Exodo 35 - Tsimane

Mọꞌ yụꞌtacdyeꞌ jịꞌjutyitidyes mạyedyeꞌ

¹ Muꞌ Moisés vaj muꞌyaꞌ jéyacsi räj muꞌin Israeltyiꞌ vóshiꞌ in chat jéyacsi: —Ọij nash mọꞌin yụꞌtacdyeꞌ Jenꞌsiꞌ muꞌ miꞌindyes:

² Jäbän raꞌ mạyedyeꞌ carijtaqui miꞌin, mọꞌ qui namꞌ yävätidyeꞌyis mạyedyeꞌ Jenꞌdyes raꞌ yụꞌtiñeꞌ miꞌin. Mọꞌ raꞌ shupquiꞌ mọꞌ jịꞌjutyitidyes mạyedyeꞌ Jenꞌdyes. Tyi ĉụiꞌ carijtaquity jụijyaꞌ in mọꞌĉan mạyedyeꞌ, sänꞌdyeꞌ raꞌ soꞌmac.

³ Jam raꞌ jiꞌjäꞌñetiñeꞌ tŝij ĉụiꞌsiꞌĉan acaꞌ miꞌin jịꞌjutyitidyesyaꞌ mạyedyeꞌ.

Mọꞌ tucdyeꞌ acadyes Jenꞌsiꞌ muꞌ

⁴ Moisés jéyacsi räj muꞌin Israeltyiꞌ vóshiꞌ in: —Ọij nash Jenꞌsiꞌ p̂eyacdyeꞌ muꞌ:

⁵ Ĉụiꞌsiꞌ raꞌ jedyeꞌ miꞌin jecaqui miꞌin mọꞌ tucdyeꞌ Jenꞌdyes. Tyi ĉụiꞌ mạꞌjeꞌtyiꞌ tupuj soꞌmete in Jenꞌ pạrej ọij jedyeꞌ in: oro, plata, bronce,

⁶ búmaꞌ yushñuty, búmaꞌ jäijnäty, búmaꞌ jeꞌñety faj, judyeyaꞌ yaꞌijtyiꞌ quịꞌsiꞌ lino, chivos fin muꞌ,

⁷ chivos shoꞌpaꞌ jäijnäs c̣huctacdyeꞌ, shoꞌpaꞌ mọꞌin marĉansiꞌ jeꞌñes jebaꞌbadyeꞌ in, son acacia,

⁸ aseijte orivos ramparinadyes in, jẹrejres in mọꞌdyes mọꞌ aseijte Jenꞌdyes judyeyaꞌ mọꞌ jẹrejres Jenꞌsiꞌĉandyes acaꞌ muꞌ,

⁹ mij ónice in judyeyaꞌ yoctyiꞌ yaꞌijtyiꞌ mij in muꞌchedyety in muꞌ nabactyity eꞌfeyaty judyeyaꞌ mọꞌ ñuts buꞌyis eꞌfeyaꞌ.

¹⁰ Räj muꞌin chị́jtyiꞌ in jemoñeꞌ atsij in judyeyaꞌ jämꞌtacsi räj mọꞌin jedyeꞌ in mạꞌjeꞌsiꞌ muꞌ Jenꞌ:

¹¹ Jenꞌsiꞌ acaꞌ tinates muꞌ judyeyaꞌ fajchety quịꞌsiꞌ in, shoꞌpaꞌ in, vij buꞌyacñis quịꞌsiꞌ in, tavara in, roc buꞌyis in, p̂otsoꞌvi in judyeyaꞌ dyäch buꞌyacñis in;

¹² mọꞌ cajón yụꞌtacdyeꞌtumsiꞌ p̂eyacdyeꞌ judyeyaꞌ mọꞌsiꞌ cạquis son in, mọꞌ cajónsiꞌ änꞌtacdyemꞌ, muꞌ juñum buꞌyity quịꞌsiꞌ.

