Exodo 40 - Tsimane

Jämꞌyụꞌtacdyeꞌ mọꞌ acaꞌ tinates Jenꞌdyes

¹ Chat qui muꞌ Jenꞌ jajiti muꞌ Moisés:

² —Jämꞌ yụꞌtyevaꞌ mọꞌ Jenꞌsiꞌ acaꞌ tinates muꞌ. Meꞌ raꞌ mi mọꞌ tashches mạyedyeꞌ tashchetyĉan ịvaj yómodyety.

³ Yụꞌtyevaꞌ mọꞌ cajón yụꞌtacdyeꞌtumsiꞌ p̂eyacdyeꞌ acaꞌĉan chat muꞌ raꞌ jumjeꞌ muꞌ juñum buꞌyity quịꞌsiꞌ.

⁴ Yụꞌtyevaꞌ mọꞌ mesa acaꞌĉan judyeyaꞌ räj mọꞌsiꞌ jedyeꞌ mesaches in. Chịmoꞌĉandye yụꞌtyevaꞌ mọꞌ mạijyedyes judyeyaꞌ jämiꞌtacseva ramparina in.

⁵ Yụꞌtyevaꞌ mọꞌ jiꞌcoꞌshayaquis jẹrejres oro tashcheꞌ buꞌyiꞌ mọꞌ cajón yụꞌtacdyeꞌtumsiꞌ p̂eyacdyeꞌ. Judyeyaꞌ chimeꞌ yụꞌme muꞌ quịꞌsiꞌ sisdyeꞌyaꞌ mọꞌ acaꞌ.

⁶ Yụꞌtyevaꞌ mọꞌ jiꞌcoꞌshayaquis Jenꞌdyes c̣hẹiꞌyaꞌ mọꞌ chụiꞌdyeꞌ acas mọꞌ.

⁷ Yụꞌtyevaꞌ mọꞌ jäꞌchäs favꞌdyidyes dyeteꞌĉan mọꞌ acaꞌ judyeyaꞌ mọꞌ jiꞌcoꞌshayaquis Jenꞌdyes, chat qui raꞌ bänꞌjeꞌ mọꞌ ojñiꞌtum.

⁸ Yụꞌtyevaꞌ mọꞌ naꞌru cọtoij buꞌyiꞌ acas judyeyaꞌ sisdyeꞌyaꞌ mọꞌ.

⁹ Cạvaꞌ acaꞌyaꞌ mọꞌ aseijte Jenꞌdyes judyeyaꞌ chojjevaꞌ räj jedyeꞌ mọꞌĉan Jenꞌsiꞌĉan acaꞌ tinates muꞌ. Meꞌ raꞌ pạrej buꞌyiꞌ yụꞌtacsi mi mọꞌ acaꞌ judyeyaꞌ mọꞌĉansiꞌ jedyeꞌ in, Jenꞌdyes mọmoꞌ yụꞌtac in. Chat qui raꞌ jämꞌ buꞌyiꞌ yụꞌtac Jenꞌsiꞌyaꞌ vej muꞌ.

¹⁰ Chimeꞌ aseijteyaꞌ chojjeꞌ mi mọꞌ jiꞌcoꞌshayaquis Jenꞌdyes judyeyaꞌ räj jedyeꞌ mọꞌsiꞌ. Meꞌ raꞌ pạrej buꞌyiꞌ yụꞌtac in Jenꞌdyes.

¹¹ Chimeꞌ raꞌ chojjeꞌ mi aseijteyaꞌ mọꞌ jäꞌchäs favꞌdyidyes judyeyaꞌ yuj mọꞌ paj qui Jenꞌdyes yụꞌtac mọꞌin.

¹² Tucseva muꞌ Aarón judyeyaꞌ ạvaꞌ muꞌ chat jiꞌdyucsi ramꞌ ojñiꞌyaꞌ.

¹³ Chat jịꞌquime muꞌ Aarón muꞌĉan quịꞌsiꞌ yụ́dyety carijtacdyeꞌ judyeyaꞌ chojjeme aseijteyaꞌ judyeyaꞌ yụꞌtem paj qui muꞌ carijtaqui cudyititydyety Jenꞌdyes yụ́dyes.

