ p̂eyacdyeꞌ um, aty mọꞌyaꞌ shush yụ́sĉan acaꞌ, mọꞌ raꞌ jebejaꞌ.

¹⁵ Meꞌdyes ayij yụ, mi ĉọshye, rụijdye dạquishye.

¹⁶ Aty jubiiꞌ yụ, muꞌ p̂urꞌtyity yụ lino, anic yaꞌijtyiꞌ, Egiptoĉan jämity muꞌ.

¹⁷ Jibij yụꞌtyeyete yụ jẹrejres, mọꞌsiꞌ tịj jẹrejressiꞌ mọꞌin mirra, judyeyaꞌ áloe judyeyaꞌ canela.

¹⁸ Acatubajshaꞌ, yụ́tum raꞌ ĉọshi mi, dyutsenꞌjejaꞌ raꞌ q̂uinꞌ tsedyedyeꞌ maꞌjojaꞌ yiriꞌyaꞌ.

¹⁹ Anꞌdyemꞌ itŝij vämtyiꞌ yụ, aty sacti muꞌ, moch jịjcaij nati muꞌ,

²⁰ daiꞌ cạqui querec̣ha yirity obota mendye raꞌ muꞌve tyäpi, dyuts raꞌ ịvaj, q̂uinꞌdyemꞌ ca raꞌ muꞌ caꞌñibun, meꞌ yiꞌ mọꞌ p̂eyaqui aꞌc̣histumsiꞌ dyijyedyeꞌ mọꞌ p̂en, jéte muꞌ nanaty jiꞌmaꞌyete.

²¹ Joꞌmesyaꞌ seꞌ jaꞌyete ạꞌnisyaꞌ p̂eyacdyeꞌ mọꞌ. Aniꞌ aniꞌ yiꞌ p̂eyaquiꞌ mọꞌ meꞌĉandye seꞌ jaꞌyete muꞌ nanaty.

²² Yiristum mọmoꞌ muꞌ cäc̣häꞌchuiꞌ mọꞌ p̂en. Jeñej yirity vóye cäc̣häꞌchute muꞌ muntyiꞌ bijodyeꞌve jịjcaijtyiꞌ, meꞌ buꞌyi muꞌ nanaty cäc̣häꞌchuiꞌ mọꞌ p̂en. Jeñej yiris báchona quepyisĉan tŝọiꞌsiꞌ,

²³ ĉojtyiꞌyaꞌ chipjeyac, meꞌ buꞌyiꞌ shupqui muꞌ nanaty. Yojdyemꞌ yiris jaijtyiꞌ sạjiꞌcheꞌ tŝọiꞌsiꞌ mijam chịꞌ junꞌ chuc raꞌ säñiꞌ, meꞌ raꞌ muꞌ chimeꞌ muꞌ nanaty jam chịj junꞌ chuc raꞌ ñịbedyes jịꞌĉojtyeꞌ muꞌ.

²⁴ Mọꞌdyes ạvaꞌ, jämꞌ raꞌ seꞌvibutim p̂eyacdyeꞌ yụ.

²⁵ Jam raꞌ jeijmuñi ĉojtyiꞌĉan mi jämꞌsiꞌyaꞌ dyijyedyeꞌ, mijam raꞌ cäc̣häꞌchubiꞌ majmi mi mọꞌsimꞌ, mijam raꞌ cäc̣häꞌchubiꞌ chimem dyijyedyeꞌ mọꞌ.

²⁶ Daiꞌ mọꞌ jiꞌpenacsiꞌ mọꞌ meꞌsis p̂en, daiꞌ sänꞌdyeꞌĉan yụꞌtacsiꞌ mọꞌ,

²⁷ muꞌin ĉọcbity acaꞌ in tŝijĉandyety raꞌ in.