¹³ Mọꞌ mesa judyeyaꞌ mọꞌin cạquis son mọꞌ judyeyaꞌ mọꞌin mesaches jedyeꞌ in, muꞌ pan Jenꞌyaꞌ yụꞌtactyiꞌ;

¹⁴ mọꞌ mạijyedyes mạijchuiꞌsis judyeyaꞌ räj jedyeꞌ mọꞌsiꞌ, mọꞌin ramparina in, mọꞌ aseijte ramparinadyes;

¹⁵ mọꞌ jiꞌcoꞌshayaquis jẹrejres, mọꞌin cạquis son in, mọꞌ aseijte Jenꞌdyes, judyeyaꞌ mọꞌ jẹrejres Jenꞌsiꞌĉandyes acaꞌ muꞌ; judyeyaꞌ muꞌ chụiꞌdyety quịꞌsiꞌ sisdyeꞌyaty mọꞌ Jenꞌsiꞌ acaꞌ tinates muꞌ;

¹⁶ mọꞌ jiꞌcoꞌshayaquis Jenꞌdyes, mọꞌ yụꞌtacdyes mọꞌ jiꞌcoꞌshayaquisdyes, mọꞌin cạquis son in judyeyaꞌ räj jedyeꞌ mọꞌsiꞌ in; mọꞌ jäꞌchäs favtidyes judyeyaꞌ yuj mọꞌ,

¹⁷ muꞌ quịꞌsiꞌ p̂ejyadyety naꞌru, muꞌtyiꞌ p̂otsoꞌvi in, dyäch buꞌyacñis in judyeyaꞌ muꞌ quịꞌsiꞌ naꞌrudyety sisdyeꞌyaꞌ mọꞌ p̂ejyas;

¹⁸ mọꞌin fiyero in bronce jacĉan junꞌ buꞌyis yụꞌtac saptacdyedyes juñꞌ buꞌyis in mọꞌ Jenꞌsiꞌ acaꞌ tinates muꞌ, mọꞌin naꞌrudyes in judyeyaꞌ räj mọꞌ soga muꞌindyes in;

¹⁹ muꞌ yaꞌijtyiꞌ quịꞌsiꞌ lino p̂anactyiꞌ carijtacdyedyes mọꞌĉan Jenꞌsiꞌĉan acaꞌ tinates muꞌ, pärenꞌdye quịꞌsiꞌ Aaróndyety judyeyaꞌ ạvadyety muꞌ jämꞌdyeyaꞌ raꞌ muꞌin carijtaqui muꞌĉan Jenꞌsiꞌ acaꞌ tinates muꞌ.

²⁰ Chat qui räj muꞌin Israeltyiꞌ vóshiꞌ in yacchute in muꞌ Moisés,

²¹ judyeyaꞌ tyi ĉụiꞌ mạꞌjeꞌtyiꞌ in soꞌmete Jenꞌ in jụꞌñis ĉụiꞌ tucdyeꞌ mọꞌdyes carijtacdyedyes Jenꞌsiꞌ acaꞌ tinates muꞌ, paj tsanꞌ jedyeꞌ acadyes, jam jụijyaꞌ jedyeꞌ quịꞌsidyes.

²² Räj muꞌin mạꞌjeꞌtyiꞌ in, paj tsanꞌ p̂en in, paj tsanꞌ sonꞌ in, tuqui shaporo in, jam jụijyaꞌ coꞌtyity in, jam jụijyaꞌ tyicacdyeꞌ oro in. Chat qui muꞌin soꞌmete Jenꞌ in cheꞌcheꞌjeyete mọꞌ tucdyeꞌ Jenꞌdyes.

²³ Räj muꞌin meꞌchuiꞌtyiꞌ jedyeꞌ in; búmaꞌ yushñuty, jäijnäty judyeyaꞌ jeꞌñety faj, judyeyaꞌ yaꞌijtyiꞌ quịꞌsiꞌ lino, judyeyaꞌ chivos fin muꞌ judyeyaꞌ chivos shoꞌpaꞌ jäijnäsĉan c̣huctacsiꞌ judyeyaꞌ shoꞌpaꞌ mọꞌin marĉansiꞌ jeꞌñes jebaꞌbadyeꞌ in tucsi in jedyeꞌ in.

²⁴ Muꞌin mạꞌjeꞌ in soꞌmete Jenꞌ in plata judyeyaꞌ bronce, meꞌ buꞌyiꞌ muꞌinsiꞌ tucdyeꞌ Jenꞌdyes. Chimeꞌ muꞌin meꞌchuiꞌtyiꞌ son acacia in tuiꞌ in mọꞌ carijtacdyedyes.

²⁵ Räj mọꞌin p̂en in chịꞌ búmaꞌ jämꞌtesiꞌ in, tute in muꞌ búmaꞌ yushñuty, judyeyaꞌ jäijnäty, judyeyaꞌ jeꞌñety faj, chimeꞌ tute in yaꞌijtyiꞌ quịꞌsiꞌ lino.

