Exodo 25 - Tsimane

Dyimꞌtac Jenꞌdyes acaꞌ

¹ Ayoꞌ jajiti muꞌ Moisés:

² —Jéyacseva muꞌin Israeltyiꞌ vóshiꞌ in paj tuyin yụ in dyimꞌtacdyeꞌ muꞌin, tyijtyi chuc ĉojtyiꞌĉan mạꞌjeꞌtyiꞌ in, paj muꞌin tuyin yụ in.

³ Paj meꞌ meꞌ tuyin yụ in: oro judyeyaꞌ plata, judyeyaꞌ cobre,

⁴ judyeyaꞌ quịꞌsiꞌ: yushñuty judyeyaꞌ jäijnäty judyeyaꞌ jeꞌñety faj chimeꞌ, judyeyaꞌ yaꞌijtyiꞌ quịꞌsiꞌ lino, judyeyaꞌ chivos fin muꞌ,

⁵ judyeyaꞌ shoꞌpamꞌ c̣huctacsiꞌ jäijnäsĉan, judyeyaꞌ yocsiꞌ shoꞌpaꞌ yaꞌiꞌsiꞌ, judyeyaꞌ jämꞌsiꞌ son acacia,

⁶ judyeyaꞌ mạijyedyes aseijte, judyeyaꞌ jẹrejres taiꞌtacdyes aseijtetumsiꞌ, judyeyaꞌ coꞌshaiꞌsiꞌ jẹrejres

⁷ judyeyaꞌ yaꞌijtyiꞌ mij ónice, tupuj joꞌmemety dyimꞌte in. Muꞌ mij ónice eꞌfeyadyety quịꞌsiꞌ muꞌindyety in tashcheꞌdyety cudyitity yụ́cheꞌ in.

⁸ Ọij raꞌ dyimꞌtacdyeꞌ tuyinsiꞌ raꞌ yụ in, mọꞌ raꞌ yụꞌtac paj qui muntyiꞌ in jämꞌtyiyin acaꞌ yụ in, yụ qui raꞌ jajbuꞌyacsi.

⁹ Jemoñeꞌ chiqueꞌ mi mọꞌ p̂eyacdyeꞌ soꞌmeyes raꞌ yụ, meꞌ raꞌ jämꞌtac mọꞌ acaꞌ tinates, räj raꞌ mọꞌĉansiꞌ jedyeꞌ in, chijoꞌmemeiꞌdye raꞌ jämꞌtacsim yódyeiꞌdyemꞌ raij jịꞌcaveyeyes u.

Cajón yụꞌtacdyeꞌtumsiꞌ p̂eyacdyeꞌ

¹⁰ Jämꞌtiñeꞌ raꞌ miꞌin yiris cajón Jenꞌdyes, jämꞌsiꞌ raꞌ son acacia, mọꞌ raꞌ jämꞌtiñeꞌ. Meꞌquis raꞌ jämꞌtiñeꞌ, yiris metro judyeyaꞌ yiriꞌtac centimetro moc̣hadyemꞌ, judyeyaꞌ jäbän quiꞌtac ĉanamꞌ jiyiꞌ centimetro därvedyemꞌ, judyeyaꞌ jäbän quiꞌtac ĉanamꞌ jiyiꞌ centimetro moc̣hedyemꞌ, méquis raꞌ jämꞌtac.

¹¹ Fajcheꞌ raꞌ tyeij oromꞌ judyeyaꞌ ọĉan, judyeyaꞌ fiñeiꞌve oro yụꞌtac.

¹² Jämꞌtacsi ram vạjpedyeꞌ coꞌtyity oro cạquisdyes son in. Chat qui raꞌ peiꞌtacsi mi muꞌin coꞌtyity in mọꞌinyaꞌ in vạjpedyeꞌsisyaꞌ yuj cajónsiꞌ in. Päräꞌ muꞌin yirisve yụꞌtac in, päräꞌ muꞌin yocve yụꞌtac.

¹³ Chat jämꞌtacsi ram cạquis son in mọꞌ son acacia chat fajcheꞌ raꞌ tyeij oro mọꞌ.

¹⁴ Yụꞌtacsevac mọꞌin cạquis son in coꞌtyityĉan in paj qui joꞌmesyaꞌ cạiꞌ in mọꞌ cajón.

¹⁵ Taĉan buꞌyiꞌ raꞌ mọꞌin cạquis son in. Jam raꞌ junꞌ meijjeyacseban miꞌin.

¹⁶ Jábiyaꞌ yụ raꞌ soꞌmeye mọꞌ yụꞌtacdyeꞌtumsiꞌ p̂eyacdyeꞌ chat qui raꞌ mi mọꞌ yụꞌtyeꞌ cajónĉan.

