Génesis 2 - Tsimane

¹ Meꞌdye Jenꞌ ijaij jämꞌtyeꞌ mạyedyeꞌ judyeyaꞌ jac räj meꞌchuiꞌsiꞌ jedyeꞌ.

² Yävätidyeꞌyis mạyedyeꞌ muꞌ Jenꞌ jịꞌjutyiti, aty jam junꞌtaqui ĉaĉaij na aty räj ijaij carijtacdyeꞌ muꞌ.

³ Mọꞌdyes muꞌ Jenꞌ yụꞌtyeꞌ mọꞌ yävätidyeꞌyis mạyedyeꞌ, jịꞌjutyitidyes muꞌ yụꞌtyeꞌ. Meꞌ yụꞌtyeꞌ ĉaĉaij na mọꞌdye mạyedyeꞌ jadyic carijtaqui muꞌ jiquej.

⁴ Meꞌdye muꞌ Jenꞌ jämꞌtyeꞌ mạyedyeꞌ judyeyaꞌ jac. Tashcheꞌ jiquej yoquiꞌdyemꞌ muꞌ Jenꞌ Ayoꞌ tsun jämꞌtyeꞌyaꞌ mạyedyeꞌ judyeyaꞌ jac,

Muꞌ tashchety muntyiꞌ Edénĉan

⁵ itŝiꞌdyemꞌ däräꞌ chịbiꞌ chimeꞌ, ĉaĉaij na muꞌ Jenꞌ Ayoꞌ tsun jambiꞌ yụꞌtyeꞌ añej jaccheꞌ, chimeꞌdye itŝijdyemꞌ tyi carijtaquity úcheꞌ in.

⁶ Jacĉansimꞌ ojñiꞌ shupquiꞌ, mọꞌ samaꞌchuiꞌ ọij jac.

⁷ Chat qui muꞌ Jenꞌ Ayoꞌ tsun jämꞌte muꞌ tashchety muntyiꞌ, jac jämꞌte, chat qui p̂ujjete jụijĉan soꞌmete tsạꞌsiꞌ. Meꞌ yacchuti tsạꞌi muꞌ tashchety muntyiꞌ.

⁸ Chat qui muꞌ Jenꞌ Ayoꞌ tsun yụꞌtyeꞌ yiris cätidyeꞌtumsiꞌ jac, shupquive tsun yụꞌtyeꞌ, Edén tịj mọꞌ. Muꞌĉan muꞌ Jenꞌ yụꞌte muꞌ jämꞌtety muntyiꞌ.

⁹ Chimeꞌdye muꞌ Jenꞌ Ayoꞌ tsun yụꞌtacsi mọꞌĉan yoyoquin sacacdyeꞌ in anic jämꞌsiꞌ in, chimeꞌdye väsh mọꞌin jämꞌ jebac mọꞌin. Chidyiꞌĉanyaꞌ mọꞌ quịjodyeꞌ muꞌ Jenꞌ yụꞌtyeꞌ yiris sacacdyeꞌ tsạꞌchuquis, yocsiꞌ yụꞌtyeꞌ sacacdyeꞌ chị́yacdyes jämꞌsiꞌ judyeyaꞌ jam jämꞌsiꞌ.

¹⁰ Muꞌĉan Edénĉan naꞌi yirity cojiro, muꞌ samaꞌchuiꞌtyiꞌ mọꞌ cätidyeꞌtumsiꞌ jac. Mujuꞌveyaꞌ muꞌ cojiro jiꞌchetiti qui, vạjpedyeꞌ shupqui cojiro.

¹¹ Muꞌ tashcheꞌ Pisón tịj muꞌ, muꞌ cọijyequi mọꞌ jac Havila. Muꞌĉan Havilaĉan muꞌyaꞌ oro,

¹² anic jämꞌtyiꞌ muꞌĉantyiꞌ oro. Chimeꞌdye mọꞌyaꞌ Havilaĉan yäcäs jẹrejres judyeyaꞌ yaꞌijtyiꞌ mij tịj muꞌ ónice.

