Exodo 30 - Tsimane

Mọꞌ jiꞌcoꞌshayaquis jẹrejres judyeyaꞌ mọꞌ jäꞌchäs favꞌdyidyes

¹ Chimeꞌ jämꞌtiñeꞌ raꞌ yiris jiꞌcoꞌshayaquis jẹrejres, son acacia raꞌ jämꞌtiñeꞌ.

² Meꞌquiꞌyaꞌ raꞌ jämꞌtiñeꞌ, vaj meꞌquiꞌyaꞌmun moc̣hadyemꞌ judyeyaꞌ chichimecve därvedyemꞌ, vạjpedyeꞌ quiꞌtac ĉanamꞌ centimetro mọꞌ, judyeyaꞌ arajtac quiꞌtac centimetro moc̣hedyemꞌ. Chaꞌraiꞌ raꞌ jämi, mọꞌin chaꞌraras mọꞌ jemoñeꞌ mọꞌcheꞌdye sonꞌ jämi.

³ Fajcheꞌ raꞌ tyeij oro judyeyaꞌ úvemun, judyeyaꞌ raꞌ chaꞌrarascheꞌ chimeꞌ. Fiñeiꞌve raꞌ yụꞌtac oro chimeꞌ.

⁴ Jämꞌtacsevac päräꞌ coꞌtyity oro chat raꞌ yụꞌtacsi mi c̣hẹiꞌyaꞌ buꞌyiꞌ mọꞌ fiñeis ọĉanyaꞌ, chimeꞌ jämꞌtacsi raꞌ mi vaj meꞌdye yocvedyes. Mọꞌinĉan raꞌ yụꞌtac mọꞌin cạquis son in.

⁵ Jämꞌtacsevac päräꞌ son acacia fajcheꞌ raꞌ tyeij oro.

⁶ Yụꞌtyevaꞌ mọꞌ jiꞌcoꞌshayaquis jẹrejres c̣hẹiꞌyaꞌ muꞌ juñum buꞌyity quịꞌsiꞌ mọꞌĉandye mọꞌ Mọjoꞌchaꞌ Tsäquiꞌsis Vavdyeꞌ yóĉandyemꞌ mọꞌyaꞌ o mọꞌ cajón yụꞌtacdyeꞌtumsiꞌ p̂eyacdyeꞌ. Yóyaꞌdyemꞌ raꞌ yụ u jiꞌrebeyac.

⁷ Aarón jemoñeꞌ jiꞌcoꞌshayeꞌ jẹrejres mọꞌcheꞌ jiꞌcoꞌshayaquischeꞌ jẹrejres pamꞌ yoquiꞌdyemꞌ jämꞌ yụꞌtacseban ramparina u in.

⁸ Chimeꞌ raꞌ yómoꞌ jemoñeꞌ jiꞌcoꞌshayeꞌ jẹrejres aty jiꞌjäꞌnacsiyaꞌ ramparina in. Meꞌ raꞌ räjĉan yụꞌtiñeꞌ miꞌin paj qui räjĉan raꞌ jẹrejreꞌiꞌ Jenꞌsiꞌyaꞌ vej muꞌ.

⁹ Jam raꞌ junꞌ jiꞌcoꞌshayetiñeꞌ yocsiꞌ jedyeꞌ mọꞌcheꞌ jiꞌcoꞌshayaquischeꞌ jẹrejres; mijam raꞌ yocsiꞌ jẹrejres, mijam yocsiꞌ jiꞌcoꞌshayacdyeꞌ, mijam tucdyeꞌ harina, mijam tucdyeꞌ vino.

¹⁰ Yiriꞌ quiꞌ raꞌ yirisĉan yómodyeꞌ siteꞌ muꞌ Aarón taiꞌtacsi chäshyaꞌ mọꞌin chaꞌraras in jiꞌcoꞌshayaquis jẹrejres. Mọꞌ taiꞌtacdyeꞌ jịꞌĉoiꞌ busjeyacdyeꞌ juchaj. Meꞌ raꞌ miꞌin cäts yómodyeꞌ jịjcaiꞌ räjĉan. Joꞌmesyaꞌ mọꞌ jiꞌcoꞌshayaquis jẹrejres jiyiꞌ jämꞌsiꞌ buꞌyiꞌ yụꞌtac Jenꞌdyes mọmoꞌ.

Muꞌ querec̣ha tsạꞌsidyes muꞌin

¹¹ Muꞌ Jenꞌ jajiti muꞌ Moisés:

¹² —Venchuiꞌyaꞌ mọꞌ tupudyeꞌ tsicdyes muꞌin Israeltyiꞌ vóshiꞌ in. Mọꞌĉandye tupudyeꞌ cäts raꞌ yirityityij querec̣ha soꞌmete in Jenꞌ tsạꞌsidyes muꞌin. Soꞌmete jụijyaꞌ muꞌin itŝiꞌ raꞌ mọꞌyaꞌ fersiꞌ japacjodyeꞌ tŝọcsiꞌ muꞌin tsicdyesĉan tupudyeꞌ.

