Exodo 21 - Tsimane

Yụꞌtacdyeꞌ úñitydyes in

¹ Ọij yụꞌtacdyeꞌ in mi raꞌ soꞌmacsi:

² Yaꞌij jụijyaꞌ miꞌin yirity úñity hebreo, muꞌ raꞌ carijtaqui miꞌindyes jäbän yómodyeꞌ mọmoꞌ in. Mọꞌ na yävätidyeꞌyis yómodyeꞌ muꞌ raꞌ faraj buꞌban tupuj qui jọban aty jam tyi dévetute.

³ Yirity jụijyaꞌ muꞌ úñedyeꞌĉan siti, chiyiritydye raꞌ shuban muꞌ úñedyeꞌĉan. Vämity jụijyaꞌ úñedyeꞌĉan siti, p̂entum raꞌ shuban muꞌ.

⁴ Meꞌ na jụijyaꞌ úñedyeꞌĉan yirity muntyiꞌ muꞌtyiꞌ aꞌtumtyiꞌ soꞌmete jụijyaꞌ yiris p̂en, chat ạvaꞌyiꞌ mọꞌ. Mọꞌ na p̂en judyeyaꞌ ạvaꞌ mọꞌ yejĉoiꞌ aꞌtumtyis in aty venjoiꞌyaꞌ mọꞌ tupudyeꞌ shubanyaꞌ muꞌ muntyiꞌ úñedyeꞌĉantyiꞌ. Muꞌdye mọmoꞌ raꞌ faraj jọban, aty jam tyi dévetute.

⁵ Paj tsanꞌ meꞌ, yi jụijyaꞌ muꞌ muntyiꞌ junꞌ chuc muꞌ mạꞌjete aꞌtumtyiꞌ muꞌ judyeyaꞌ mạꞌjeyaqui p̂en muꞌ judyeyaꞌ ạvaꞌ muꞌ, meꞌdyes qui muꞌ jam mạꞌjeꞌ faraj jọban.

⁶ Q̂uinꞌ chat muꞌtyiꞌ aꞌtumtyiꞌ cạte raꞌ muꞌ úñity ayoꞌyaꞌ chimeꞌ muꞌ raꞌ cạte chụiꞌdyeꞌyaꞌ acas mọꞌ, jam jụijyaꞌ mọꞌ tap buꞌyis chụiꞌdyes chat muꞌ raꞌ jonocjebite chun muꞌ fiyeroyaꞌ. Chat qui muꞌ raꞌ shupqui muꞌtyiꞌ úñity räjĉan.

⁷ Yirity sonꞌ jiꞌmincaqui p̂en ạvaꞌ muꞌ jụijyaꞌ paj qui meꞌ úñis shupquiꞌ, mọꞌ raꞌ jam faraj shubanꞌ yojdyemꞌ sonꞌ u in.

⁸ Paj tsanꞌ meꞌ mọꞌtyiꞌ aꞌtumtyiꞌ muꞌ jam mọꞌ maꞌjotyeꞌ jụijyaꞌ judyeyaꞌ aty jam mọꞌ mạꞌjeꞌ jụijyaꞌ, paj tsanꞌ mọꞌ yaꞌiꞌ jiquej muꞌ p̂endyes ĉụiꞌdyes muꞌ. Meꞌdyes qui mọꞌtyiꞌ jenꞌ muꞌ, jam jụijyaꞌ yoctyiꞌ chätidyeꞌ mọꞌ, tupuj yaꞌityebajte in muꞌ aꞌtumtyiꞌ c̣honꞌdyedyesyaꞌ mọꞌ. Mọꞌtyiꞌ aꞌtumtyiꞌ muꞌ jam tupuj jiꞌmincaiꞌ mọꞌ yoctyiꞌyaꞌ muntyiꞌ in jam chätidyeꞌ mọꞌsiꞌ in ĉaĉaij na muꞌ jam jịꞌcätsaqui tashches dyijyedyeꞌ mọꞌches jiquej.

