Génesis 15 - Tsimane

Jenꞌ jayuꞌtyiti p̂eyacdyeꞌ Abramdyes

¹ Chat qui taminꞌdyeꞌĉan muꞌ Ayoꞌ jiꞌcaviti Abramyaꞌ, jajiti: —Jam raꞌ noiꞌyi mi Abram, yụ nash ñutschuyety, anic raꞌ chäcdyis bijodyeꞌ soꞌmeye.

^2-3 Vorjete Abram: —Yụ́tyiꞌ Jenꞌ Ayoꞌ yụ, fibiꞌ raꞌ soꞌmitim bijodyes yụ ĉaĉaij na itŝij ạvaꞌ yụ. Mijam yirity ạvaꞌ soꞌmitim, úñity mọmoꞌ yụ Eliezer Damascoĉantyiꞌ, muꞌ ramꞌ räj jicbubun jedyeꞌ yụ säñiyaꞌ yụ —yi Abram jéte Jenꞌ.

⁴ Ayoꞌ vorjajiti: —Ĉụiꞌtyiꞌ raꞌ ạvaꞌ mi, muꞌ raꞌ jicbubun räj jedyeꞌ ĉụiꞌsiꞌ mi, jam raꞌ úñitydyes mi.

⁵ Chat qui Jenꞌ jorojyaꞌ jácati, jajiti: —Cạvevaꞌ jämꞌ mạyedyeꞌ, tsicseva räj ọ́rotaꞌ in tupuj jụijyam. Meꞌtum raꞌ vóshiꞌ mi anic raꞌ daiꞌ in.

⁶ Abram anicjete muꞌ Ayoꞌ meꞌdyes muꞌ rụij jayuꞌti.

⁷ Jenꞌ jajiti: —Yụ nash Ayoꞌ jiꞌshupjadyeyety Urĉantyiꞌ jiquej mi, Caldeaĉansiꞌ jac, q̂uinꞌ raꞌ soꞌmeye ọij jac, tasenꞌdye raꞌ mídyes —yi jajiti.

⁸ Abram vorjete: —Yụ́tyiꞌ Jenꞌ Ayoꞌ yụ, ¿junꞌ buty raꞌ tupuj chịj yụ aty yụ́dyes ọij jac?

⁹ Vorjajiti Jenꞌ: —Jeshaꞌ, tucseva cuꞌdyeꞌ, cäts chibinsis yómodyeꞌ in, yiris vaca judyeyaꞌ yiris chivo p̂en, judyeyaꞌ yirity oveca sonꞌ, judyeyaꞌ yiris chimeꞌ ọꞌtoꞌ judyeyaꞌ yiris tórtula chimeꞌ, meꞌ meꞌ raꞌ tuyitim.

¹⁰ Meꞌ meꞌdye tuyete Jenꞌ cuꞌdyeꞌ in, chat qui muꞌ Abram ijacsi jaiꞌtacsi judyeyaꞌ qui pạrejjeꞌ ovemun yụꞌtyeꞌ muꞌ. Mọꞌin na jaijtyiꞌ in jam jaiꞌtac in, memꞌ mun in.

¹¹ Atsij tsanꞌ cáyenꞌ ĉọ́teꞌ jebacdyeꞌ in, muꞌ na Abram ishajjeĉunacsi.

¹² Aty jurumyejoiꞌ Abram ĉọshi, säñej muꞌ ĉọshi. Meꞌĉandye juñumjajiti tojmas, där noiꞌyi muꞌ, tyumꞌyi ĉojtyimꞌ.

¹³ Chat qui muꞌ Ayoꞌ jajiti: —Yụ jéye q̂uinꞌ muꞌin raꞌ vóshiꞌ mi yocsiꞌĉan raꞌ bäꞌyedyeꞌ bäꞌyi in, yoctyiꞌtum muntyiꞌ in úñi raꞌ bäꞌyi in, där raꞌ ñịbeꞌtac in, vạjpedyeꞌ quiꞌ cien yómodyeꞌ, meꞌquiꞌ raꞌ ñịbeꞌtac in.

¹⁴ A raꞌ meꞌsiꞌ yụ raꞌ soꞌmacsi vaꞌtacdyeꞌ muꞌin ñịbeꞌtacsity in, jiꞌcarijtacsity muꞌĉan in, mítyiꞌ raꞌ vóshiꞌ c̣hoñi raꞌ in anic raꞌ jedyeꞌtum shuban in muꞌĉantyiꞌ in.

^15-16 Anic raꞌ daiꞌ yómodyeꞌ bäꞌyi in yocsiꞌĉan bäꞌyedyeꞌ, vạjpedyeꞌ quiꞌ cien raꞌ yómodyeꞌ meꞌ buꞌyi in, chat q̂uinꞌdyemꞌ raꞌ úĉan jijtuban in. Muꞌin raꞌ jam cavintum atsij in ĉaĉaij na tacaꞌ raꞌ úĉan bäꞌyi in Amorreo in. Muꞌin raꞌ yejĉoij ac̣hiꞌ bäꞌyi in, ĉụiꞌdye raꞌ ayij tupudyeꞌ yụ raꞌ soꞌmacsi vaꞌtacdyeꞌ muꞌindyes in, mity qui raꞌ vóshiꞌ úĉan bäꞌban in. Mi na raꞌ jam cạveꞌ joꞌmes, maꞌjodyeꞌtum ramꞌ bäꞌyi mi jämꞌ ramꞌ ishoij mi, chat qui raꞌ q̂uinꞌdyemꞌ säñi mi, penꞌdyetucsi raꞌ vóshiꞌvun mi —yi jajiti.

¹⁷ Aty siti tsun q̂uinꞌdyemꞌ tomajyejoiꞌ, ĉụiꞌdye jiꞌcavitiꞌ in mọꞌyaꞌ jeñej jịꞌsaꞌtumsiꞌ jedyeꞌ coꞌshaiꞌsiꞌ, mọꞌyaꞌ chimeꞌ yiris miquis fur buꞌyis, ĉụiꞌ miꞌi in dyeteꞌĉan yóyaꞌdyemꞌ jayeꞌyaꞌ jebacdyeꞌ u in, mọꞌyaꞌ tyeiꞌ in.

¹⁸ Mọꞌdye mạyedyeꞌ muꞌ Ayoꞌ yụꞌtyeyete p̂eyacdyeꞌ Abramdyes, jajiti: —Ọij q̂uinꞌ jac yụ raꞌ soꞌmacsi mítyiꞌ vóshiꞌ in, yoquiꞌdyemꞌ tiyacchutiꞌ cojiro u, Egipto tịj muꞌ, meꞌdye chaꞌshete muꞌ därtyiꞌ cojiro, Eufrates tịj muꞌ, meꞌquiꞌyaꞌ raꞌ jịjcaiꞌ soꞌmacsi jac yụ.

¹⁹ Muꞌĉan bäꞌyi muꞌin ceneo in, judyeyaꞌ cenezeo in, cadmoneo in,

²⁰ hitita in, ferezeo in, refaita in,

²¹ amorreo in, cananeo in, gergeseo in judyeyaꞌ muꞌin jebuseo in, meꞌ meꞌ muꞌĉan bäꞌyi q̂uinꞌ in —yi Jenꞌ jajiti Abram.