²⁶ Räj mọꞌin p̂en in chịꞌ búmaꞌ jämꞌtes chivos fin muꞌ meꞌ carijtaquiꞌ in, tyi ĉụiꞌ mạꞌjeꞌsiꞌ.

²⁷ Muꞌin tashcheꞌ buꞌyity in tucsi mij in ónice judyeyaꞌ yoctyiꞌ yaꞌijtyiꞌ mij in quịꞌsiꞌchedyety nabactyity eꞌfeyaty judyeyaꞌ mọꞌ ñuts buꞌyis eꞌfeyaꞌ.

²⁸ Chimeꞌ tucsi in jẹrejres judyeyaꞌ aseijte orivos mạijyedyes judyeyaꞌ aseijte Jenꞌdyes judyeyaꞌ mọꞌ jẹrejres Jenꞌsiꞌĉandyes acaꞌ muꞌ.

²⁹ Räj muꞌin sonꞌ Israeltyiꞌ vóshiꞌ in judyeyaꞌ p̂en chimeꞌ in, tyi ĉụiꞌ mạꞌjeꞌtyiꞌ in, tuqui jedyeꞌ ĉụiꞌ in Jenꞌdyes mọꞌdyes carijtacdyeꞌ. Joꞌmesyaꞌ chiquepte in Ayos dyijyedyeꞌ jiꞌjiyeyacsis Moisés jiquej.

Muꞌ Bezaleel judyeyaꞌ muꞌ Aholiab

³⁰ Muꞌ Moisés jéyacsi muꞌin Israeltyiꞌ vóshiꞌ in: —Jeshaꞌ, muꞌ Jenꞌ aty tsimꞌte muꞌ Bezaleel Urityiꞌ ạvaꞌ muꞌ judyeyaꞌ Hurtyiꞌ vịyaꞌ muꞌ judyeyaꞌ vóshiꞌ Judáty muꞌ muꞌtyiꞌ ñuruꞌtyity muꞌ,

³¹ judyeyaꞌ Jenꞌsiꞌ Ạꞌedyeꞌ muꞌ aty játŝuti muꞌ judyeyaꞌ aty jasoꞌmiti dyijyedyeꞌ judyeyaꞌ chị́dyeꞌ paj qui jedyeꞌ ĉụiꞌ tupuj jämꞌtyeꞌ muꞌ.

³² Paj qui tupuj carijte oro, judyeyaꞌ plata, judyeyaꞌ bronce. Anic jiyiꞌ jämꞌsiꞌ raꞌ shupquiꞌ muꞌsiꞌ carijtacdyeꞌ.

³³ Chimeꞌ muꞌ aty chịj carijte yaꞌijtyiꞌ mij in, junꞌ chuc täꞌtsacsi in judyeyaꞌ junꞌ chuc yụꞌtacsi orocheꞌ. Judyeyaꞌ muꞌ aty chịj carijtyeꞌ son in judyeyaꞌ jụꞌñis ĉụiꞌ yocsiꞌ carijtacdyeꞌ.

³⁴ Judyeyaꞌ Jenꞌsiꞌ Ạꞌedyeꞌ muꞌ aty soꞌmete dyijyedyeꞌ paj qui tupuj jịꞌchiyacsi yoctyiꞌ in, muꞌtum muꞌ Aholiab Ahisamactyiꞌ ạvaꞌ muꞌ judyeyaꞌ Dantyiꞌ ñuruꞌtyity muꞌ.

³⁵ Judyeyaꞌ muꞌ Jenꞌ aty soꞌmacsi chị́dyeꞌ paj qui tupuj muꞌin jämꞌtacsi jedyeꞌ ĉụiꞌ in judyeyaꞌ dyijyi junꞌ chuc tupuj meꞌjeꞌ jedyeꞌ in. Judyeyaꞌ junꞌ chuc p̂anaqui judyeyaꞌ junꞌ chuc jämꞌtacsi dibujo p̂anacdyeꞌyaꞌ búmaꞌ yushñuty, judyeyaꞌ jäijnäty, judyeyaꞌ jeꞌñety faj, chimeꞌ yaꞌijtyiꞌyaꞌ quịꞌsiꞌ lino. Muꞌin raꞌ shupqui mujuꞌchaty in joꞌmesĉan carijtacdyeꞌ.