¹³ Päräꞌyity cojiro Gihón tịj muꞌ, muꞌ cọijtyeꞌ mọꞌ jac Cus.

¹⁴ Chibinyity cojiro Tigris tịj muꞌ, pamꞌve muꞌ jịjcaij mọꞌ jac Asiria, vạjpedyeꞌyity cojiro muꞌ Eufrates tịj muꞌ.

¹⁵ Chat qui muꞌ Jenꞌ Ayoꞌ tsun jayuꞌti muꞌ tashchety muntyiꞌ cätidyeꞌĉan Edénĉan paj qui muꞌ ĉọjcaiꞌ räj mọꞌĉansiꞌ jedyeꞌ, chimeꞌdye paj qui carijtaqui muꞌĉan.

¹⁶ Muꞌ jasoꞌmiti p̂eyacdyeꞌ jajiti: —Tupuj jebeiꞌ mi räj ọ́ĉansiꞌ sacacdyeꞌ in.

¹⁷ Mọꞌsiꞌ qui namꞌ väsh mọꞌ sacacdyes chị́yacdyes jämꞌsiꞌ judyeyaꞌ jam jämꞌsiꞌ, mọꞌ raꞌ jam junꞌ jebeiꞌ mi, jebeiꞌ raꞌ jụijyaꞌ mi, mọꞌdye raꞌ mạyedyeꞌ säñi raꞌ mi —jajiti Jenꞌ.

¹⁸ Chat muꞌ Jenꞌ Ayoꞌ tsun yi muꞌ: —Jam u muꞌ jämꞌ buꞌyi muꞌ yirity muntyiꞌ. Yụ raꞌ jämꞌtyeyete nọ́taquis muꞌ paj qui mọꞌ japenꞌdyetuti muꞌ, ĉaĉaij na jemoñeꞌ muꞌ —yi Jenꞌ.

^19-20 Chat qui muꞌ Jenꞌ Ayoꞌ tsun räj jämꞌtacsi jebacdyeꞌ in judyeyaꞌ jaijtyiꞌ in, jac jämꞌtacsi. Jenꞌ jịꞌcaveyete muꞌ muntyiꞌ jebacdyeꞌ in paj qui muꞌ tịj yụꞌtyeyeyacsi räj in. Meꞌdye qui muꞌ räj tịj soꞌmacsi jebacdyeꞌ, tsemsiꞌ in judyeyaꞌ jam tsemsiꞌ in, chimeꞌdye jaijtyiꞌ in, tacaꞌ meꞌ tịj mọꞌin. Meꞌ tsanꞌ meꞌ jam qui namꞌ yiris ọij in tupuj japenꞌdyetuti muꞌ muntyiꞌ.

²¹ Chat qui muꞌ Jenꞌ Ayoꞌ tsun jịꞌĉoshte muꞌ muntyiꞌ, säñej jajiꞌĉushdyi. Ĉushĉandye jajicbuti yirity mạ́ramꞌ, chat quivij jumejjajibun.

²² Ĉụiꞌtyiꞌ mạ́ramꞌ jajämꞌtyiyiti p̂en judyeyaꞌ jajiꞌcaviyibun aty mọꞌ mọꞌyaꞌ munsiꞌ.

²³ Muꞌ muntyiꞌ aty mọꞌ cạveꞌyaꞌ, chat qui yi: —Ọij p̂en ĉụiꞌsiꞌ jin yụ judyeyaꞌ ĉụiꞌsiꞌ shush yụ meꞌ ọij jämꞌtac. "P̂en" jeꞌ raꞌ in ĉaĉaij na sonꞌsiꞌ aꞌ jajicbuti muꞌ Jenꞌ —yi Adán.

²⁴ Meꞌdyes qui raꞌ muꞌ muntyiꞌ yacchuqui ĉụiꞌtyiꞌ jenꞌ muꞌ judyeyaꞌ tseꞌ muꞌ, p̂entum raꞌ muꞌ, yirity buꞌyi cạvacsi Jenꞌ.

²⁵ Muꞌ muntyiꞌ p̂entumdye cädäjmun in, jam qui namꞌ tsị́catyiti in.