Génesis 8 - Tsimane

Jiyiꞌ bänedyeꞌ

¹ Jenꞌ dyijtubajte muꞌ Noé judyeyaꞌ covambaĉansiꞌ jebacdyeꞌ in. Q̂uinꞌdyemꞌ Jenꞌ jiꞌfujbajte tyiꞌmu chat qui yacchubunꞌ c̣hịꞌyebanꞌ ojñiꞌ.

² Täts shupquiꞌ jacĉansiꞌ ojñiꞌ chimeꞌ judyeyaꞌ mạyedyeꞌches ojñiꞌ, chitätsdye añej.

³ Q̂uinꞌdyemꞌ jäjämꞌtum c̣hịꞌyebanꞌ ojñiꞌ, yiriꞌ cien ĉanamꞌ quiꞌtac mạyedyeꞌ meijquejĉobanꞌ c̣hịꞌyejĉobanꞌ ojñiꞌ.

⁴ Mọꞌdye mạyedyeꞌ yiriꞌtac yävätidyeꞌ jiyiꞌ, ịvaj yävätidyeꞌyity, muꞌcheꞌ mụcuꞌcheꞌ muꞌ chantaĉan covamba, Araratcheꞌ.

⁵ Yejĉobanꞌ mọmoꞌ c̣hịꞌyebanꞌ ojñiꞌ, ĉụiꞌdye chaꞌsheꞌ tashches mạyedyeꞌ yiriꞌtacyity ịvaj, q̂uinꞌdyemꞌ nạijyeban jimijcheꞌ yoctyiꞌ mụcuꞌ in.

⁶ Vạjpedyeꞌ quiꞌtac mạyedyeꞌ bisaqui muꞌ Noé, q̂uinꞌdyemꞌ vanacjeꞌ cạvedyeꞌyaꞌ covambas jämꞌtyes jiquej muꞌ.

⁷ Mọꞌyaꞌ jiꞌshupqueꞌ yiris jaijtyiꞌ tsinꞌcus. Meijyequimꞌ nạiꞌ junꞌ quiꞌ chuc chanjanꞌ jac.

⁸ Aty meꞌsiꞌ ọꞌtoꞌ qui jiꞌshupqueꞌ paj qui chịjve muꞌ junꞌ chuc aty atsvun chanjanꞌ jac.

⁹ Ọꞌtoꞌ jam junaꞌ dạqueꞌ tŝọ́dyes mọꞌ, itŝiꞌ méquis chanamꞌsiꞌ, mọꞌdyes qui mọꞌ caꞌñibunꞌ covambatubanꞌ. Noé tiĉunꞌjanꞌ tapjeĉunꞌjanꞌ unyaꞌ muꞌ, quivij jiꞌsisanꞌ chịmoꞌĉan.

¹⁰ Noé quivij biseꞌ yävätidyeꞌ mạyedyeꞌ, quivij chịmoꞌdye jiꞌshupqueꞌ ọꞌtoꞌ.

¹¹ Shocam caꞌñibunꞌ mọꞌ ọꞌtoꞌ yiris shan tubanꞌ orivos, chịj vatyquej muꞌ Noé aty chanjadaque jac jiquej.

¹² Quivij biseꞌ Noé yävätidyeꞌ mạyedyeꞌ, quivij chịmoꞌdye jiꞌshupqueꞌ ọꞌtoꞌ, aty jam caꞌñibunꞌ, meij mọmoꞌ jịjcabanꞌ jọbanꞌ.

¹³ Noé jäbän quiꞌ ciendyemꞌ yiris jiyiꞌ yómodyeꞌ tyiti muꞌ, q̂uinꞌdyemꞌ chanjanꞌ räj jac. Chaꞌsheꞌ in mọꞌ tashches mạyedyeꞌ tashchety ịvaj, q̂uinꞌdyemꞌ muꞌ Noé räj vanaijjebibajte p̂anacdyeꞌ covambas muꞌ, aty cạveꞌ chanjadaque jac.

¹⁴ Aty chaꞌsheꞌ in päräꞌ quiꞌtac yävätidyeꞌ jiyiꞌ mạyedyeꞌ, päräꞌyity ịvaj, aty mọꞌ jämꞌ chanjanꞌ jac.

¹⁵ Chat qui Jenꞌ jajiti muꞌ Noé:

¹⁶ —Shupjada q̂uinꞌ covambaĉantyiꞌ mi, p̂en mi, ạvaꞌ mi judyeyaꞌ jäp mi.

¹⁷ Jiꞌshupcacsebada chimeꞌ räj covambaĉansiꞌ jebacdyeꞌ cạcsis mi, tsemsiꞌ in judyeyaꞌ jam tsemsiꞌ in judyeyaꞌ jaijtyiꞌ chimeꞌ in, paj qui quivij shashunꞌve in, paj räj buꞌbanꞌ ọ́cheꞌ jaccheꞌ in.

¹⁸ Chat qui muꞌ Noé p̂entum muꞌ, judyeyaꞌ ạvaꞌ muꞌ chimeꞌ jäp muꞌ shupjan covambaĉantyiꞌ in.

¹⁹ Chimeꞌdye shupjanꞌ jebacdyeꞌ in, tsemsiꞌ in judyeyaꞌ jam tsemsiꞌ in, jaijtyiꞌ chimeꞌ in, cäts meꞌ jịjcaiꞌ shubanꞌ in.

²⁰ Chat qui muꞌ Noé jämꞌtyeꞌ yiris jiꞌcoꞌshayacdyeꞌ Ayodyes. Muꞌ jäcacsi jiꞌcoꞌshayacdyes jebacdyeꞌ in judyeyaꞌ jaijtyiꞌ in, cäts yiris jịjcaiꞌ jäcacsi muꞌ, jiꞌcoꞌshayacsi Jenꞌdyes.

²¹ Anic jamaꞌjotyibuti muꞌ Ayoꞌ mọꞌ jiꞌcoꞌshayacdyemꞌ, anic jämꞌ ĉọiꞌ jẹrejres. Mọꞌdyes muꞌ Ayoꞌ yi: —Aty jam raꞌ quivij vaꞌtacdyeꞌ soꞌmeꞌ yụ ọij jac muntyisyaꞌ juchaj muꞌin. Yụ qui namꞌ räj chị́yacsebi muntyity ĉojtyiꞌ muꞌin, miquiꞌdyemꞌ in aꞌc̣histum dyijyedyeꞌ in. Meꞌ raꞌ tsanꞌ meꞌ, aty qui raꞌ jam quivij meꞌjeyacseban yụ räj jacches jụ́tyestumsiꞌ in, yoj jeyacsidyemꞌ q̂uinꞌ u yụ.

²² Räjĉan raꞌ mọꞌyaꞌ tupudyeꞌ cätidyes judyeyaꞌ vädacdyes, räjĉan raꞌ mọꞌyaꞌ tupudyeꞌ jätis judyeyaꞌ juñujñudyeꞌ, räjĉan raꞌ mọꞌyaꞌ mạij judyeyaꞌ tsedyedyeꞌ, junꞌ quiꞌ chuc jadyic ọij jac meꞌquiꞌ raꞌ —yi muꞌ Jenꞌ.