¹⁷ Chimeꞌdye raꞌ jämꞌtiñeꞌ cajónsiꞌ änꞌtacdyemꞌ, oro ramꞌ chimeꞌquiꞌyaꞌdye raꞌ muꞌ yiris metro judyeyaꞌ yiriꞌtac centimetro moc̣hadyemꞌ judyeyaꞌ jäbän quiꞌtac ĉanamꞌ jiyiꞌ centimetro därvedyemꞌ, meꞌquiꞌ raꞌ. Mọꞌ änꞌtacdyeꞌ jeꞌ in: jịꞌcavacdyes vayactacdyes juchaj, jeꞌ in.

¹⁸ Chimeꞌdye raꞌ jämꞌtacsi miꞌin päräꞌ querubin buꞌyity in, yudyej ramꞌ oro jämiꞌ, martiryoyaꞌ raꞌ jämi, tätscäiꞌchecheꞌ änꞌtacdyeꞌ yụꞌtac in.

¹⁹ Yirity ramꞌ tyäväꞌ oro jämꞌtac. Muꞌ yirity querubin buꞌyity tätscäiꞌcheꞌ raꞌ yụꞌtiñeꞌ miꞌin, muꞌ na yoctyiꞌ yocsiꞌcheꞌ tätscäiꞌcheꞌ,

²⁰ vaj vejti raꞌ in. Jatsaꞌ buꞌyiꞌ raꞌ pavaj jämi muꞌin paj qui juñumchubiꞌ änꞌtacdyeꞌ mọꞌsiꞌ in, mọꞌ jịꞌcavacdyes vayactacdyes juchaj, meꞌ buꞌyiꞌ raꞌ yụꞌtacsi miꞌin.

²¹ Aty meꞌ jämꞌtac jụijyaꞌ, chat qui raꞌ muꞌĉan yụꞌtacsi miꞌin muꞌin mij yụꞌtacdyeꞌtumtyiꞌ in, muꞌ raꞌ soꞌmeyety yụ, chat qui raꞌ änꞌjetiñeꞌ mọꞌ cajón.

²² Jäquiꞌve raꞌ yụ muꞌcheꞌ ĉọcye, fajcheꞌ mọꞌ änꞌtaquis dyeteꞌĉan raꞌ päräꞌ querubin in, muꞌcheꞌ raꞌ yụ ĉọcye, judyeyaꞌ raꞌ soꞌmeye räj p̂eyacdyeꞌ yụ Israeltyidyes vóshiꞌ in, mi qui raꞌ jiꞌjiyeyacsi.

Mesa yụꞌtacdyety pan Jenꞌyadyety

²³ Chimeꞌdye jämꞌtiñeꞌ raꞌ mesa, jämꞌsiꞌ raꞌ son acacia, mọꞌ raꞌ jämꞌtiñeꞌ miꞌin, meꞌquiꞌyaꞌ raꞌ jämꞌtiñeꞌ mọꞌ: arajtac quiꞌtac centimetro raꞌ moc̣hadyemꞌ mọꞌ, judyeyaꞌ vạjpedyeꞌ quiꞌtac ĉanamꞌ jiyiꞌ centimetro raꞌ därvedyemꞌ, judyeyaꞌ jäbän quiꞌtac ĉanamꞌ jiyiꞌ raꞌ centimetro moc̣hedyemꞌ, meꞌquiꞌyaꞌ raꞌ jämꞌtiñeꞌ miꞌin.

²⁴ Fajcheꞌ raꞌ tyeij oromꞌ judyeyaꞌ fiñeiꞌve oro yụꞌtac.

²⁵ Chimeꞌ tätscäiꞌve cọtoij mọꞌ mesa yụꞌtyeꞌ raꞌ tavara q̂uenꞌĉan centimetro mọꞌches. Fajcheꞌ raꞌ tyeij oro tavaracheꞌ judyeyaꞌ fiñeiꞌve oro yụꞌtac.

²⁶ Jämꞌtacsi ram vạjpedyeꞌ coꞌtyity oro raꞌ cạquis son in. Chat peiꞌtacsi raꞌ mi muꞌin yujcheꞌ mesas in quipdyivevej in.

²⁷ Muꞌin coꞌtyity cạquis son in jemoñeꞌ yụꞌtac c̣hẹiꞌyaꞌ mọꞌ tavara cọtoij buꞌyis paj qui tupuj c̣hẹiꞌyaꞌ buꞌyiꞌ cạquis son in.

