Proverbios 5 - Tsimane

Där tsäquiꞌ mọꞌ Voꞌvodyeꞌ

¹ Ạvaꞌ, jämꞌ raꞌ seꞌvibutiꞌ mi ọij jiꞌchäyitidyeꞌ soꞌmeyes yụ, mọꞌ rụijsis dyijyedyeꞌ tuyinsiꞌ.

² Mọꞌ raꞌ jiꞌchäyin mi junꞌ chuc raꞌ rụij ĉujcati judyeyaꞌ rụijsis p̂eyacdyeꞌ jiꞌshupqueꞌ mi chimeꞌ.

³ Areꞌĉa mọꞌ meꞌtaquis p̂en, anic ạꞌniiꞌ chụꞌ mọꞌ, jeñej yiris cạvdyis. Chịꞌ seꞌ jaꞌyisinꞌ jiꞌmaꞌyacdyesyaꞌ p̂eyacdyeꞌ.

⁴ Ạꞌniiꞌtyiꞌ ĉọ́jaꞌ cạvejaꞌyaꞌ, chat qui jụjtyejaꞌ jụijyaꞌ, jäquiꞌve qui namꞌ ayij mọꞌ ñịbedyes, jeñej nassiꞌ ĉätinꞌdyemꞌ judyeyaꞌ coc̣hinos, meꞌ buꞌyiꞌ mọꞌ areꞌyedyemꞌ.

⁵ Muꞌin cäc̣häꞌchuiꞌtyiꞌ in meꞌsis p̂en, sänꞌdyeꞌĉandyety in, aty meꞌdyetydye yụꞌtac in.

⁶ Mọꞌ jam jịjcaiꞌ tsạꞌchucsis majmi, monꞌdyeꞌĉan bäꞌyis, mijam ĉútiꞌ.

⁷ Mọꞌdyes, ạvaꞌ, seꞌvibutiꞌ ram ọij p̂eyacdyeꞌ yụ, jam raꞌ vaꞌquicbutim.

⁸ Ĉaꞌjoyevaꞌ mọꞌ meꞌsis p̂en, pạrejyeva mi moch, mijam raꞌ ĉọcbiꞌ acaꞌ mi.

⁹ Yoctyis p̂en meꞌtyeꞌ jụijyaꞌ mi, aty qui raꞌ jam timaꞌcac mi muntyiꞌyaꞌ in, judyeyaꞌ raꞌ chimeꞌ räj jedyeꞌ mi meijjityin in. Meꞌ raꞌ tsanꞌ fer carijtaqui mi mọꞌdyes, tas qui na ramꞌ chutyin in juchadyes mi.

¹⁰ Muꞌindye raꞌ meijjityin in yoctyiꞌ muntyiꞌ in, muꞌin qui raꞌ meꞌchububun in jedyeꞌ mi, mọꞌ ferdyeꞌyaꞌ jäqueꞌsiꞌ jiquej mi.

¹¹ Ñịbeꞌ raꞌ cạveꞌ mi, fer raꞌ areꞌreiꞌ aꞌ mi juchadyes jiquej mi. Anic raꞌ tári mi aty raꞌ säñiyaꞌ mi.

¹² Jäquiꞌve raꞌ yi mi: "Itŝity dyijyedyeꞌ jiquej yụ, anic fạ́queꞌ jiquej yụ mọꞌ rụijsis jiꞌchäyitidyeꞌ, äcäijjeꞌsiꞌ jiquej yụ mọꞌ jịꞌchuiꞌtaquis p̂eyacdyeꞌ.

¹³ Jam mạꞌjeꞌ seꞌvacsi yụ miꞌin jiꞌchäyintyiꞌ yụ in.

¹⁴ Där ñịbeꞌ cạveꞌ yụ, anic tsịcaꞌ yụ muntyisyaꞌ vej muꞌin", jäquiꞌve raꞌ yi mi.

Ĉụiꞌsiꞌtum raꞌ p̂en bäꞌyi mi

¹⁵ Jajrejaꞌ jụijyaꞌ tsun, tupuj ĉụiꞌsiꞌ ojñiꞌ noriaĉansiꞌ tsun tyéjaꞌ, meꞌ buꞌyiꞌ mọꞌ cạiꞌ p̂eyacdyeꞌ tupuj ĉụiꞌsimꞌ p̂en dyijtuĉaꞌ.

¹⁶ Jam raꞌ yocsiꞌ p̂en quevacsi mi mijam raꞌ mọꞌintum ĉọshi mi.

¹⁷ Mijam raꞌ yocsiꞌ p̂en ạvaꞌyeꞌ mi, ĉụiꞌsiꞌtum ramꞌ p̂en bäꞌyi mi.

¹⁸ Maꞌjotaqui raꞌ ĉụiꞌsiꞌ p̂en mi, yócheꞌdyemꞌ vämicheꞌ um nanatydyemꞌ jiquej mi. Jeñej yiris noria jam jayejjotaquis jämꞌsiꞌ ojñiꞌ mọꞌ, meꞌdye raꞌ mijam jayejjoiꞌ maꞌjodyeꞌ mi p̂encheꞌ mi.

¹⁹ Där raꞌ jämꞌsiꞌ p̂en ĉọ́qui mi, yojdyemꞌ yiris ñej cạveꞌyaꞌ mi. Räjĉan raꞌ maꞌjotaqui p̂en mi, jam raꞌ jụꞌñisĉan mạyedyeꞌ jayej mạꞌjitidyes mi mọꞌtum.

²⁰ Ạvaꞌ, jam raꞌ ạꞌniiꞌ ĉọiꞌ mi yocsiꞌ p̂en, mijam raꞌ c̣hobepte mi yoctyis p̂en muꞌ.

²¹ Ayoꞌ tsun räj cavibusinꞌ dyijyedyeꞌ tsun, junꞌ chuc bäꞌjaꞌ tsun, räj mọꞌ chäyibusinꞌ muꞌ.

²² Ĉụiꞌsiꞌ ac̣hiꞌyedyeꞌ jaꞌac̣hiꞌti muꞌ ac̣hiꞌyity muntyiꞌ, jeñej ĉụiꞌsiꞌ quepyis muꞌ, meꞌ buꞌyiꞌ. Ĉụiꞌsiꞌ juchaj muꞌ jeñej buꞌyiꞌ c̣hocoꞌtactyiꞌ jayuꞌti.

²³ Muꞌ ac̣hiꞌyity muntyiꞌ itŝiꞌ dyijyedyeꞌ muꞌ, mọꞌdyes qui meꞌ monꞌdyeꞌĉan bäꞌyi, jäquiꞌve raꞌ säñi muꞌ ĉaĉaij na jam ĉujcati muꞌ, yejĉoij ac̣hiꞌ bäꞌyi.