¹³ Cäts yirityityij tsictyiꞌ in jemoñeꞌ raꞌ soꞌmete yiriꞌtac yiris jiyi gramo plata yojdyemꞌ muꞌin Levítyiꞌ vóshiꞌ u in tuputuiꞌyaꞌ plata in.

¹⁴ Räj muꞌin päräꞌ quiꞌtac yómodyeꞌ tyitity in judyeyaꞌ dadamꞌ ishoꞌmuntyiꞌ in jemoñeꞌ soꞌmete in Jenꞌ mọꞌ tucdyeꞌ plata.

¹⁵ Muꞌin jedyeꞌtumtyiꞌ in jam raꞌ damꞌdye cäch plata soꞌmete in Jenꞌ. Mijam muꞌin ñịbety in uyaꞌyaꞌ plata soꞌmete in Jenꞌ. Ọij nash mọꞌ tucdyeꞌ Jenꞌdyes, muꞌ soꞌmacsity tsạꞌsiꞌ muꞌin, meꞌdyes jemoñeꞌ yaꞌityeꞌ tsạꞌsidyes in.

¹⁶ Mọꞌ tucdyeꞌ plata muꞌinsiꞌ in Israeltyis vóshiꞌ in yụꞌtac mọꞌdyes carijtacdyeꞌ meꞌjeꞌsiꞌ in mọꞌĉan Jenꞌsiꞌĉan acaꞌ tinates muꞌ. Mọꞌ raꞌ shupquiꞌ yiris jiꞌdyijvitidyes Jenꞌyaꞌ junꞌ chuc muꞌin yaꞌityeꞌ in tsạꞌ buꞌyedyes muꞌin.

Mọꞌ Jäꞌchäs Favtidyes

¹⁷ Muꞌ Jenꞌ jajiti muꞌ Moisés:

¹⁸ —Chimeꞌdye raꞌ jämꞌtiñeꞌ jäꞌchäs favtidyes, cobre raꞌ mọꞌ jämꞌtiñeꞌ yujtum buꞌyiꞌ. Mọꞌyaꞌ raꞌ yụꞌtac dyeteꞌĉan mọꞌ jiꞌcoꞌshayaquis Jenꞌdyes judyeyaꞌ mọꞌ acaꞌ yụ́siꞌ mọꞌ tinates, chat qui raꞌ ojñiꞌtum yụꞌtiñeꞌ.

¹⁹ Mọꞌĉansiꞌ raꞌ jäqueꞌ in ojñiꞌ muꞌ Aarón judyeyaꞌ räj ạvaꞌ muꞌ paj qui favdyi in unyaꞌ muꞌin judyeyaꞌ yujyaꞌ chimeꞌ muꞌin.

²⁰ Jämꞌdyeyaꞌ sitiyaꞌ muꞌin Jenꞌsiꞌĉan acaꞌ tinates muꞌ, tashcheꞌ raꞌ favti ojñiꞌyaꞌ in paj qui jam säñi in. Chimeꞌ jämꞌdyeyaꞌ muꞌin c̣hẹiꞌyaꞌjeyac in mọꞌ jiꞌcoꞌshayaquis Jenꞌdyes paj qui soꞌmete in Jenꞌ mọꞌ jiꞌcoꞌshayacdyeꞌ

²¹ tashcheꞌ raꞌ favaqui un muꞌin judyeyaꞌ yuj muꞌin paj qui jam säñi in. Ọij yụꞌtacdyeꞌ Aaróndyes judyeyaꞌ vóshidyes muꞌ räjĉandyes.

Mọꞌ aseijte Jenꞌdyes

²² Muꞌ Jenꞌ jajiti muꞌ Moisés:

²³ —Dyimꞌtacsevaꞌ mọꞌin jẹrejres in: jäbän quiro yạꞌsiꞌ mirra, chibin quiro jämꞌ p̂oquis caña, chibin quiro jämꞌ p̂oquis canela

²⁴ judyeyaꞌ jäbän quiro casia. Tuputucsi ramꞌ vaj cäts javquedyeꞌ mọꞌin yojdyemꞌ muꞌin Levítyiꞌ vóshiꞌ u tuputuiꞌyaꞌ in. Chimeꞌ raꞌ tuiꞌ in vạjpedyeꞌ ritro aseijte orivos.