⁹ Yirity aꞌtumtyiꞌ yaꞌij mọꞌ p̂en ạvadyes jụijyaꞌ, muꞌ aꞌtumtyiꞌ jam tupuj yejĉoij dyijtuiꞌ mọꞌ jeñej úñis muꞌ. Muꞌ aꞌtumtyiꞌ jemoñeꞌ dyijtuiꞌ mọꞌ jeñej ĉụiꞌsiꞌ ạvaꞌ muꞌ.

¹⁰ Muꞌ vämi yocsiꞌcheꞌ p̂en jụijyaꞌ, muꞌ jemoñeꞌ yejĉoij soꞌmeꞌ mọꞌ tashches p̂en muꞌ säcsedyeꞌ, quịꞌsiꞌ judyeyaꞌ jemoñeꞌ mọꞌtum ĉọshan.

¹¹ Meꞌ na jụijyaꞌ muꞌ muntyiꞌ jam soꞌmeꞌ mọꞌ ọij chibin jedyeꞌ in, mọꞌ raꞌ tupuj faraj shubanꞌ mọꞌ, aty jam tyi dévetute.

Yụꞌtacdyeꞌ jiꞌmeꞌtacdyes in

¹² Tyi ĉụiꞌ chute yoctyiꞌ chat meꞌdye ijate, muꞌ jachutity anic raꞌ ijabajtinte miꞌin.

¹³ Paj tsanꞌ meꞌ, muꞌ jachutity jam dyijyedyeꞌtum ijate jụijyaꞌ, ĉụiꞌ mọmoꞌ jiyi jam ñutschuc Jenꞌyaꞌ jụijyaꞌ, chat muꞌ jachutity jemoñeꞌ ĉaꞌjoij muꞌ yóyaꞌdyemꞌ yi muꞌ Jenꞌ u paj qui joꞌmety in tupuj muꞌĉan bäꞌyi in.

¹⁴ Yirity jụijyaꞌ tashcheꞌ chum dyijyi junꞌ chuc muꞌ raꞌ ijate yoctyiꞌ chat qui anic ijate muꞌ, muꞌ ijatety moch raꞌ cạtinte miꞌin, jam yụ́syaꞌ jiꞌcoꞌshayaquis Jenꞌdyes chat muꞌyaꞌdye raꞌ ijatinte miꞌin.

¹⁵ Tyi chuc chuquity jenꞌ muꞌ, jam jụijyaꞌ tseꞌ muꞌ, muꞌdye raꞌ jemoñeꞌ sänꞌdyeꞌ soꞌmac.

¹⁶ Tyi chuc shuꞌatute yirity muntyiꞌ chat jiꞌmincate, jam jụijyaꞌ dạcte muꞌ jambiꞌdyemꞌ jiꞌmincate, muꞌ shuꞌatutety jemoñeꞌ sänꞌdyeꞌ soꞌmac.

¹⁷ Tyi chuc anic jịꞌtsicayaquity jenꞌ muꞌ, jam jụijyaꞌ tseꞌ muꞌ, muꞌ jịꞌtsicayaquity jemoñeꞌ sänꞌdyeꞌ soꞌmac.

¹⁸ Chutity jụijyaꞌ päräꞌ sonꞌ in chat qui yirity päꞌjete mijyaꞌ jam jụijyaꞌ puñujyaꞌ muꞌ, chat muꞌ peñity jam säñi muꞌ paj tsanꞌ meꞌ jubijĉan mọmoꞌ muꞌ areꞌreij,

¹⁹ meꞌ na jụijyaꞌ muꞌ peñity jábiyaꞌ tupuj miꞌeban, paj tsanꞌ mutyudyeꞌtum muꞌ, muꞌ päꞌjetety jam raꞌ vaꞌtacdyeꞌĉan muꞌ. Muꞌ raꞌ mọmoꞌ jemoñeꞌ jiyaꞌdyeyepte muꞌ peñity muꞌdyes chụduj buꞌyedyesĉan tupudyeꞌ jubijĉan jiquej muꞌ peñitysiꞌ, junꞌ quiꞌ chuc jämꞌ chäĉän muꞌ.

