Génesis 9 - Tsimane

P̂eyacdyeꞌ Jenꞌsiꞌ jasoꞌmiti Noé

¹ Jenꞌ soꞌmacsi p̂eyacdyeꞌ Noé ạvaꞌtumdye, jéyacsi: —Daiꞌ raꞌ ạvaꞌyi miꞌin paj qui vóshiꞌ miꞌin räj buꞌban úcheꞌ jaccheꞌ in.

² Räj jebacdyeꞌ in, jaijtyiꞌ in judyeyaꞌ tạbedyeꞌ in, mọꞌin raꞌ quijñinac cavinac in. Yụ raꞌ yụꞌtyeyeyac miꞌin paj qui räj meꞌchucsi miꞌin.

³ Q̂uinꞌ yụ soꞌmeyac jebacdyeꞌ räj in jibitidyes miꞌin. Yụ jiquej soꞌmeyac sacacdyeꞌ, q̂uinꞌ chat jebacdyeꞌ soꞌmeyac.

⁴ Chäsh qui na ramꞌ jam jebebitiñeꞌ miꞌin, ĉaĉaij na mọꞌ chäsh mọꞌ tsạꞌchucsis.

⁵ Tyi chuc jiꞌchäshte ujate muntyiꞌ jụijyaꞌ, yụ́dye raꞌ cọdyete p̂eyacdyeꞌ juchadyes muꞌ. Meꞌdye yiris jebacdyeꞌ jiꞌchäshte ujate jụijyaꞌ muntyiꞌ, yụ raꞌ chimeꞌjeꞌdye.

⁶ "Tyi chuc jiꞌchäshte ujate muntyiꞌ jụijyaꞌ, paj yoctyiꞌ muntyiꞌ jiꞌchäshte ujate, ĉaĉaij na Jenꞌ jämꞌte muꞌ muntyiꞌ yódyeijdyemꞌ muꞌ u, joꞌmeijdye jämꞌte.

⁷ Miꞌin raꞌ daiꞌ ạvaꞌyi, muꞌin qui raꞌ vóshiꞌ miꞌin daiꞌ raꞌ muꞌyaꞌ in paiꞌ buꞌyi jaccheꞌ in."

⁸ Chat qui Jenꞌ jéyacsi Noé judyeyaꞌ ạvaꞌ muꞌ:

⁹ —Q̂uinꞌ yụ raꞌ yụꞌtyeꞌ miꞌindyes ọij p̂eyacdyeꞌ yụ judyeyaꞌ raꞌ vóshidyes miꞌin,

¹⁰ judyeyaꞌ raꞌ chimeꞌ jebacdyedyes in, penꞌdyetunsiꞌ covambaĉan jiquej in, tsemsiꞌ in judyeyaꞌ jam tsemsiꞌ in, judyeyaꞌ jaijtyidyes chimeꞌ ọij p̂eyacdyeꞌ yụ.

¹¹ Ọij raꞌ p̂eyacdyeꞌ soꞌmeyac yụ: a raꞌ jam quivij jiꞌp̂utjanꞌ yụ räj jacches jedyeꞌ in, aty raꞌ jam quivij juteꞌ yụ bänedyeꞌ.

¹² Yụ raꞌ yụꞌtyeꞌ miꞌindyes yiris jịꞌĉocdyes paj qui dyijtubutiĉaꞌ miꞌin ọij p̂eyacdyeꞌ yụ miꞌindyes, judyeyaꞌ räjdyes jacches jụ́tyestumsiꞌ in, mijam raꞌ junꞌ mọtsiꞌ ọij p̂eyacdyeꞌ.

¹³ Oꞌpitoꞌ yụ yụꞌte dyicbaꞌbadyeꞌĉan, jịꞌĉocdyes yụ́siꞌ p̂eyacdyeꞌ yụꞌtyeyeyacsis yụ räj jaccheꞌ bäꞌyity in.

¹⁴ Jämꞌdyeyaꞌ raꞌ tuiꞌ yụ mạyedyeꞌches dyicbaꞌbadyeꞌ, jorojĉanyi raꞌ oꞌpitoꞌ yụ,

¹⁵ chat qui raꞌ yụ dyijtuĉan p̂eyacdyeꞌ yụ yụꞌtyeyeyacsiꞌ yụ miꞌindyes jiquej judyeyaꞌ räj yocsiꞌ jacches jụ́tyisdyes in, yiꞌ mọꞌ: aty raꞌ jam yụ cuvij jiꞌp̂utacseban yụ bänedyeꞌyaꞌ yụ.

