Génesis 7 - Tsimane

Bänedyeꞌ

¹ Yi muꞌ Ayoꞌ jéte Noé: —Mimꞌ yirity rụijtyity yụ́siꞌyaꞌ vej, mijam yoctyiꞌ muꞌyaꞌ meꞌtyity q̂uinꞌ in yojtyitydyemꞌ mi u. Q̂uinꞌ chat aty sisva covambaĉan chätidyeꞌtum mi.

² Jiꞌsitacseva jiꞌcoꞌshayacdyes jebacdyeꞌ chimeꞌ in, yävätidyeꞌ sonꞌ in chiyävätidyeꞌdye p̂en in. Mọꞌin na yocsiꞌ jam jiꞌcoꞌshayacdyes jebacdyeꞌ in, cäts raꞌ pärämꞌ cạcsi mi, yirity sonꞌ yiris p̂en.

³ Chimeꞌdye raꞌ jiꞌsitacsim jaijtyiꞌ in, yävätidyeꞌ sonꞌ in chiyävätidyeꞌdye p̂en in. Meꞌ raꞌ mi paj qui jam säñiꞌ in, paj qui quivij shashunꞌve in jacches jebacdyeꞌ in.

⁴ Yocsiꞌ raꞌ mạyedyeꞌ yävätidyeꞌ yụ raꞌ juteꞌ añej jaccheꞌ, vạjpedyeꞌ quiꞌtac raꞌ mạyedyeꞌ, dyutsetsenꞌ raꞌ tŝọiꞌ añej, mạij judyeyaꞌ tsedyedyeꞌ. Yụ raꞌ tasjeyacsi jịꞌmotsacsi räj úcheꞌ bäꞌyity jämꞌtacdyeꞌ yụ, muntyiꞌ in judyeyaꞌ jebacdyeꞌ in —yi jajiti Noé muꞌ Jenꞌ.

⁵ Noé räj chiquepte p̂eyacdyeꞌ jasoꞌmitis muꞌ Ayoꞌ.

⁶ Noé jäbän quiꞌ ciendyemꞌ yómodyeꞌ tyiti yoquiꞌdyemꞌ ayijyaꞌ mọꞌ bänedyeꞌ.

⁷ Noé siti covambaĉan, p̂en muꞌ judyeyaꞌ ạvaꞌ muꞌ judyeyaꞌ jäp muꞌ, muꞌĉan jiꞌcajñeꞌ bänedyeꞌ in.

^8-9 Meꞌdye jebacdyeꞌ ayij in Noétum sitiꞌ in, jiꞌcoꞌshayacdyes in judyeyaꞌ jam jiꞌcoꞌshayacdyes in, yoyoquin jebacdyeꞌ in chimeꞌ, chimeꞌdye jaijtyiꞌ in. Cäts päräꞌ jịjcaiꞌ sitiꞌ in, sonꞌ judyeyaꞌ p̂en, jiꞌsitacsi muꞌ Noé, yoj jajitidyemꞌ Jenꞌ u.

¹⁰ Anicdye meꞌ, chaꞌsheꞌ yävätidyeꞌ mạyedyeꞌ, chat tiyacchutiꞌ mọꞌ bänedyeꞌ.

¹¹ Mọꞌdye mạyedyeꞌ yiriꞌtac yävätidyeꞌ jiyiꞌ mạyedyeꞌ päräꞌyity ịvaj, meꞌ tiyacchutiꞌ mọꞌ bänedyeꞌ. Noé aty jäbän quiꞌ ciendyemꞌ yómodyeꞌ tyiti muꞌ cạveꞌ mọꞌ bänedyeꞌ. Mọꞌdye mạyedyeꞌ jacĉansiꞌmun ojñiꞌ shupquiꞌ, anic maj, judyeyaꞌ vanacyiꞌ jeꞌñes chụiꞌdyeꞌ mạyedyeꞌcheꞌ anic näräꞌ tŝọiꞌ añej.

¹² Maj añeiꞌ, vạjpedyeꞌ quiꞌtac mạyedyeꞌ dyutsetsenꞌ añeiꞌ, mạij judyeyaꞌ tsedyedyeꞌ, meꞌ tŝọiꞌ añej.

¹³ Mọꞌdye mạyedyeꞌ siti muꞌ Noé covambaĉan, p̂en muꞌ judyeyaꞌ jäp muꞌ judyeyaꞌ ạvaꞌ muꞌ, Sem, judyeyaꞌ Cam judyeyaꞌ Jafet.

¹⁴ Yiriꞌyaꞌ jebacdyeꞌtum siti in, yoyoquin jebacdyeꞌ in, tsemsiꞌ in judyeyaꞌ jam tsemsiꞌ in, chimeꞌ jaijtyiꞌ yoyoquin sitiꞌ in.

¹⁵ Cäts päräꞌ jịjcaiꞌ ayij jụ́tyis in, Noétum sitiꞌ in,

¹⁶ sonꞌ judyeyaꞌ p̂en yoj jajitidyemꞌ Jenꞌ u. Chat q̂uinꞌdyemꞌ muꞌ Ayoꞌ ĉärꞌjajibuti chụiꞌdyeꞌ covambas muꞌ.

¹⁷ Vạjpedyeꞌ quiꞌtac mạyedyeꞌ yejĉoiꞌ mọmoꞌ bojviꞌ ojñiꞌ. Chijämꞌ covamba chijämꞌ dujrenꞌti ojñiꞌcheꞌ jatänenꞌti ojñiꞌ.

¹⁸ Jẹjcaiꞌ mọmoꞌ majyiꞌ ojñiꞌ judyeyaꞌ qui muꞌ covamba tänenꞌti.

¹⁹ Yejĉoiꞌ mọꞌ majyiꞌ ojñiꞌ chijämꞌ räj jemonyejoij därmuntyiꞌ mụcuꞌ in,

²⁰ yävätidyeꞌ metro cajñete ojñiꞌ muꞌ mochety mụcuꞌ.

²¹ Tas säñi in jacchety muntyiꞌ in judyeyaꞌ jaijtyiꞌ in judyeyaꞌ jebacdyeꞌ in, tsemsiꞌ in judyeyaꞌ jam tsemsiꞌ in,

²² räj jacches jụ́tyis in säñiꞌ in.

²³ Noédyety tsạꞌ chätidyeꞌtum muꞌ judyeyaꞌ covambaĉansiꞌ yocsiꞌ in, mọꞌindyety jam säñiꞌ in mọꞌin na jam covambaĉansiꞌ in tas p̂utiꞌ in, judyeyaꞌ jacchety muntyiꞌ in, judyeyaꞌ jaijtyiꞌ in judyeyaꞌ jebacdyeꞌ in, tsemsiꞌ in judyeyaꞌ jam tsemsiꞌ in, räj mọꞌin chimeꞌ säñiꞌ in.

²⁴ Yiriꞌ cien ĉanamꞌ quiꞌtac mạyedyeꞌ meꞌquiꞌ dujruꞌ buꞌyiꞌ ojñiꞌ.