Génesis 45 - Tsimane

José ĉụiꞌ jiꞌnaijbun vojityyaꞌ muꞌ

¹ José aty jam dyichchuti ĉojtyiꞌĉan muꞌ, aty jam dyichyi muꞌinsiꞌyaꞌ vej úñitysiꞌyaꞌ muꞌ, mọꞌdyes qui jéyacsi: "¡Shupquevac räj úĉantyiꞌ miꞌin!" Vojitydyety mọmoꞌ taĉan muꞌ, chat q̂uinꞌdyemꞌ muꞌ jiꞌnaijbun vojityyaꞌ muꞌ.

² Fer vatyquej tári muꞌ táracsi vojity muꞌ. Muꞌin Egiptoĉantyiꞌ in seꞌvepte in táris muꞌ, pạrej jéyacsi in muꞌin Faraónsiꞌĉantyiꞌ acaꞌ in.

³ José jéyacsi vojity muꞌ: —Yụ nash José. ¿Tacaꞌ caꞌ tsạꞌ jenꞌ tsun? Chị́yete vatyquej in muꞌ buty jiquej José, noiꞌyi ĉojtyiꞌĉan in, mijam tupuj vorjete in.

⁴ José jéyacsi: —Damꞌ úcheyaꞌyejamꞌ. Ĉọcte in, yi jéyacsi: —Yụ nash José, vojity miꞌin jiꞌmincatiĉaty jiquej yụ miꞌin, úĉan Egiptoĉan tacjitiĉaꞌ yụ miꞌin jiquej.

⁵ Meꞌ tsanꞌ meꞌ yụ jéyac, jam qui na ramꞌ dyijtutiñeꞌ mọꞌ, mijam raꞌ ĉụiꞌ yoqui ĉojtyiꞌĉan miꞌin junꞌ chuc jiꞌmincatiĉaꞌ yụ jiquej miꞌin, ĉaĉaij na ĉụiꞌsiꞌyaꞌ dyijyedyeꞌ muꞌ Jenꞌ jäꞌmij jutin yụ úĉan paj qui yụ tsạꞌchucsive muntyiꞌ in.

⁶ Aty jiyiꞌ päräꞌ yómodyeꞌ dáquedyedyes, tacaꞌ mọꞌyaꞌ damꞌdye cächyiꞌ ĉanamꞌ yómodyeꞌ. Meꞌ raꞌ tsanꞌ quịc sicdyeꞌ quịjodyeꞌĉan, mijam qui na ramꞌ yuꞌtiꞌ jibitidyes mọꞌ.

⁷ Jenꞌdye jäꞌmij jutin yụ úĉan jiquej paj qui yụ tsạꞌchuyac miꞌin, paj qui jam säñi miꞌin paj qui yejĉoij naꞌi vóshiꞌ miꞌin, anic mọjoꞌchaꞌ jämꞌsiꞌ dyijyedyeꞌ muꞌ.

⁸ Jam nash miꞌin jutitiĉaꞌ yụ miꞌin paj qui yụ úĉan jijtuij, Jenꞌ nash jutin yụ q̂uinꞌ úĉan yụ, judyeyaꞌ yuꞌtyin yụ paj qui yụ mujuꞌchaty nọ́taquity Faraóntyiꞌ yụ judyeyaꞌ ĉọjcapte yụ acaꞌ Faraónsiꞌ muꞌ, aty ayoꞌbuꞌyi yụ räjdyes ọij jac Egipto.

⁹ Mọꞌdyes yụ jéyac, cavintum tátayaꞌ jịjcabajshamꞌ miꞌin, jétinte raꞌ miꞌin: "Yi nash ạvaꞌ mi José: Jenꞌ yuꞌtyin yụ paj qui yụ räj buꞌyiꞌ ọij jac Egipto ayoꞌbuꞌyiij. Cavintum atsiva úĉan jam raꞌ bisaqui mi.

¹⁰ Muꞌĉan raꞌ bäꞌyi mi Gosénĉan Egiptoĉansiꞌ jac, räjenꞌdye ạvaꞌ mi judyeyaꞌ vịyaꞌ mi judyeyaꞌ cuꞌdyeꞌ mi judyeyaꞌ räj jedyeꞌ mi, c̣hẹiꞌyaꞌdye raꞌ bäꞌyi yụ́tum mi.

¹¹ Yụ́dye raꞌ soꞌmeye jibitidyes muꞌĉan, mídyes judyeyaꞌ chätidyedyes mi, judyeyaꞌ penꞌdyedyes mi, mijam raꞌ dáquis cạvetiñeꞌ miꞌin. Ĉanamꞌdyety o yómodyeꞌ raꞌ dáquis," meꞌ raꞌ jébajtinte táta jịꞌchiqueyebajtinte.

¹² Räjenꞌdye miꞌin judyeyaꞌ Benjamínmun chimeꞌ, aty cavitiĉaꞌ yụ miꞌin yụ́dye mọmoꞌ José ọij soꞌmeyac p̂eyacdyeꞌ.