¹⁶ Jämꞌdyeyaꞌ jorojĉanyiyaꞌ muꞌ oꞌpitoꞌ dyicbaꞌbadyeꞌĉan, yụ raꞌ cạvete chat qui raꞌ yụ dyijtuĉan p̂eyacdyeꞌ yụ miꞌindyes judyeyaꞌ räj yocsiꞌ jacches jụ́tyisdyes in. Ọij p̂eyacdyeꞌ jam raꞌ jụꞌñisĉan mạyedyeꞌ mọtsiꞌ.

¹⁷ Meꞌ buꞌyi raꞌ oꞌpitoꞌ jịꞌĉocdyes p̂eyacdyeꞌ yụ yụꞌtyeyacsis yụ räj jacches jụ́tyis in —yi Jenꞌ jajiti Noé.

Noé judyeyaꞌ ạvaꞌ muꞌ

¹⁸ Noétyiꞌ ạvaꞌ muꞌ penꞌdyetutety covambaĉan jiquej in, tịj muꞌin Sem, Cam, judyeyaꞌ Jafet, Camtyiꞌ ạvaꞌ muꞌ tịj muꞌ Canaán.

¹⁹ Muꞌin chibintyity ạvaꞌ Noétyiꞌ jiquej in, muꞌin nash vóshiꞌ räj jacchetytyiꞌ muntyiꞌ in paiꞌ bäꞌyity in.

²⁰ Noé quịjoijtyiꞌ muꞌ tashcheꞌ jiꞌshupquety ova.

²¹ Väshtaqui mọꞌ chat qui tyeij judyeyaꞌ qui jämꞌ shuꞌqui. Ñäcräꞌjeꞌ ĉọshi quịꞌsiꞌ acaꞌ muꞌ, mijam ĉúti.

²² Muꞌ na Cam, Canaántyiꞌ jenꞌ muꞌ, cạvaqui jenꞌ ĉụiꞌtyiꞌ muꞌ anic cädäj muꞌ, chat qui aꞌc̣hisyaꞌ dyijyedyeꞌ jéyajquiqui vojity muꞌ pärenꞌdye.

²³ Sem judyeyaꞌ Jafet quịꞌsiꞌ murujrucheꞌ cạyaqui jenꞌ muꞌin, chat qui päcäꞌ miꞌi in, busjeĉajte in, jam cạvete in.

²⁴ Noé aty jiꞌjiyaqui shuꞌquedyeꞌ, chat q̂uinꞌdyemꞌ chị́yepte aꞌc̣his dyijyedyeꞌ Camsimꞌ jiquej, muꞌ jäquity ạvaꞌ muꞌ.

²⁵ Mọꞌdyes qui yi muꞌ Noé: Vaꞌtacdyeꞌĉan raꞌ bäꞌyi in Canaántyiꞌ vóshiꞌ muꞌ, anic raꞌ uyaꞌyaty úñity bäꞌyi in. Muꞌin raꞌ úñi in vojitytyidyes vóshiꞌ in.

²⁶ Chimeꞌdye yi muꞌ Noé: Timaꞌqueja muꞌ Jenꞌ, muꞌ Semtyiꞌ Ayoꞌ muꞌ. Muꞌtyiꞌ raꞌ vóshiꞌ ayoꞌbuꞌyi in Canaántyidyes vóshiꞌ in.

²⁷ Yụ cọdyete Jenꞌ paj qui muꞌ jiꞌdayacsebi Jafettyiꞌ vóshiꞌ in, muꞌin raꞌ jämꞌjiti bäꞌyi in Semtyiꞌtum vóshiꞌ in, Canaántyiꞌ raꞌ vóshiꞌ in úñi raꞌ in Jafetytyidyes vóshiꞌ chimeꞌ in.

²⁸ Aty jiyiꞌ mọꞌ bänedyeꞌ tacaꞌ muꞌ men yejĉoij bäꞌyi Noé, chibin quiꞌ cien ĉanamꞌ quiꞌtac yómodyeꞌ, meꞌquiꞌ bäꞌyi.

²⁹ Aty arajtac quiꞌ cien ĉanamꞌ quiꞌtac yómodyeꞌ tyiti chat q̂uinꞌdyemꞌ säñi muꞌ Noé.