²⁵ Muꞌ chịj jämꞌtyeꞌtyiꞌ jẹrejres jemoñeꞌ cafonꞌjeyacsi mọꞌin paj qui yiris shupquiꞌ jämꞌ p̂oquis jẹrejres aseijte. Ọij aseijte Jenꞌdyes mọmoꞌ yụꞌtac Jenꞌsidyes carijtacdyeꞌ muꞌ.

²⁶ Mọꞌ aseijte Jenꞌdyes mọꞌyaꞌ raꞌ chojjeꞌ mi Jenꞌsiꞌ acaꞌ tinates muꞌ judyeyaꞌ mọꞌ cajón yụꞌtacdyeꞌtumsiꞌ p̂eyacdyeꞌ.

²⁷ Judyeyaꞌ mọꞌ mesa, judyeyaꞌ räj mesaches jedyeꞌ in, judyeyaꞌ mọꞌin mạijyedyesches ramparina in, judyeyaꞌ räj mọꞌsiꞌ jedyeꞌ in, judyeyaꞌ mọꞌ jiꞌcoꞌshayaquis jẹrejres,

²⁸ judyeyaꞌ mọꞌ jiꞌcoꞌshayaquis Jenꞌdyes, judyeyaꞌ räj jedyeꞌ mọꞌsiꞌ, judyeyaꞌ mọꞌ jäꞌchäs favtidyes, judyeyaꞌ yuj mọꞌ.

²⁹ Joꞌmesyaꞌ raꞌ mi pạrej buꞌyiꞌ Jenꞌdyes yụꞌtacsi mi mọꞌin. Jedyeꞌ ĉụiꞌ tocoꞌjeyacsiyaꞌ mi jämꞌ raꞌ Jenꞌdyes shupquiꞌ yojdyemꞌ mọꞌin o in aty jämꞌ Jenꞌdyes yụꞌtac in.

³⁰ Chojjete raꞌ mi Aarón judyeyaꞌ ạvaꞌ muꞌ mọꞌyaꞌdye aseijte judyeyaꞌ pạrej buꞌyi yụꞌtacsi mi paj qui cudyitity Jenꞌcheꞌ carijtaqui in."

³¹ Jéyacseva muꞌin Israeltyiꞌ vóshiꞌ in: "Ọij aseijte Jenꞌdyes mọmoꞌ räjĉandyes.

³² Jam raꞌ chojjeꞌ mi yoctyiꞌcheꞌ muntyiꞌ, mijam raꞌ ĉụiꞌdyes jämꞌtiñeꞌ miꞌin. Mọꞌ nash Jenꞌdyes mọmoꞌ.

³³ Tyi ĉụiꞌ mọꞌ aseijte jämꞌtyeꞌtyiꞌ jụijyaꞌ chat chojjeꞌ mọꞌ yoctyiꞌcheꞌ muntyiꞌ, jam yiritycheꞌ cudyitity Jenꞌcheꞌ jụijyaꞌ, muꞌ muntyiꞌ jemoñeꞌ vaꞌquectinte miꞌin, aty jam raꞌ Israeltyiꞌ vóshiꞌ muꞌ ĉọ́tinte miꞌin.

Mọꞌin Jẹrejres in

³⁴ Muꞌ Jenꞌ jajiti muꞌ Moisés: —Dyimꞌtacsevac mọꞌin jẹrejres in: estacte, onycha, gálbano judyeyaꞌ franquincenso. Vaj meꞌdye raꞌ tuputucsi miꞌin.

³⁵ Yirity raꞌ chịj jämꞌtyeꞌtyiꞌ jẹrejres cafonꞌjeyacsi jicojtum. Mọꞌ raꞌ shupquiꞌ yiris jämꞌ p̂oquiꞌsiꞌ jẹrejres yụꞌtac Jenꞌdyes mọmoꞌ.

³⁶ Pụiꞌjevaꞌ damꞌ mọꞌ jẹrejres chat qui raꞌ yụꞌtyeꞌ mi tashcheꞌyaꞌ mọꞌ cajón yụꞌtacdyeꞌtumsiꞌ p̂eyacdyeꞌ, yóyaꞌdyemꞌ yụ raꞌ rébeyac u. Mọꞌ jẹrejres yụꞌtac Jenꞌdyes mọmoꞌ.

³⁷ Jam raꞌ jämꞌtiñeꞌ mọꞌ jẹrejres ĉụiꞌdyes mi. Jenꞌdyes mọmoꞌ ọij jẹrejres.

³⁸ Tyi ĉụiꞌ jämꞌtyeꞌtyiꞌ jụijyaꞌ joꞌmes jẹrejres paj qui maꞌjotyebiꞌ mọꞌsiꞌ p̂oquedyeꞌ, muꞌ muntyiꞌ jemoñeꞌ vaꞌquectinte miꞌin aty jam raꞌ Israeltyiꞌ vóshiꞌ muꞌ ĉọ́tinte miꞌin.