¹⁴ Tucsi mi muꞌin ạvaꞌ Aaróntyiꞌ muꞌ judyeyaꞌ jịꞌquicsim nayaꞌtyityĉan quịꞌsiꞌ.

¹⁵ Judyeyaꞌ chojjeyacsi mi aseijteyaꞌ yojdyemꞌ mi chojjete muꞌintyiꞌ jenꞌ muꞌin u, paj qui muꞌin carijtaqui yụ́dyes in cudyititydyety Jenꞌcheꞌ. Muꞌinsiꞌ chojjeyacdyeꞌ aseijteyaꞌ shupquiꞌ muꞌinsiꞌ yụꞌtacdyeꞌ räjĉandyes. Muꞌin raꞌ räjĉan cudyititydyety buꞌyi Jenꞌcheꞌ in chimeꞌ raꞌ ạvaꞌ muꞌin judyeyaꞌ vịyaꞌ muꞌin judyeyaꞌ vóshiꞌ muꞌintyiꞌ in.

¹⁶ Chat qui muꞌ Moisés jịꞌcätsepte räj Jenꞌsiꞌ p̂eyacdyeꞌ muꞌ yoj yidyemꞌ muꞌ Jenꞌ jiquej u.

¹⁷ Chaꞌsheꞌ in yiris yómodyeꞌ shubanyaꞌ in Egiptoĉan jiquej. Mọꞌ tashches mạyedyeꞌ tashchetyĉan ịvaj, mọꞌdye mạyedyeꞌ jämꞌ yụꞌtyeꞌ in Jenꞌsiꞌ acaꞌ tinates in.

¹⁸ Muꞌ Moisés dyäch buꞌyacñis yụꞌte p̂otsoꞌvi in, chimeꞌ buꞌyacñiꞌdye mọꞌ roc buꞌyis mọꞌ.

¹⁹ Chat qui muꞌ yụꞌte muꞌ p̂urꞌtacdyety fajcheꞌ quịꞌsiꞌ, shoꞌpaꞌtum buꞌyiꞌ fajcheꞌ, yoj jajitidyemꞌ Ayoꞌ u jiquej meꞌ buꞌyiꞌdye muꞌ jämꞌtyeꞌ.

²⁰ Moisés jäcte mij pärenꞌdye sánacdyeꞌtumtyiꞌ in, yụꞌtacsi cajónĉan yụꞌtacdyeꞌtumsiꞌ Jenꞌsiꞌ. Yụꞌtyeyeꞌ cạquis son cajónsiꞌ mọꞌ judyeyaꞌ änꞌjeꞌ änꞌtaquisyaꞌ mọꞌ.

²¹ Yụꞌtyeꞌ qui Jenꞌsiꞌĉan acaꞌ muꞌ mọꞌ tinates. Chimeꞌdye yụꞌte muꞌ juñum buꞌyity acaꞌĉantyiꞌ, jumchuiꞌtyiꞌ cajón, yoj jajitidyemꞌ Ayoꞌ jiquej u.

²² Chịmoꞌĉandye mọꞌ mesa Jenꞌsiꞌĉan acaꞌ muꞌ, ovetaque qui namꞌ mọꞌ juñum buꞌyityve.

²³ Mesacheꞌ muꞌ yụꞌte Jenꞌyadyety pan, yoj jajitidyemꞌ Ayoꞌ jiquej u.

²⁴ Chimeꞌdye mọꞌĉandyemꞌ mọꞌ mạijyedyes quic̣henꞌ mesa jätisvetaque yụꞌtyeꞌ.

²⁵ Moisés jiꞌjäꞌñeꞌ mọꞌ mạijyis Ayoꞌsiꞌyaꞌ vej muꞌ, yoj jajitidyemꞌ jiquej u räj muꞌ jịꞌcätseꞌ.

²⁶ Chimuꞌdye yụꞌtyeꞌ mọꞌ jiꞌcoꞌshayaquis jẹrejres oro, tashcheꞌ buꞌyiꞌ muꞌ juñum buꞌyity quịꞌsiꞌ.

²⁷ Mọꞌcheꞌ qui jiꞌcoꞌshayeꞌ jẹrejres, yoj jajitidyemꞌ Ayoꞌ jiquej u.