²⁰ Yirity aꞌtumtyiꞌ päꞌjete jụijyaꞌ úñity muꞌ, jam jụijyaꞌ úñis muꞌ, chat qui säñi, muꞌ aꞌtumtyiꞌ jemoñeꞌ vaꞌtacdyeꞌ soꞌmac.

²¹ Jam tsanꞌ raꞌ vaꞌtacdyeꞌ soꞌmetinte muꞌ aꞌtumtyiꞌ jam säñi jụijyaꞌ jábiyaꞌ sacyeban jụijyaꞌ muꞌ úñity muꞌ, jam jụijyaꞌ úñis muꞌ. Jam raꞌ vaꞌtacdyeꞌ soꞌmetinte ĉaĉaij na muꞌin ĉụiꞌsiꞌ jedyeꞌ aꞌtumtyis muꞌ.

²² Meꞌ na jụijyaꞌ chuti päräꞌ muntyiꞌ in chat qui yirity päꞌjeꞌ yiris p̂en jạjtsis chat qui jojoiꞌ naꞌiꞌ ạvaꞌ mọꞌ jam qui namꞌ areꞌsijtiꞌ p̂en jụijyaꞌ, muꞌ na päꞌjeꞌtyiꞌ jemoñeꞌ yaꞌityeꞌ soꞌmete mọꞌtyiꞌ vämtyiꞌ mọꞌ jedyeꞌ chuc mạꞌjeꞌ muꞌ judyeyaꞌ rụij ĉúti muꞌin jịꞌruij yụꞌtacsity in.

²³ Paj tsanꞌ meꞌ mọꞌ areꞌsijtiꞌ jụijyaꞌ mọꞌ p̂en ac̣hiꞌtac jụijyaꞌ mọꞌsiꞌ aꞌ mọꞌ, muꞌ na meꞌjeꞌtyiꞌ raꞌ chimeꞌjeyacdye soꞌmac: Sänꞌdyeꞌ muꞌ sänꞌdyedyesdye muꞌ,

²⁴ vej muꞌ vejdye muꞌ, modyin muꞌ modyindye muꞌ, un muꞌ undye muꞌ, yuj muꞌ yujdye muꞌ,

²⁵ míte muꞌ chimitidyeꞌyaꞌdye muꞌ, täꞌtsacdyeꞌ muꞌ täꞌtsacdyeꞌyaꞌdye muꞌ, c̣hic muꞌ, chic̣hicjeyacdye muꞌ.

²⁶ Yirity aꞌtumtyiꞌ päꞌjete jụijyaꞌ úñity muꞌ, jam jụijyaꞌ úñis muꞌ, vejyaꞌ chat qui jajiꞌtofeyebuti vej, muꞌ aꞌtumtyiꞌ jemoñeꞌ faraj buꞌban yụꞌbajte muꞌ úñity, jam jụijyaꞌ úñis, tupuj faraj shuban c̣hoñi vejdyes.

²⁷ Judyeyaꞌ muꞌ aꞌtumtyiꞌ jiꞌmonte jụijyaꞌ modyin úñitytyiꞌ, jam jụijyaꞌ úñistyiꞌ, muꞌ aꞌtumtyiꞌ jemoñeꞌ faraj buꞌban úñity muꞌ, jam jụijyaꞌ mọꞌ úñis modyindyes.

Yocsiꞌ Yụꞌtacdyeꞌ in

²⁸ Yirity toro cuchjajiti jụijyaꞌ yirity sonꞌ, jam jụijyaꞌ yiris p̂en, joꞌmesyaꞌ säñi muꞌin, jemoñeꞌ ijatinte muꞌ toro farajñetinte mijyaꞌ judyeyaꞌ jam jebebitinte muꞌsiꞌ shush. Muꞌ qui namꞌ aꞌtumtyiꞌ toro jam raꞌ vaꞌtacdyeꞌ soꞌmetinte ĉaĉaij na jam muꞌsiꞌ juchaj muꞌ.

