Números 27 - Tsimane

Josué aty yụꞌtac ĉọjcacsity

¹² Ayoꞌ jajiti muꞌ Moisés: —Mụcuꞌcheꞌ raꞌ jịjcaij mi uts Abarimcheꞌ, muꞌcheꞌ buꞌyi raꞌ cạveꞌ mi mọꞌ jac Canaán soꞌmacsis jiquej yụ Israeltyiꞌ vóshiꞌ in.

¹³ Aty raꞌ meꞌsiꞌ cạveꞌyaꞌ mi mọꞌ jac, chat raꞌ q̂uinꞌdyemꞌ säñi mi, vóshiꞌvunyaꞌ raꞌ buꞌban mi yojdyemꞌ Aarónvun u vojityvun mi.

¹⁴ Jam raꞌ muꞌĉan jịjcaij mi ĉaĉaij na jam chäquibutiĉaꞌ p̂eyacdyeꞌ yụs miꞌin jiquej, ojñiꞌyaꞌ, Meribayaꞌ jiquej, Cadejve, cäjyasĉansiꞌ jac, Sin tịj mọꞌ, yóyaꞌdyemꞌ muntyiꞌ jiquej u in ñäñin yụ in. Miꞌin jam damꞌ jéyacsi jiquej miꞌin: "Ọij nash Jenꞌsiꞌ ferdyemꞌ", mijam meꞌ jéyacsi miꞌin —jajiti Jenꞌ muꞌ Moisés.

¹⁵ Moisés jéte cọdyete Ayoꞌ:

¹⁶ —Tsuntyiꞌ Jenꞌ Ayoꞌ tsun, mi nash tsạꞌchucsity räj jacchety muntyiꞌ in, yụ cọdyeye paj qui yụꞌbajte mi yoctyiꞌ ĉọjcacsity muꞌinyaꞌ muntyiꞌyaꞌ in.

¹⁷ Junanaj chuc jịjcaij in natiyaꞌ in, paj tsanꞌ chutidyeꞌyaꞌ in, muꞌ raꞌ tashcheꞌ buꞌyi muntyiꞌ mídyes in paj qui jam jeñej oveca in itŝij ĉọjcacsity mọꞌin, paj jam meꞌ shupqui in.

¹⁸ Ayoꞌ jajiti Moisés: —Jụdyej, uts Josué, Nuntyiꞌ ạvaꞌ muꞌ muꞌ nash meꞌchubun Ạꞌedyeꞌ yụ. Yụꞌtaca un mi joꞌnoꞌcheꞌ muꞌ

¹⁹ chat qui yụꞌtyeme Eleazarsiꞌ vej muꞌ, muꞌ cudyitity yụ́cheꞌ, judyeyaꞌ muntyisyaꞌ vej räj muꞌin, chat qui raꞌ soꞌmetem muꞌdyety yụꞌtactyiꞌ.

²⁰ Chocyaꞌ quiꞌ soꞌmeme ĉụiꞌsiꞌ yụꞌtacdyeꞌ mi, paj qui muꞌin Israeltyiꞌ vóshiꞌ in räj chiquete in.

²¹ Josué mạꞌjeꞌ chäyibun dyijyedyeꞌ jụijyaꞌ yụ, jemoñeꞌ muꞌ jiꞌcaviti Eleazaryaꞌ, chat qui raꞌ yụ muꞌyaꞌ Urimyaꞌ yụ jéte muꞌ Eleazar, junꞌ chuc mạꞌjeꞌ yụ, chat qui raꞌ muꞌ jiꞌjiyete muꞌ Josué, muꞌ qui raꞌ jéyacsi räj muntyiꞌ in junꞌ chuc raꞌ jämꞌtaqui muꞌin in —meꞌ jajiti muꞌ Jenꞌ Moisés.

²² Anicdye meꞌ, muꞌ Moisés chiquepte Ayoꞌsiꞌ p̂eyacdyeꞌ muꞌ jasoꞌmitis jiquej. Muꞌ jịꞌcaveyete muꞌ Josué Eleazar, muꞌ cudyitity Jenꞌcheꞌ, muntyisyaꞌ vej muꞌin.

²³ Yụꞌtaqui un muꞌ joꞌnoꞌchemꞌ Josuécheꞌ, judyeyaꞌ soꞌmete yụꞌtacdyeꞌ muꞌ paj qui muꞌ ĉọjcacseban muntyiꞌ in, yoj jajitidyemꞌ Moisés Ayoꞌ jiquej u.