²⁸ Jämꞌtacsi ram cạquis son in mọꞌ son acacia chat fajcheꞌ raꞌ tyeij oro mọꞌ. Mọꞌyaꞌ raꞌ cạiꞌ in mọꞌ mesa.

²⁹ Chimeꞌ raꞌ jämꞌtacsi mi pijiꞌ in judyeyaꞌ tasa in oro raꞌ. Judyeyaꞌ oro raꞌ jämꞌtacsi mi chojoꞌdacdyes in judyeyaꞌ jäꞌchäs in chojoꞌdacdyes Jenꞌsidyes tucdyeꞌ in.

³⁰ Muꞌcheꞌ raꞌ yụꞌtac pan Jenꞌyadyety, räjĉan buꞌyi raꞌ yụ́siꞌyaꞌ vej.

Mạijyedyes Jenꞌsiꞌĉan Acaꞌ

³¹ Chimeꞌdye raꞌ jämꞌtiñeꞌ yiris mạijyedyes Jenꞌsiꞌĉan acaꞌ tinates muꞌ oro cashacac raꞌ martiryoyaꞌ jämi. Yiris raꞌ tyäväꞌ oro jämꞌtiñeꞌ mọꞌ, yuj mọꞌ judyeyaꞌ pech mọꞌ judyeyaꞌ mọꞌin jäꞌchäs jámes mọꞌ judyeyaꞌ mọꞌin comonꞌsis jámes mọꞌ judyeyaꞌ mọꞌin aꞌ mọꞌ jámes mọꞌ.

³² Jämꞌtiñeꞌ jäbän dacaꞌ mọꞌ, ọ́ve chibin ọ́ve chibin buꞌyiꞌ.

³³ Chibin raꞌ jäꞌchäs jámes mọꞌ jämiꞌ jeꞌñes jáme almendras mọꞌ mọꞌintum comonꞌsis jámes judyeyaꞌ mọꞌin aꞌ mọꞌ jámes mọꞌ yirischeꞌ raꞌ dacaꞌ mọꞌin in. Chichibindye raꞌ mọꞌyaꞌ yocsiꞌcheꞌ dacaꞌ judyeyaꞌ joꞌmeiꞌ raꞌ räj mọꞌin jäbändye dacaꞌ in.

³⁴ Judyeyaꞌ pechcheꞌ raꞌ mọꞌyaꞌ vạjpedyeꞌ jäꞌchäs jámes mọꞌ mọꞌtum comonꞌsis jámes judyeyaꞌ mọꞌin aꞌ mọꞌ jámes mọꞌ.

³⁵ Yiris raꞌ comonꞌsis jámes ọĉan buꞌyiꞌ yóyaꞌdyemꞌ shupquiꞌ mọꞌin tashches päräꞌ dacaꞌ o in. Yocsiꞌ comonꞌsis jámes raꞌ ọĉan buꞌyiꞌ päräꞌsis dacaꞌ in judyeyaꞌ mọꞌ chibinyis comonꞌsis jámes raꞌ ọĉan buꞌyiꞌ chibinyisyaꞌ dacaꞌ in. Jäbän dacaꞌ räjtum in.

³⁶ Mọꞌin comonꞌsis jámes in judyeyaꞌ mọꞌin dacaꞌ in jämꞌtac in muꞌyaꞌdye tyäväꞌtyityyaꞌ oro pech mọꞌ judyeyaꞌ yuj mọꞌ jämꞌtyeꞌsiꞌ in, yirityyaꞌ oro jämiꞌ mọꞌ mạijyedyes cashac martiryoyaꞌ jämiꞌ.

³⁷ Judyeyaꞌ raꞌ jämꞌtinte yävätidyeꞌ ramparina in mọꞌĉandyes mạijyedyes, chat yụꞌtacsevaꞌ mọꞌcheꞌ paj qui mạijchuiꞌ in mọꞌ vavdyeꞌ tashcheꞌyas.

³⁸ Judyeyaꞌ muꞌ tätsaquity búmaꞌ ramparinadyety judyeyaꞌ mọꞌin pijiꞌ in oro raꞌ jämiꞌ in.

³⁹ Jämꞌtacsi ram muꞌ mạijyedyes in judyeyaꞌ yocsiꞌ jedyeꞌ in mọꞌdyes mạijyedyes muꞌyaꞌ chibin quiꞌtac ĉanamꞌ jiyi quiro oro jämꞌtyiꞌ.

⁴⁰ Anic raꞌ jämꞌ jämꞌtacsi mi cäts yojdyemꞌ mọꞌ dyijyedyeꞌ soꞌminsiꞌ u mi muꞌ Jenꞌ jịꞌcavacdyeꞌyaꞌ mụcuꞌcheꞌ jiquej.