²⁸ Chat qui muꞌ Moisés ĉärꞌjeꞌ mọꞌ chụiꞌdyeꞌ quịꞌsiꞌyaꞌ.

²⁹ Chimeꞌdye yụꞌtyeꞌ jiꞌcoꞌshayaquis Jenꞌdyes, c̣hẹiꞌyaꞌ buꞌyiꞌ mọꞌ chụiꞌdyeꞌ acas mọꞌ, mọꞌcheꞌ qui muꞌ jiꞌcoꞌshayeꞌ Jenꞌdyes cuꞌdyeꞌ in judyeyaꞌ sicdyeꞌ chimeꞌ, yoj jajitidyemꞌ Ayoꞌ jiquej u, tas ọij räj cạ̈tsiꞌ.

³⁰ Chimuꞌdye muꞌ yụꞌtyeꞌ mọꞌ jäꞌchäs favꞌdyidyes mọꞌĉan dyeteꞌĉan mọꞌ acaꞌ Jenꞌsimꞌ judyeyaꞌ mọꞌ jiꞌcoꞌshayaquis Jenꞌdyes, chat qui yụꞌtyeyeꞌ mọꞌĉan ojñiꞌ favꞌdyidyes.

³¹ Mọꞌĉansiꞌdye joiꞌjequeꞌ favꞌdyidyes muꞌ Moisés judyeyaꞌ Aaróndyes chimeꞌ ạvadyes muꞌ, paj qui favaqui in un muꞌin judyeyaꞌ yuj muꞌin.

³² Favitacdyi in junꞌsiꞌ chuc sitiyaꞌ in Jenꞌsiꞌĉan acaꞌ muꞌ, meꞌ qui tsanꞌ c̣hẹiꞌyaꞌjeꞌ in mọꞌ jiꞌcoꞌshayaquis Jenꞌdyes muꞌ, ĉaĉaij na meꞌ yi Ayoꞌ.

³³ Chat qui muꞌ Moisés jämꞌ yụꞌtyeꞌ naꞌru cọtoij buꞌyiꞌ acas judyeyaꞌ jiꞌcoꞌshayaquis Jenꞌdyes. Muꞌ juñum buꞌyity sisdyeꞌyaꞌ muꞌ yụꞌte, jadyic carijtacdyemꞌ Moiséssiꞌ.

Dyicbaꞌbadyeꞌ Jenꞌsiꞌcheꞌ acaꞌ

^34-35 Aty meꞌsiꞌ jämꞌ yụꞌbite in Jenꞌsiꞌ acaꞌ muꞌ mọꞌ tinates, chat qui Ayoꞌsiꞌ dyicbaꞌbadyeꞌ muꞌ mọꞌcheꞌ tŝọiꞌ judyeyaꞌ mạijquedyeꞌ Ayoꞌsiꞌ chimeꞌ muꞌ tŝọiꞌ mọꞌĉan, mọꞌdyes qui muꞌ Moisés jam junꞌ tupuj siti muꞌĉan.

³⁶ Mọꞌ dyicbaꞌbadyeꞌ jịꞌĉoyacsis nashdyeꞌ muꞌin Israeltyiꞌ vóshiꞌ in. Mọꞌ chum tashiꞌ yạjquiꞌ mọꞌ acaꞌ miꞌiꞌ, jäquiꞌdye muꞌin muntyiꞌ in ñuryetaque in, cäc̣häꞌchuiꞌ in mọꞌ dyicbaꞌbadyeꞌ.

³⁷ Jambiꞌdyemꞌ mọꞌ miꞌiꞌ, tacyaꞌdye muꞌin in mọꞌ biseꞌ in mọꞌ dyicbaꞌbadyeꞌ junꞌsiꞌ chuc raꞌ jiyiꞌ.

³⁸ Räj nashdyeꞌ Israeltyis vóshiꞌ muꞌin, junanaj chuc jịjcaij nati in, mạij cạveꞌ in dyicbaꞌbadyeꞌ mọmoꞌ Ayoꞌsiꞌ muꞌ, mọꞌ acaꞌcheꞌ buꞌyis, tsedyedyeꞌ qui namꞌ tŝij buꞌyiꞌ.