²⁹ Meꞌ na jụijyaꞌ muꞌ toro aty yiqui cuꞌchacsevaꞌjoijtyiꞌ muntyiꞌ in judyeyaꞌ muꞌ aꞌtumtyiꞌ aty jéyac. Meꞌ tsanꞌ chịj muꞌ jam qui namꞌ muꞌ aꞌtumtyiꞌ ĉärꞌjeyaquiyaꞌ toro muꞌ chat qui muꞌ toro jacuꞌchiti yirity sonꞌ jam, jụijyaꞌ yiris p̂en, meꞌ jụijyaꞌ jemoñeꞌ farajñetinte muꞌ toro mijyaꞌ ijatinte judyeyaꞌ chimeꞌ jemoñeꞌ ijatinte muꞌ aꞌtumtyiꞌ toro.

³⁰ Paj tsanꞌ meꞌ muꞌ aꞌtumtyiꞌ toro tupuj sänꞌdyeꞌyaꞌ ĉụiꞌ jiꞌc̣honti, jiyaꞌdyeyete jụijyaꞌ muꞌ jedyeꞌ chuc mạꞌjeꞌ muntyiꞌ in.

³¹ Ọijdye yụꞌtacdyeꞌ chimeꞌ fer buꞌyiꞌ jämꞌdyeyaꞌ yirity toro cuchjajibuti yirity sonꞌ ạvaꞌ muꞌ jam jụijyaꞌ p̂en ạvaꞌ muꞌ.

³² Muꞌ toro cuchjajibuti jụijyaꞌ yirity úñity, jam jụijyaꞌ yiris úñis, muꞌ aꞌtumtyiꞌ toro jemoñeꞌ yaꞌityete chibin quiꞌtac ficha plata muꞌyaꞌdye aꞌtumtyiꞌ úñity, jam jụijyaꞌ úñis. Chat qui muꞌ toro cuꞌchacsevaꞌjoijtyiꞌ jemoñeꞌ farajñetinte mijyaꞌ ijatinte.

³³ Yirity sonꞌ jectyeꞌ änꞌtaquis toꞌsiꞌ, jam jụijyaꞌ muꞌ fadyeꞌ yiris toꞌ jam änꞌjeꞌ muꞌ, chat qui muꞌĉan tŝọij säñi yirity vaca, jam jụijyaꞌ yirity bórico,

³⁴ muꞌ na aꞌtumtyiꞌ toꞌ jemoñeꞌ jiyaꞌdyeyete cuꞌdyedyes. Muꞌ jemoñeꞌ jiyaꞌdyete muꞌ aꞌtumtyiꞌ cuꞌdyeꞌ, chat qui mọꞌ cuꞌdyeꞌ säñis muꞌdyes shupquiꞌ.

³⁵ Yirity muntyity toro chute jụijyaꞌ yoctyity toro meꞌdye ijate. Muꞌin pärenꞌ aꞌtumtyiꞌ in jemoñeꞌ jiꞌmincate muꞌ tsạꞌtyiꞌ toro in chat jiꞌchetiyiti in muꞌ querec̣ha. Judyeyaꞌ chimeꞌ jiꞌchetete in muꞌ säñity toro, cätsdye jiꞌchetacdyeꞌ pärenꞌdyes shupquiꞌ.

³⁶ Paj tsanꞌ meꞌ, chị́yac jụijyaꞌ junꞌ chuc muꞌ toro meꞌ yiqui, judyeyaꞌ muꞌ aꞌtumtyiꞌ jam ĉärꞌtaqui, muꞌ qui namꞌ aꞌtumtyiꞌ tsạꞌtyiꞌ toro jemoñeꞌ jiyaꞌdyeyete muꞌ aꞌtumtyiꞌ säñity toro yoctyiꞌyaꞌ toro. Chat qui muꞌ säñity toro muꞌdyety mọmoꞌ.