¹³ Jétinte raꞌ táta tsun junꞌ chuc yụ ayoꞌbuꞌyi úĉan Egiptoĉan, jétinte raꞌ chimeꞌ junꞌ chuc cạvetiñes q̂uinꞌ miꞌin. ¡Cavinyejamꞌ jäĉajmac táta tsun! —jéyacsi José vojity muꞌ.

¹⁴ Chat qui muꞌ José c̣hobenꞌ tŝọij Benjamíncheꞌ, vaj meij c̣hobenꞌjiti in chat qui táriti in.

¹⁵ José pụꞌsacsi vojity muꞌ, räjenꞌdye muꞌin in judyeyaꞌ c̣hobacsi meꞌsiꞌdye táracsi. Aty meꞌsiꞌ chat qui tiyacchuti p̂eyete in.

¹⁶ Chimeꞌdye muꞌin Faraónsiꞌĉantyiꞌ acaꞌ in chị́qui in muꞌyaꞌ Joséty vojity muꞌin. Mọꞌ muꞌ maꞌjotyeꞌ Faraón räjtumdye nọ́taquity muꞌ.

¹⁷ Faraón jajiti José: —Jéyacseva vojity mi paj jämꞌchuĉan cuꞌdyeꞌ muꞌin paj roiꞌjebanꞌ Canaánĉan in,

¹⁸ paj jenꞌ tuĉan in judyeyaꞌ chätidyeꞌ muꞌin paj úĉan bäꞌyi in yóĉandyemꞌ yụ u q̂uinꞌ, meꞌ raꞌ jéyacsi vojity mi. Yụ raꞌ soꞌmacsi mọjoꞌchaꞌ jämꞌsiꞌ jac bäꞌyedyedyes muꞌin, chimeꞌdye raꞌ soꞌmac in jämꞌsiꞌ jibitidyes Egiptoĉansiꞌ in.

¹⁹ Chimeꞌdye jéyacseva paj Egiptoĉansiꞌ careto cạiꞌ in, paj mọꞌcheꞌ ayij p̂en in judyeyaꞌ ạvaꞌ miꞌin judyeyaꞌ jenꞌ miꞌin chimeꞌ.

²⁰ Jéyacseva paj jam dyijtuqui ĉụiꞌsiꞌ jedyeꞌ muꞌin. Úĉan raꞌ räj soꞌmac mọjoꞌchaꞌ jämꞌsiꞌ jedyeꞌ in Egiptoĉansiꞌ in —jajiti Faraón muꞌ José.

²¹ Israeltyiꞌ ạvaꞌ muꞌ chiquepte p̂eyacdyeꞌ in. José jịꞌcayacsi careto in yoj jajitidyemꞌ Faraón u, judyeyaꞌ vítedyes majmiyadyes muꞌin.

²² Chimeꞌdye muꞌ soꞌmacsi mụiꞌtyity quịꞌsiꞌ, cäts yirityityij cof soꞌmacsi, muꞌ na Benjamín ĉanamꞌ muꞌ cof soꞌmete judyeyaꞌ chibin quiꞌ cien ficha plata cäch muꞌcheꞌ.

²³ Jenꞌdyes chimeꞌ jịꞌcayaĉan José daiꞌyaiꞌ jedyeꞌ mọꞌ cạiꞌsiꞌ yiriꞌtac bórico in, yedyej mọjoꞌchaꞌ jämꞌsiꞌ Egiptoĉansiꞌ jịꞌcayaĉan. Jibitidyes jenꞌdyes chimemꞌ jịꞌcaiꞌ mọꞌcheꞌdye cạiꞌ in yiriꞌtacyitycheꞌ bórico in, trivo judyeyaꞌ pan, meꞌ meꞌ jịꞌcate jibitidyety jenꞌdyety muꞌ vítedyety majmiyaꞌ muꞌ, aty tuteyaꞌ in, aty Egiptoĉan jijtuijyaꞌ.

²⁴ Chat muꞌ José jutacseban vojity muꞌ jéyacsi: —Jam raꞌ chubun majmiyaꞌ miꞌin.

²⁵ Chat qui Egipto yạjquibanꞌ in Canaánĉan qui roiꞌjeꞌ in, yóĉandyemꞌ jenꞌ u muꞌin.

²⁶ Jacobyaꞌ venjoban in, chat jébajte in: "¡Muꞌyaꞌ tyuꞌ caꞌ José, muꞌĉan ayoꞌbuꞌyaque na jiquej räj buꞌyi Egipto!" jéyaĉan jenꞌ in. Seꞌvacsimꞌ shican tyeij jenꞌ muꞌin, mijam anicyi muꞌ.

²⁷ Muꞌin na yejĉoij jébajte in jätäjjeyacsi chuc muꞌ José judyeyaꞌ cạvacsi careto in juteꞌsiꞌ muꞌ paj qui muꞌcheꞌ cạc, chat q̂uinꞌdyemꞌ jiĉun muꞌ.

²⁸ Yi muꞌ: "¡Muꞌyaꞌ buty jiquej ạvaꞌ yụ José, jam na säñi jiquej! Mọꞌ mọmoꞌ mạꞌjeꞌ yụ, yụ raꞌ muꞌve cạveĉajte jambiꞌdyemꞌ säñi yụ", yi muꞌ Israel.